Read BIBILLYA Mareiyo Meele a Iruva MWIILOSHA 11 Bible Online

MWIILOSHA 11 - BIBILLYA Mareiyo Meele a Iruva bible

MWIILOSHA 11

¹Kapa mbusha naakwa yaangwa, Naambo numa kuiiluule-fo mbusha mmwasi.

²Ava waavi lwafo kwa vandu mfungare ao nyanya, Mashika nkwiishi kindo kishiidima iwoya ulana ndesi-fo.

³Ifishi lyikammishwa mura, ni mmbwa ikeesha, Nri ukawa-si ulella taari ya sinde ao ndoo, Yoo uwoyaa nng'u ando ushelalaa.

⁴Mwiivereya uraato, nnyavaaya mbeu-fo, Na mwiivereya mafishi avivitwa, nnyashuululaa kindo-fo.

⁵Ndesa kuleeshi ngata muu waanga efo mafweny a mwana akee nsangeny wa maye-le, niindo nkushiidimaa imanya mashora a Iruva eto atanaa wo kindo-fo.

⁶Vaaya mbeu ngama na nkwaany kulalemi ivaaya-fo, mashika nkwiishi ntingati timmya-fo nta ngama nkwaany, ao shoose tishekooya iva shisha.

⁷Mwi ni nsha na ilollya nkyeere kyikasennya miso.

⁸Nndu kawonisywa myaaka miingyi afure kya myaaka eyo myoose, lyo akummbwe sheelyi yiifo mikonu mikasha ikeesha nayo mmbo ivaa miingyi, neefyo fyoose ni maariso.

⁹Fura yewe mwana nkoo fura kya ukoo lwafo. Kyesa nrima wafo kyeeri ekyi kya ukoo lwafo. Niinga ekyo nrima na miso afo akunndye, lyo kummbwa sheelyi Iruva mmbo ashekuutya uvingo kyuuka na mitannyi yafo.

¹⁰Era neefo maariso a nrima wafo kwiise mwiili wafo ulashevavywa mashika ukoo na mafurumyony a muu yeu fyoose ni maariso.