Read BIBILLYA Mareiyo Meele a Iruva FYAASO 24 Bible Online

FYAASO 24 - BIBILLYA Mareiyo Meele a Iruva bible

FYAASO 24

¹Kulalange vandu varavi; Nta kulatingwa ikaa amwi nawo,

²mashika makusaro awo moose ni uwe ya uriiti, Nkwiifo usha nta lumwi lushuuka kaninyy kawo-fo.

³Mmba mmbo itanwaa na urango Na ivangiswa na utele.

⁴Kwa umanyo firya fya vayo fikaishurwa Findo fya uuru fisennyi.

⁵Iva na urango usha ni kyeni ngota itira finya, Ee, umanyo ngota finya.

⁶Mashika na usongoru usha kushiidimaa ikapana fira; Kimaruma kya veolonngya veengyi uvingyi lukawonika.

⁷Kwa nrunng'ani urango usha ni kyuumu iimanya. Ando kukee ikwaanu, nnyatarambwaa kana-fo.

⁸Mwikusara itana maravi wo kyeeri Ashevangwaa nndu nriingyi.

⁹Uramba nndu nrung'ani akusaraa ni ulyamari; Nndu wa kiila mmbo asuwoo mbwo nndu.

¹⁰Kwamfwa nrima kyeeri kya ukyiva Naasa yewe mmbo kukee nnana deny.

¹¹Kira nndu akeendewaawa kya ruu;

¹²Kulasheamba numa, “Llulemanya-fo.” Mashika Iruva mwiesa mirima ya vandu alollyaa; We mmbo akweesaa kyuuka na mitanyi yafo.

¹³Mwanakwa, lya ukyi kimmba ni usha; Irana lya ukyi llirolaa kaniny.

¹⁴Ni indo lukee urango usha muuny wafo. Kwanluwona kuvaa na nsia nsha, Nta kindo kuvikkye nsia nkifwaa pala-fo.

¹⁵Kulalaaye sha nravi awoyaa kyeny kwa nndu nsaari. Nta kulakare ilyamara mmba yakwe.

¹⁶Mashika nndu nsaari mmbo awee keengyi kavekupoo, Indi nndu nravi mmbo amamitwaa nrenga.

¹⁷Kulakape nndoro elyi nkiduva wafo awa-fo. Kulafure nriminy wafo kyeeri akapa urende lwakwe.

¹⁸Mashika Nndumi Iruva mwilollya efyo nnyasennywa-fo Kishiidimikaa nare nalamworota.

¹⁹Kulasavaa kimaruma kya vetana makasha-fo; Nta kulatirye vandu varavi kififi.

²⁰Mashika nravi nnyavaa na usha numa-fo; Taa ya muu wakwe mmbo irumywaa.

²¹Mwanakwa inndya Nndumi Iruva na itirya mangyi vio, Nta kulatarannyi na valya ve raaraa.

²²Mashika umamito lwawo lluvasheyaa tiny. Nkwiifo nndu eeshi renga vashendee-fo?

²³Yeti tikesora yaa-da ni mbyaa ta vandu vatiri urango usha: Ikunndya vandu mirumbuyeny ya myaandu nshi kindo kisha-fo.

²⁴Mwilotorya nndu atannyi kikasha, Mmbo adengwaa na isuwa ni vandu.

²⁵Indi veorota varavi vakooya ifura, Na mbora shisha tivasheyaa.

²⁶Kirouwo kya usumanu Nsha kimimindo kya mbuya.

²⁷Runda mbele mashora afo poo, Kwadesya wo kindo nndeny, Numa kwatana mmba yafo.

²⁸Kulafinngye nndu wafo wa nnyanu kindo kya ruu, Nta kulaambe wongo uwe yakwe.

²⁹Kulaambe, “Mmbo shitanaa shaasa aleshitannya! Ni kuti shitaiye kiduva!”

³⁰Mmbo shileira kufii na nnda wa nndu nroko; Nnda wa misabibu wa nndu nrung'ani.

³¹Mmbo shiletingwa ilolya shaasa lyimiyye miinga, Usoka lwa vayo lukasikkya koose, Na isimamba lyakwe lya mawe lliwoiye si.

³²Shalola, shakusara, Numa shawona ufundo:

³³Lala kinnywa-da, rengea-u kinnywa, Lema maako afo kukooye iimuya:

³⁴Indi kummbwa sheelyi kyeeri kukee rony, Ungwera lwafo mmbo lukeekusheya sha nsoki, Uturi lwafo sha nndu arye fisha.