Read BIBILLYA Mareiyo Meele a Iruva FYAASO 2 Bible Online

FYAASO 2 - BIBILLYA Mareiyo Meele a Iruva bible

FYAASO 2

¹Mwanakwa, arannya ufundo lwakwa Na iindya mavavaso akwa.

²Kwaloota kuri kafo kwarannya urango usha, Na irua ngoo yafo kuwonise imanya.

³Ee, kwa tereva kuwonaa utele Kwa erera kuniingwa imanya.

⁴Kwaruuya urango usha sheelyi kusyaa fesa Na ikunda sha kindo kya uuru uniini kikee kisurumi.

⁵Llyo kushitumusoo iinndya Iruva nkyoki Kumanyi nisha Iruva;

⁶Kimmba Iruva llimbi mmbo aniinga vandu urango usha! Kaniny kakwe kukauka-fo urango na imanya.

⁷Mmbwe asurumyaa vandu vaarya urango usha lwa dede. We ni ngoo ya vandu vakee vasaari.

⁸Mmbwe aringaa mikaaye ya vandu vetana fya songosiny Na iringa shia ta vandu vakwe va usumanu.

⁹Kwa shaaranya mmbo kumanyaa utele, na usumanu, Kumanyaa kindo kya urango na kikee kisha.

¹⁰Mashika urango usha llushaangaa ngoony yafo, Na imanya lyisheangaa muuny wafo.

¹¹Utele lukuringaa, Imanya lyikushukuraa;

¹²Fikuringaa kulaange uraviny, Na marero a vandu varavi.

¹³Vandu vareeye shia ya usumanu Na ilatya shia ta ireema.

¹⁴Vandu mmbo vasennywa ni itana uravi, Na ilatya uravi na urekwa;

¹⁵Vandu mikaye yaawo irekye, Na shia tawo tilavaa ikusirya

¹⁶Urango usha lukuidimisyaa iturunya nka ntuusi, Nka mwaala shya atiri marero arolaa a ntambo.

¹⁷Nka ashiisityo-u mmi wa ukoo lwakwe Na irekyo mma ya Iruva wakwe.

¹⁸Mmba yakwe ikeenda nnakwa varumu; Shia takwe tikeenda na kwa vafu.

¹⁹Yeto wo moose ansoraa nnakaa awuye tusu-fo. Nta nnyakaa awuiye shia ya muu-fo.

²⁰Kwa yekyo kulatye ngaa ya vandu vasaari, Na ilatya myengye ya usumanu.

²¹Mashika vandu vasaari mmbo vawaryaa ding'u, Na va usumanu valung'annyaa-fo.

²²Kya indi varavi varumatwaa urukeny, Na va ntambo vasheiluwaa-fo.