Read BIBILLYA Mareiyo Meele a Iruva FYAASO 29 Bible Online

FYAASO 29 - BIBILLYA Mareiyo Meele a Iruva bible

FYAASO 29

¹Mwiikimbwa kyeengyi katira nrima muumu Ashesarumyaa tiny nta nnyakkyaa-fo.

²Vandu vasaari vakashilya, vandu mmbo vafuraa. Indi varavi vakashilya, vandu mmbo vakunung'unaa.

³Mwikunda urango usha mmbo eengyee ndeeye ifura, Indi mwisora vaka masonga mmbo ararata masaa akwe.

⁴Mangyi kansora usumanu mmbo atumbanaa uruka, Indi kanlanga eleri uruka mmbo lurumakaa.

⁵Mwilelemba nndu wakwe wa nnyanu, Mmbo akeedesya nreiyo ushembwaraa we muni.

⁶Nndu nkasha, mmbo atirwa na uravi lwakwe, Indi nndu nsaari mmbo eembaa na ifura.

⁷Nndu nsaari nyeeshi usumanu lwa nndu nturi, Indi nndu nravi nnyeeshi mbony yeyo-fo.

⁸Vandu vatiri kiila mmbo veengyee muri ngusana, Indi vandu vasaari mmbo varelelisaa mwaandu.

⁹Nndu atiri urango usha kawakyana na nndu nrung'ani, Nrung'ani mmbo arooyoo nngoo na iseka nalamandaa.

¹⁰Velanga ipusua samu mmbo vasuuye nndu nalatiri mbese, Indi vandu vasaari vakakira muu wakwe.

¹¹Nrung'ani mmbo oora unyafi lwakwe paa, Indi nndu atiri urango usha mmbo asiraa ngoo na ifwerisa.

¹²Nshilyi kaaranya marero a wongo, Ngyama takwe toose mmbo tivaa tiravi.

¹³Nturi na mwilamya mmbo vavakyani ni kindo kyimwi Woose vavii mmbo vakee vaniinge miso ni Nndumi Iruva.

¹⁴Mangyi mwirumbuya ngwera mwaandu kya usumanu Ushelolyaa ushilyi lwakwe lwiivangaa llung'anu.

¹⁵Ngapo na wiikimbi m fyendee urango usha, Indi mwana atere katana shaasa akundye mmbo asutaa maaye.

¹⁶Varavi vakashilya maravi mmbo aengerekaa, Indi vandu vasaari wo vashelolyaa iwa lyawo.

¹⁷Niinga mwanawafo iva na ngaa shisha nawe ashekuutaa usutu, We asheniinga nrima wafo ifura.

¹⁸Kulaifo wiikimbi lwa veawuya kisuku, Vandu mmbo vaturaa ngaa ya songosiny. Ngoma nndu mwivallya na mavavaso.

¹⁹Ishinga lyikimbwaa na kana karuu-fo Mashika naakwa eeshi n nasoraa-fo.

²⁰Kulenlolya nndu amasanaa nalakusaraa Nndu nrung'ani n kyeni ngota we.

²¹Mwilelemba ishinga lyakwe uka lyekee mwana Masiiyony ishinga yelyo mmbo lisherwaa ding'u.

²²Nndu atirwaa n ngoo mmbo aayaa mwaandu Nndu wa unyafi mmbo eendee renga shiingyi.

²³Ikulolya lya nndu mmbo lyintulaa we muni Indi nndu wa ngoo ikunyiisye akooya iindywa.

²⁴Mwitaranyana na inyinyi mmbo akekwaatara muni, Mmbo eeta kidengo kya mwiwonnywa nalarere nta kindo.

²⁵Iereya vandu ni ikureiya kumuni, Indi mwikusirya akaa na ufoo.

²⁶Vandu veengyi mmbo vakundaa ikwaamba-amba kwa vashilyi, Ate nndu mmbo awonaa usumanu lwakwe kwa Nndumi Iruva.

²⁷Mwilamya ni kindo kiravi kwa nndu nsaari; Na nsaari n kindo kyeesi kwa nravi.