Read BIBILLYA Mareiyo Meele a Iruva FYAASO 19 Bible Online

FYAASO 19 - BIBILLYA Mareiyo Meele a Iruva bible

FYAASO 19

¹Ni kyeni nturi atiri vio na urilalyi Ngota nndu wa uruuru wa marero a urung'ani.

²Nkivaa nndu ikaa nalatiri urango fo; Mwienda sere sere mmbo akapaa urende.

³Nndu kakumamita na urung'ani lwakwe Mmbo akapaa Nndumi Iruva mma kya urung'ani lwakwe.

⁴Masaa mmbo aomwaa mbuya shiingyi veny; Indi nturi nnyarewaa alatiri mbuya.

⁵Nkureekyi wa wongo nnyaraa alaorotwa fo, Mwirera wongo nyashiidimaa ikkya-fo.

⁶Vandu vengyi mbakuamba ambaa kwa vaniini; Wo nndu nnyakundaa iva mbuya ya nndu atiri maako.

⁷Nturi mmbo eepalwaa naakwa ni vana va maaye, Mbuya nto mmwasi mmbo vanrishaa, Naakwa avalelemba inda nnyavakoyaafo.

⁸Mwiwona urango usha mmbo akundye muu wakwe; Mwikunanavya na utele atumaa.

⁹Nkureekyi wa wongo nnyaraa alaorotwa fo, Mwiamba wongo amamikaa.

¹⁰Nkivaa nrung'ani ikaa sha nndu mmasi fo, Lyingyi nkyikasha deny ishinga ikallya vandu vaniin va uruka!

¹¹Nndu nrango nnyaroyoo nngoo uviny-fo; Isarya ni itumbe lyakwe.

¹²Unyafi lwa mangyi mmbo luvakkye idina lya miiso, Indi usha lwake lukava sha laura uwe ya myooro.

¹³Mwana nrung'ani nrenga kwa ndeye; Na isakkya lya nka llivakkye marony a mmbwa alasyaa.

¹⁴Mmba na masaa n dingu nndu awonisaa yuuka kwa vamiku vakwe, Indi nka nsaari nndu mmbo awonisywa ni Nndumi Iruva.

¹⁵Va nroko deny kwakooya kukunde; bara rwe deny, Kya indi nndu nroko mmbo aliswaa ukiva nshaa.

¹⁶Mwiringa mavavaso akiraa muu wakwe, Mwiinyala ivavaso ashefwaa.

¹⁷Mwiiekkya ngwera mmbo aarya Nndumi Iruva, Nndumi Iruva ashentaa kya mitannye yakwe misha.

¹⁸Ikimba mwana wafo uviny deny. Indi kulamworote kya immamita-fo.

¹⁹Nndu wa ngoo shinyaasi kuti aumisyo. Kwanlekeya lyimwi kuti kunlekeye lyingi-se.

²⁰Arannya uvavaso na iwarya ufundo, Kukooye urango usha lukwekyaa fyeeri fishaa.

²¹Nrweny wa nndu nkwiifo mbony shiingyi, Indi kilya Nndumi Iruva anrummbwa nkyo kisheutikaa.

²²Kindo kikundyo kwa nndu ni usaari. Nkyeni nndu ngwera ngota nlembi mwiamba wongo.

²³Indya Nndumi Iruva kuvonise muu mwaasha, Na yeto mwimwiindya nyavonisaa misindara, Nta nnyawoywaa nrenga-fo.

²⁴Nroko n sha nndu arwaa woko kyideeveny kya shoonga, Indi nnyatiri finya ya iipoo woko lwakwe lufike kaniny-fo.

²⁵Kapa nndu mpeere nawe itondo akooye umanyo

²⁶Mwilamya masaa a ndeeye na yuumbuta maaye Ni mwana mwiiende usutu na ulyamari.

²⁷Mwanakwa kwanra kulaaranya ufundo, Mmbo kurettyaa kwaasha fillya fya urango usha kutiri.

²⁸Nkureekyi nalavaa mmbo ainyalaa usumanu; Na vandu varavi vakasennywa nyuravi.

²⁹Ngapo tiyoo kwa vatiri upeere, Ni ngova shideesye mungo wa varung'ani.