Read BIBILLYA Mareiyo Meele a Iruva FYAASO 18 Bible Online

FYAASO 18 - BIBILLYA Mareiyo Meele a Iruva bible

FYAASO 18

¹Mwiruya mbony takwe muni mmbo akaa kwaasha na vengyi, Mmbo anyaasyaa deny kanningwa ikusaro isha.

²Nrung'ani nnyasennywaa ni urango fo; Kwakwe kisha ni makusaro akwe muni.

³Kansha nravi mmbo kishee na kiila, Amwi na sony nkushee usutu.

⁴Marero eedimaa iva usoka lwa urango usha; Atiri kirori kyaasha sha yeeve sha soka ishiiritaa mura.

⁵Nshi kisha ikunndya nndu nravi fo Na iima nndu nsaari usumanu fo.

⁶Marero a nrung'ani mmbo eendee mwaandu; Wo kindo arera mmbo kisheendee ngapo.

⁷Kana ka nrung'ani mmbo kimmamitaa we muni; Kana kyakwe ni nreiyo wa intira we muni.

⁸Marero a mwirera vengyi mmbo avakkye mboka irolaa Isholokaa vyaa kutani yafika ndewuny.

⁹Nndu nroko ishoreny lyakwe Ni mwanamaaye wa ulyamari.

¹⁰Irina lya Nndumi Iruva ni usiro lwa finya, Nndu nsaari mmbo arishyany kakaa kippwa.

¹¹Indi isimba mmbo likusaraa masaa nnyo turuve yakwe; Kakusara mbu isimamba yaasha lya iringa.

¹²Ukushobi lwa nrima lwendee urumato; Indi iviiri mmbo lyeendee utore.

¹³Irouwa kulaore kwa mmaarannya Ni urung'ani na kindo kya sony.

¹⁴Muu wa nndu wiidimaa isisirya ndwari, Indi kwamfwa nrima mmbo kushiidimaa inda?

¹⁵Nndu atiri urango mmbo aruuyaa umanyo. Kuri kya nndu ntele mmbo karuuya umanyo.

¹⁶Kindo kya pya mmbo kiruyaa nndu mwaango; Mmbo kiidimaa ifita nndu mbee ya vaniini!

¹⁷Yeto mwiipooka irera mwaandu wakwe Mmbwe alollyo ni nsumanu, kuuta elyi apooka iveswa ni yeto mwisyamwaandu.

¹⁸Kura nnyo irumbwaa kiwakyanu Kyeeri vanini vavii vakewannya ushilyi.

¹⁹Mwanamaye wa nndu akee ntarami mmbo atiri finya sha turuve. Indi kwasakya nawe mmbo ashekurayaa poo.

²⁰Marero a nndu ashiidimaa immbutisa; Kawonisa fyoose atinnyo.

²¹Ulumi lutiri finya ya iwaa na iruta, Vekunda irunda nalo vawonaa ndunda ta vayo.

²²Mwiwonisa nka nsaari, ankooya kindo kyaantu, Ni ngarami yuukye kwa Nndumi Iruva.

²³Ngwera mmbo iterevaa kwa wiiri; Indi isimba likarouwa kwa unyaasi.

²⁴Mbuya shiinyi tishiidimaa ituula nndu, Indi kwiifo mbuya vasaari ngota mwanamaye wa nndu.