Read BIBILLYA Mareiyo Meele a Iruva ISAYA 13 Bible Online

ISAYA 13 - BIBILLYA Mareiyo Meele a Iruva bible

ISAYA 13

¹Babilony yeengywa nrumi ni Isaya mwana wa Amosi yuuka kwa Iruva ishaamba:

²“Saamisa bendera uwe ya ifumbuu lyilatiri miri vaangeny vasikari kwa unyanga waasha, sinnyeny vandu kwa maako vaange ngiriny ya miri ya vandu vasuri.

³Yeny mmbwe shavavasa vasauwe vakwa, shavaanga masiingo vakwa, yewo vashiinndya na ishirumisha vashinutya yekyo nyashi yakwa ikunndye.”

⁴Arannyiny kyoorongye mafumbuu, kyoorongye kya itorito iniini lya vandu! Arannyiny kyoorongye kya vamangyi na masanga akeekusangirya! Nndumi Iruva wa matorito, mmbo akeedeesya itorito lyikeyeenda fireny.

⁵Mmbo vakeesha wooka ngyurukeny ta kwaasha, wooka mbai ya ulana, Nndumi Iruva na fisha fyakwe mmbo akeeshemamita ulana.

⁶Kapeny kyiiyo mashika nkonu wa Nndumi Iruva ni kufii ukai, mmbo ukeesha ngapo yuuka kwa Nndumi Iruva atiri finya.

⁷Maako a wo nndu mmbo avaa nsele-sele, na wo nndu mmbo afwaa nrima.

⁸Vandu mmbo vasavaa, vatirwa ni usau na mavavio, vatirwa ni mavavio sha nka alyiwaa ni usu lwa mwana woose vatirwa ni nyinyira fisangu fyawo fiisshwe usutu.

⁹Nkonu wa Nndumi Iruva ukeesha nkonu nkasha wa nyashi shikasha ya Nndumi Iruva ishaallwa uruka luve urumato ishemamita valyamari vakwa.

¹⁰Nyinyiri na firongosi fyoose fya nginiiu mmbo tirumikaa, nkyeere wiifumaa mmbo uva ireema, kyimwi na mwiiri nato mmbo uvaa ireema.

¹¹Nndumi Iruva mmbo aamba indi: “Mmbo nshoolota ngapo ulaniny kya makasha awo, vakasha kyimaruma kya ulyamari lwawo. Umbafu na ukushobi mmbo fimandaa; na iwunndwa waafinya lwa vandu mbafu.

¹²Mmbo nshanguraa vandu kilanya ya saabu shisangye. Vandu mmbo vashaangwa ngota saabu ya Ofiri.

¹³Mmbo shiringisaa nginiiu, nalo uruka lusinge-singe yefo misukeny yavayo kimaruma kya nyashi yakwa shinyaasi nkonu yeto.”

¹⁴Sha kinamburi kyikeerisshwa sha moonri alatiri mwiisi, wo umwi ashekulungaa na vandu vakwe, wo nndu mmbo asherishya na urukeny lwakwe.

¹⁵Yeto moose ashelollywa mmbo ashedoshwa ndeu, yeto ashetirwa mmbo ashewaawa na usu.

¹⁶Vana vawo vadu mmbo vashekakashwa mbee ya usanguny lwawo, vasokwa mmba tawo na vaka vawo vaafinywa.

¹⁷Mmbo shikevaatya muro Vaademi, vandu valasarye fesa, nta valalangye saabu.

¹⁸Mife yaawo mmbo ishaasa vakoo, valatiraa isarya kya vana nta ilyillya vakoku.

¹⁹Babilony itumbe lya mangyi toose na imanyika kwa irina lying'ani lya Vakaldayo, mmbo kushevakaa Sodoma na Komora, kyeeri yemamitwa ni Nndumi Iruva.

²⁰Nkushekaa kukaywa lyingyi ni vandu-fo, ngyeeri na ngyeeri nkushekaywa ni vandu-fo. Yefo nkwiifo Mwaarabu ashereiyaa-fo yeema lyakwe-fo nta mwiisi ashikooya yiisa-fo findo fyakwe-fo.

²¹Ando a vayo ni mafisi a ngoroshony manyaasi, mafururu mmbo ashesshwa yefo mmba yeto, nyaa na majini mfo kundo ashetarannya.

²²Mafite a ngoroshony mmbo ashoongoraa efo turuveny takwe, maparwe mmbo ashelollywa yefo mmba tawo teetalauwa ndeu. Kyeeri kya Babilony kyamfika kufii isha kuleefo nkonu ushengerwaa.