Read BIBILLYA Mareiyo Meele a Iruva FYAASO 28 Bible Online

FYAASO 28 - BIBILLYA Mareiyo Meele a Iruva bible

FYAASO 28

¹Varavi mmbo varishaa kulaore vakeerishwa ni nndu, Indi vasaari vakee vakaari sha miiso.

²Isanga lya imatuka llivikaa vashilyi veengyi; Indi kwa nshilyi umwi atiri urango na waarya uruka llutiraa finya.

³Nndu nsuri alamyaa ngwera Mmbo avakkye mmbwa niini ilyamaraa myooro.

⁴Vandu veimmbwa mavavaso mmbo vaitikisaa varavi; Indi veevalya na mavavaso mbavakyanaa nawo-fo.

⁵Varavi mmbeeshi usumanu nkyoki-fo, Indi veindya wo weeshi deny.

⁶Nngwaana ngwera akaa na usumaanu Ngota isimba likaa na urekwa.

⁷Mwana atira mavavaso mmbo atiri urango usha; Indi mbuya ya vaafu mmbo asutaa ndeye.

⁸Mwiengera masaa akwe na ntambo Mmbo akesangirya ungyi yeto alillya ngwera

⁹Mwilema iaranya mavavaso Yeto naakwa nkiterewo kyakwe nkyisenya Iruva-fo.

¹⁰Nndu mwiivika nndu nsaari nrwe natani mbony shikasha, Mmbo awaa irininy we muni. Vandu valatiri mbese wo vakee vadesye mesha.

¹¹Nndu isimba mmbo akulollya we muni sheelyi atiri urango usha, Indi ngwera itiri urango mmbo ishemfunaa.

¹²Vandu vasaari vakavona ushilyi uruka mmbo luvee lwa mbora, Indi varavi vakanshilya vandu mmbo vakusurumaa.

¹³Mwisuruma ulyamari lwakwe nnyawonisaa mbora-fo, Indi mwipara ulyamari kakurya na irumbuya mmbo ashesaryoo.

¹⁴Ngoma nndu mwiinndya Nndumi Iruva mikonu simu, Indi nndu wa nrima muumu mmbo ashewaa rengeny.

¹⁵Nshilyi nravi ashilyaa ngwera, Nkyimwi sha miiso idinaa ao nyamandu iratuaratuaa.

¹⁶Nshilyi nalakee na urango mmbo akee mweesi na nriiti, Indi mwisua masaa a ulembi asheshilyaa kyeeri kyaasha,

¹⁷nndu akee nrovye ni ulyamari lwa iwaa nndu Mmbo ashevaa mwiraraa kutani afika kifuny. Kulave nndu akundaa insiika!

¹⁸Mwikaa na usumanu ashekirwaa, Indi nlembi ashewaa deny.

¹⁹Mwirema nnda wakwe awonisaa shoonga shiingyi; Indi mwisora findo filavaa awonisaa ungwera lumfye.

²⁰Nndu nsaari awonisaa mbora shiingi. Indi nndu wa usau lwa iva isimba nnyakuutaa ngapo-fo.

²¹Nshi kindo kisha ikundya nndu-fo; Vandu mmbo vatanaa ukasha naakwa n kimaruma kya kiperusha kya nkate kyeni.

²²Nndu n nyuku mmbo arishyaa masaa, Nta n neeshi sheelyi uturi lukenssheya-fo.

²³Mwiikimba urooye ashewonisaa mesha m mwasi, ngota ulya mwilelemba na marero arolaa.

²⁴Mwiiva masaa a ndeye ao maaye ashaambaa, “Nshi kikasha?” Nnyatiri kilasha na manyinyi engyi-fo.

²⁵Nndu nnyuku mmbo aayaa mwaandu Indi mwiinndya Nndumi Iruva ashevesyoo.

²⁶Mwikusirya urango lwakwe muni ni nrung'ani Indi mwisora urango usha ashekaa na ufoo.

²⁷Nndu aniingaa ngwera findo nnyashaanguywaa-fo, Indi mwilema ivaekkyo ashedengwaa nnu deny,

²⁸varavi vakashilya vandu mmbo vakusurumaa, Indi vakansarumya, vasaari mmbo vaengerekaa.