Read BIBILLYA Mareiyo Meele a Iruva KYIIMBO KYA FIIMBO 7 Bible Online

KYIIMBO KYA FIIMBO 7 - BIBILLYA Mareiyo Meele a Iruva bible

KYIIMBO KYA FIIMBO 7

¹Nndu nsoro Ngyayo tafo yefo fyaaruny mmbo tasennya kilanya! Yewe kimwana kya kyika kya kimangyi. Finama fyafo filenderi fyikuringitye sha ngo ya wuuru uniini, Mashora mesha marunde nnyimfuru nsaari.

²Kyipoposho kyafo nsha nakori ilaturaa mfinyu tara. Ndeu yafo nsha nkusha wa nganu Ukee nringitye fivaro fya liilyi mbai.

³Mavee afo nsha maasa a sunu, Mmbo akee sha saria ivii.

⁴Singo yafo nsha uroro lwa mbembe ta shofu, Miso afo nsha maruva muriny mbwa Heshboni, Kufii na ngiri ya Bet-rabi. Mmbwa yafo nsha uroro lwa Lebanoni, Ulollye taari ya muri wa Damasko.

⁵Nrwe wafo mmbo ukee ikwiitikisa sha ifumbu lya Karmeli Fii tafo ta ukoka mmbo tikee ivarama nnu, Usha lwafo mmbo lweedima ilyisa ukiva naakwa ni mangyi.

⁶Lola shaasa kukee nsha na wa ilanga, Yewe nkunde wakwa kusennyi-dwa.

⁷Yuumba lyafo mmbo lyasennya sha nri wa tende, Mavee afo akaoroka sha mikelesha ya vayo.

⁸Shaamba mmbo nseraa ntende ndeaya mikelesha ya vayo. Yeny mmbo shilollye mavee afo sha misabibu miviiri, Elyi kweeng'a mmbo kikeesha mfwaamu nsha sha inanasi;

⁹Na kana kafo mmbo kyikee sha mfinyu urolaa. Nndu nka Naasa mfinyu usurumwa kutani nkunde wakwa, Aukooya naune, wiire firomuny fyakwe na mayoony akwe.

¹⁰Yeny mbwakwe nkunde wakwa, Na lango yakwe ni yeny.

¹¹Osho yewe nkunde wakwa, lweende mareminy, N-nde kyeeru lundeevera efo kyaarony.

¹²Mmbo lukwiipoo nraasi lweende mareminy a misabibu, Lundelola kwakooya yampara maa, Na kwakooya fivaro fya misabibu fyammbaa, Na efo mfo shindekuniinngyaa ikunda lyakwa.

¹³Mfaamu nsha wa matunguusha mmbo ukwaani wo ando, Kufii na mapoo a mmba yeeru mmbo kwiiyo ndunda shisha ta wo ngata, Nshilekudesya yewe nkunde wakwa.