Read BIBILLYA Mareiyo Meele a Iruva KYIIMBO KYA FIIMBO 4 Bible Online

KYIIMBO KYA FIIMBO 4 - BIBILLYA Mareiyo Meele a Iruva bible

KYIIMBO KYA FIIMBO 4

¹Nndu nsoro Kya dede mmbo kukee nsha nnu nkunde wakwa, Kya dede kukee nsha! Miso afo mmbo akee sha a mbeta Numa ya shela yafo, Fii tafo nsha ironda lya mburu Tishoolokaa tuuka mafumbuu a Gileadi.

²Mayoo afo mmbo akee sha moonri a kyika moote mafwaa Akeeyooloka emmaa isanngywa. Wo lyimwi mmbo lyifeiye maasa, Na nkwiifo nta lyimwi ngurana ya vayo ifiye-fo.

³Firomu fyafo mmbo fikee sha usiro ludodorye, Kana kyafo mmbo kisennyi nnu-dwa. Numa ya shela yafo, Ngushu tafo mmbo tikee sha fyenga fivii fya ndunda shirenderi.

⁴Singo yafo mmbo ikee sha nnara wa Davidi, Ukeensongosye weesuruma fisha, Na ngawo kyiku kyimwi tikanunutwa-fo, Toose tikava ta vandu va ngala

⁵Mavee yafo mmbo akee sha maasa a sunu, Ashiiswaa fivarony fya liilyi

⁶Mmbo shikaa ifumbuny lya mane-mane, Na lya ubani kutani kwakya ngama nraasi Na kyeende saa kiparikye.

⁷Lola shaasa kukee nsha-te nkunde wakwa, Yewe nkutiri teve tara-fo.

⁸Osho tindi yakwa ya wallyi lukummbwe Lebanoni, Yewe na yeny lulakani Lebanoni. Oloka kuuka urorony lwa ifumbu lya Amana, Uka urorony lwa Seniri na Hermoni, Uka mbangeny ya miiso, Uka ifumbuny lya nyamandu.

⁹Mmbo kwamfurisa nrima wakwa, mfwama-akwa tindi ya walyi, Nkwashifurisa nrima wakwa elyi kwashilola lyimwi-nsi, Na lyingyi-da kimaruma kya nse yeto wafo singony.

¹⁰Mfwama wakwa tindi ya walyi; Ikunda lyafo mmbo lyirolaa kyuumu, Mmbo lyisennyi ngota mfinyu, Mfwaamu wa mafura afo mesha mmbo eelannyi kindo kyingyi kyoose.

¹¹Firomu fyafo mfyashoshota ukyi, yee tindi ya walyi lwakwa, Ulumi lwafo mmbo lutiri ukyi na malela. Mfwaamu nsha wa soori tafo nsha va Lebanoni.

¹²Mfwama wakwa, yee tindi ya walyi, Ni nnda ukusurummyi ni nnda nshope, Ni usoka kulaore lulempaanwa.

¹³Maa tafo ni nnda wa ndunda shirenderi tivaramaa, Amwi na ndunda shisha ngota tingyi toose, ina na nardo.

¹⁴Nardo na safarani, surumuta na ndalasini, mane-mane na udi, Na fimu fingyi fitiri mfwaamu nsha.

¹⁵Mmbo kukee usoka lwa nnda, Kirori kya mura utiri muu, Soko tisheeta mura uka kulya Lebanoni Nndu nka

¹⁶Ona-te yewe uraato lwa taari ya ndoo, Osho-te, yewe uraato lwa taari ya sinde; Oneny kya nnda wakwa, Iishureny ngina mfaamu nsha wa mafura akwe. Nkunde wakwa akusheye nndeny mmbwakwe, Alye ndunda takwe tisha ngota tingyi toose.