Read BIBILLYA Mareiyo Meele a Iruva FYAASO 4 Bible Online

FYAASO 4 - BIBILLYA Mareiyo Meele a Iruva bible

FYAASO 4

¹Vanakwa, aranyiny ufundo lwa vande vaany. Looteny kuri mukooye urango,

²Mashika m mavavaso mesha shikeemuninga. Mulalemi ufundo lwakwa.

³Neeny da, shekee mwana shetiri nde, Shekee mfoo nnu shakundwa mma.

⁴Ndeye akwa kashilosha indi, “Wara marero akwa na nrima moose Tira mavavaso akwa neewe kukaa na muu.

⁵Wonisa urango usha, wonisa imanya. Kularekyo nta kulainyale marero akwa.

⁶Kulalekeye urango usha nawe akulelaa. Nkunde nawe akuringaa.

⁷Kindo kya mbusha ni iwonisa urango usha! Ningya fyoose kutiri kuwonise urango.

⁸Kunda nnu urango usha, nawe ashekurumishaa. Kwamutira tapu ashekuniingaa nnduma.

⁹Ashekuvikaa ureto nrweny wafo; Akuniinge ureto lwa itumbe.”

¹⁰Mwanakwa, aranya na itira marero akwa, Naambo kuvonise mikonu mifumbutu, yekaa na muu.

¹¹Shankulosha shia ya urango usha Shakuteterya shieny shorotu.

¹²Kweenda nayo nkukapaa urende Nta kwarisha nkuwaa-fo.

¹³Worya ufundo lwa urango usha; kulanlekeye akure, Lutire tapu, mashika mmbwe muu wafo.

¹⁴Kulalatye shia ya uravi Nta myeengye wa vandu vakasha.

¹⁵Ira kwaasha na shia yaawo. Kwiise nawo ira kwaasha.

¹⁶Vandu varavi mmbalalaa kuloore vatana fya uravi-fo, Mmbalalaa rwe kuloore vatuula nndu-fo.

¹⁷Mashika uravi nnyo shoonga yaawo Uriiti nkyo kyeena kyawo!

¹⁸Shia ya vandu vasaari ivakye ngesa ya nraasi, Shaasa imikyaa ikamika kutani nsanyiny wafika.

¹⁹Indi shia ya varavi ni ireema yuu piti Mmbeeshi kindo kivatevaa vawe-fo.

²⁰Mwanakwa, arannya nnu marero akwa, Lootya kuri ufundo lwakwa.

²¹Kulalotore au misony afo-fo Atire ngoony yafo,

²²Mashika mmbo akee muu kwa nndu aatiri, Ni nri nyaminy takwe.

²³Ringa nrima wafo na ngeta, Mashika mfo soka ta muu tuukaa.

²⁴Isityou ngaa na marero meesi; Nta kana kafo kalarere marero maravi-fo.

²⁵Lola mbee na ukaari Nta kulave nndu wa ngula.

²⁶Kusare shia kusoraa; Na myeenngye yafo usongovaa.

²⁷Kulaende taari ya woko usha nta umuso; Kwiise na ukasha lwa wo ngata.