Read BIBILLYA Mareiyo Meele a Iruva ISAYA 14 Bible Online

ISAYA 14 - BIBILLYA Mareiyo Meele a Iruva bible

ISAYA 14

¹Nndumi Iruva ashevalyilya-se vandu va Yakobo ashesauwa-se Israeli. Ashevaviira lyingyi kulya urukeny lwawo veni. Na veny vashesha ikaa amwi na vandu va Yakobo.

²Vandu va masanga mmbo vasheekya vandu va Israeli iwuya kulya urukeny vakee vaniinge ni Nndumi Iruva. Nalyo mmbo vasherunndya Vaisraeli sha mashinga valya vetirwa mifugwa, ulaalu mmbo vakee vatire ni Vaisraeli vavashillye valya vevalama.

³Kyeeri Nndumi Iruva ammuniinga kyiimuyo yeni vandu va Israeli; kamuuta efo ushingeny kundo mweeke ilyiswa ukyiva na irunda mashora moomu.

⁴Llyo musheemba kyiimbo ekyi kyeetatala mangyi ya Babilony, mwiishaamba, “Lola! Mbafu ilya yantulwa! Ikurosa lyakwe lyamanda!

⁵Nndumi Iruva ammbalyimba finya veetana makasha, amfisha mbiiri ya kimangyi ya ushilyi.

⁶Ilya valekapa nayo vandu kwa ngoo kuleefo imanda, na ivashillya kwa wiitiki kuleefo ivalyillya.

⁷Urukeny koose ulaalu mmbo kwiifo urilalyi, wo nndu mmbo akeimba kwa ifura.

⁸Misonobari mmbo ikeefura kumma ituulwa-si, na meeresi ya Lebanoni mmbo ikeyaamba, ‘Kimmba kwamma ituulwa-si, nkukifwa-se mwiituula miri ashelubaana-fo!’

⁹Kwa varumu nafo, vakakwiipo ishekwaammbya kyeeri kusheshaa, naambo vasheanta varumu vashekwiidikira. Na valya woose vakee vasongoru va ulaniny, vashevaanta wooka fitiminy fyawo fya ushilyi valya vakee vamangyi va masanga.

¹⁰Nawo woose mmbo vashekuviaa; ‘Neewe kwammba mfwafwa sha yese, kwavakyana na yese luveni.’

¹¹Utore lwafo lwammolotwa kwa varumu, fiimbo amwi na fishengele fyafo, makoosho sumbai mmbu kitara kyafo, na makuru akava mmbu isullya lya ikusikya!

¹²Ni ngata ingai kuletuulwa-si uka iruveeu yewe kwekee nyinyiri imikaa ya nraasi, ni ngata-kyi kuletuulwa sumbai, yewe kuletuula masanga sumbai?

¹³Yewe mmbo kulekwaambaya yefo nriminy wafo, Mmbo shisaama shifike iruveeu shindevika-fo kitima kyakwa uwe ya nyinyri ta Iruva, Shindekaa uwe ya ifumbuu kundo vakwaanannya maruva a wongo, efo taari ya ndoo.

¹⁴Shisaame shiire uwe ya mafishi, shikwallwe shive kyimwi sha Iruva muni finya.

¹⁵Indi kwapirimitwa fika kwa varumu, koolotwa irininy kwaasha nnu.

¹⁶Yewo, Vakulollyaa mmbo vakukunnyaa misa, vating'wa deny neyaamba, ‘Nshi yeu ulya ereremisa ulana, isingisa ngyumangyi?

¹⁷Kaallwa ulana kasa koomu, kamamita miri ya-vayo, keema yewo vakee kifingyony valawuye kwawo.

¹⁸Vamangyi woose va masanga mmbalele itumbeny, wo umwi kyifuny kyakwe.’

¹⁹Vamangyi va masanga woose mmbo vakee varike kwa yiindywa wo umwi kifuny kyakwe. Indi yewe mmbo kukeerwa kwaasha na kifu kyafo kwava sha mwana alewonika mfu avavaa nnying'a wafo ukakakashwa-kakashwa, ukeekyerywa miinying'a ilewaawa ni ufu, vakeerwa marininy kundo kutiri mawe.

²⁰Lyo yewe mmbo kurikwaa kyimwi shawo, mashika mmbo kulelyamara uruka lwafo kwawaa vandu vafo, yewe na va mmba ya vakasha varekyeke kushu.

²¹Kudeesyeny iywaa vana vakwe kyimaruma kya makasha a vande-ye valasheengereka na ishillya uruka, na yiishura ulana miri yaawo.”

²²Nndumi Iruva wa matorito aamba, “Mmbo shiukapa fira muri wa Babilony, shiumamite kushu, shilyamare wo kindo, vana na fyoose filesaa-fo na muu. Ni yeny Nndumi Iruva shaamba.

²³Mmbo shisheallwa usheva kundo kwa sasa na marrwa a mura shisheuvivya kwaasha na usaasi lwa urumato. Ni yeny Nndumi Iruva wa matorito shaamba.”

²⁴Nndumi Iruva wa matorito mmbo alyisyaa mboo kaamba, “Ekyo shikyivika urambeny, niindo kisheevaa ekyo shikyivikye nriminy niindo kishetanyika.

²⁵Mmbo shishewunndwa wiidimi lwa Vaashuru, urukeny lwakwa. Shivakakashe kunu mafumbuu akwa, shishetarama vandu vakwa ushinga luvatiri na mario awo moose,

²⁶llu llo ufishony lwa mbony ta Nndumi Iruva, tikwaani na ulana loose. Nnyo ngapo asheengye vandu va masanga moose.

²⁷Kwakooya Nndumi Iruva wa matorito anrummbwa indo, mmbovi ashiidimaa yaalasha? Kwakooya anrummbwa shila ikapa ulana loose mmbovi ashiidimaa imwiinduta?”

²⁸Yei nnyo mbony yesha kyeeri mangyi Akasi efwa:

²⁹Yeni Vafilisti mulashekushela, sheelyi mbiiri ilekapa Vaashuru yamfika mashika shoka shifoo ikafwa mmbo iwonika ingyi shivaave mmwasi na shoka itiri suumu mmbo iwona ishiko lyirumbukaa.

³⁰Vana vavee va vaturi mmbo shivawutisaa na ngwera mmbo nshevashukuraa. Indi ngyeeri yaany mmbo vawaawa nshaa na yeto moose asheturunyaa mmbo awaawaa.

³¹Kapa weele yewe ngiri, fiira yewe muri. Eka sha muuya kya weeresi, yewe uruka lwa Vafilisti, mashika ifishi lya matorito lyikeesha lyuuka na taari ya ndoo, nta kuleefo ikyeeywa nnang'ani a matorito akwe.

³²A mmbo vasheniingwa kirouwa-ki yewo vasheshaa wooka Filistia? Mmbo vashevywaa; Nndumi Iruva aniingaa Sioni turuve itiri finya na vandu ngwera vakwe mmfo kundo vasherishyaa.