Read BIBILLYA Mareiyo Meele a Iruva FYAASO 26 Bible Online

FYAASO 26 - BIBILLYA Mareiyo Meele a Iruva bible

FYAASO 26

¹Wiindi nndu nrung'ani aniingwa llumwekyaa-fo, Nsha laura ya kyaamwi kyeeri kya mwi ao mmbwa kyeeri kya iiluula.

²Sha ikolowiru ao kishakweere fikeerummbuka filashiimuyaa, Naakiwo kidengo kilasumani nkikooya nndu-fo.

³Ngowa ya frasi, kyoove kwa nshungu, Na mbiiri kwa mungo wa nrung'ani!

⁴Kularouwe nndu nrung'ani kirung'ani kulashe immbaka.

⁵Rouwa nrung'ani kisumani na urung'ani lwakwe, Naambo nalasheekulollya mmbo atiri urango usha mmwasi.

⁶Iruma nndu nrung'ani rumi, Ni kyimwi sha ikumanya urende ao ikuruuyya ukyiva.

⁷Fyaaso kaninyy ka nrung'ani, Ni kyimwi sha marende a kitongororo.

⁸Iniinga nrung'ani wiindi, Nikyimwi sheefingya iwe ukoveny lwa yeera.

⁹Nrung'ani akee kwiita irera fyaaso Nsha nnangwa akekuuta mwiinga wonkony.

¹⁰Nndu aniinga nrung'ani ao nnangwa mashora a weesi Nsha mwiasa mife ashaasa wo nndu.

¹¹Nrung'ani awuuiyaa urung'ani lwakwe wo sa, Ni kyimwi na kite kilyaa uraako lwa vayo.

¹²Kulollye nndu yeto akulollye atiri urango usha? Nshakuvia nrung'ani ni kyeni ngota we.

¹³Nndu nroko mmbo aamba, “Efo poo kwiifo miiso; Nshiidimaa yeenda-u-fo.

¹⁴Sheelyi iboo lyikwindukkyaa yoo malungony a vayo; Ni kiwo nndu nroko uwe ya kitara kyakwe.

¹⁵Nndu nroko mmbo avikaa woko ndeeveny wa shoonga Indi n nashiidimaa iipo naroe kaniny-fo.

¹⁶Ndu nroko mmbo akulollya sheelyi nyatiri urango usha, Ngota vandu mfungare vaidimaa irouwa kwa urango.

¹⁷Mwikwiita mwaanduny ulakwaany nawe Nkyimwi na nndu atiraa maarwi a kite kikeira.

¹⁸Sha nsukwa atavanyaa muro ao mife ya ufu,

¹⁹Niindo akee nndu aretaa nndu wa nnyanu, Numa kaamba, “Mmbo shekee mwesa-da.”

²⁰Kulaifo ngwi muro mmbo urumikaa, Kulaifo mwiiaya mwaandu mmbo usyaa.

²¹Sheelyi makaa ao ngwi tiviirwaa murony Ni indo mwisakkya aoswa mwaandu.

²²Marero a mwirera vandu vengyi mmbo avakkye nteera Mbushoo lokaa kutani wafika ndewuny.

²³Sha woyo lushope lukawarama, Ni indo akai marero mesha atiri ntambo.

²⁴Nndu asuuye mmbo asurumaa isswa lyakwe na marero mesha, Kya indi nnyatiri ntambo nriminy wakwe.

²⁵Karera nisha kulamwiirikkye-fo, Nriminy wakwe mmbo kwiishwe ntambo.

²⁶Ashiidimaa isuruma ngoo yakwe, Indi ntambo wakwe mweesi ushemanyikaa kwa vandu woose.

²⁷Mwisumya uroe ishombo, ashewaa-fo we muni; Mwibiringita iwe lyiishemmbuyyaa we muni.

²⁸Mwirera wongo mmbo assuye yewo akee vavavisa, Nawe mwilelemba mmbo aendee umamito.”