Read BIBILLYA Mareiyo Meele a Iruva KYIIMBO KYA FIIMBO 2 Bible Online

KYIIMBO KYA FIIMBO 2 - BIBILLYA Mareiyo Meele a Iruva bible

KYIIMBO KYA FIIMBO 2

¹Yeny ni kivaro kya Sharoni, Mmbo shikee Liilyi ya imungony. Nndu nsoro

²Shaasa kivaro lya liilyi kisennyaa kiivaiye nnang'ani ya miinga, Ni indo-da nkunde wakwa alollyo kyeeri akee na vana vengyi va kyeny. Nndu nka

³Sha nri va ipeera nnang'ani ya miri ya ngoroshony, Ni indo-da nkunde wakwa alollyo kyeeri akee na vasero vengyi. Mmbo shisennywa deny kyeeri shikee rembo kirisheny kyakwe, Na ndunda yakwe mmbo irolaa kyuumu nnu kwakwa.

⁴Mmbo aleshiipo kutani ashifita mmba ya ilyiiya, Kavaaya ifumu lya ikunda uwe yakwa.

⁵Shiwuutisaany na misabibu Shiviirya muu na mapeera, Mashika ikunda lyafo lyanshinanga.

⁶Woko lwakwe umuso nsumbai ya nrwe wakwa lukai, Na woko lwakwe usha lukashishukura.

⁷Mmbo shamutereva vana va kyeny va Yerusalemu, Shaasa tikee sunu ao saria ta efo ngoroshony, Mulaante nta mulaaye ikunda, Kutani fyeeri fyavayo fyawutika fyeni. Nndu nka

⁸Yelo ni unyanga lwa nkunde wakwa, Akeesha eerishaa, Nyakee ikyillya mafumbu, Fidooro mmbo akeefiira swany!

⁹Nkunde wakwa sha sunu, Nsha ngurana ya saria. Mmbo asalallye kufii na isimamba lyeeru, Eeshaamaiyaa idirisheny, Kalola esye-do.

¹⁰Nkunde wakwa karera kashivia, Nndu nsoro Kwiipo ulaalu yewe nkunde wakwa wa nrima, Osho nnde lweende kyeeru.

¹¹Lola ulaalu fyeeri fya mbyoo fyammiira, Na mmbwa tammanda

¹²Fivaro mmbo fivaiye wo ando. Kyeeri kya iimba kyanfika Unyanga lwa mbeta lwammiitiwa efo fyaambeny fyeeru.

¹³Makuu ampooka ivika ndunda; Na misabibu yammbaa fivaro; Mmbo fikee ifwaama nisha kyuumu. Oshoony ulaalu yewe nkunde wakwa wa nrima, Osho nnde lweende.

¹⁴Yewe mbeta yakwa, kukusurumye ngininy. Shoora kisangu kyafo tupu, A nkye shiite unyanga lwafo-dwa Mashika unyanga lwafo mmbo lwasennya, na kisangu kyafo kyikeende nsia.

¹⁵Lutiryeny maparwe, Maparwe allya mannywa-mannywa, Mmbo akee ilyamara misabibu yeeru ikee ivaa fivaro. Nndu nka

¹⁶Nkunde wakwa m-mbwakwa na yeny m-mbwakwe. We mmbo eesaa moonri akwe ando kui-yo fivaro fya liilyi.

¹⁷Kutani kyeende-saa kyaparikya, Na firishe fikareka. Wuya sha sunu woi nkunde wakwa, Sha ngurana ya saria ikee uwe ya mafumbuu a Beteri.