Read BIBILLYA Mareiyo Meele a Iruva ISAYA 15 Bible Online

ISAYA 15 - BIBILLYA Mareiyo Meele a Iruva bible

ISAYA 15

¹Yei nnyo nrumi yesheya Moabu: Muri wa Ari urukeny lwa Moabu mmbo ulelyamarwa kio ekyi amwi na muri wa Kiri. Moabu ni kiiyo na ifiira.

²Vandu va Diboni mmbo vammalukya mmbeeu wa mmba ya iterevya indekapa kyiiyo; vandu va Moabu mmbo vakeiya kimaruma kya Nebo na Medaba vakoota fii tawo na nguyo shoose veekapa kiiyo.

³Vandu mmbakeeyiira shia veere ngosha ta makunnya, vengyi vakee uwe ya mmba na mbateny ta muri vefiiraa neekapa kiiyo.

⁴Vandu va Heshboni na Eleale mmbo vakeefiira kutani unyanga lwafika kwa vandu va Yahasi. Naakwa ni vasikari va Moabu mmbo vakeefiira nnu na isiiywa ni finya.

⁵Nrima wakwa mmbo wansokywa mfyoova kya muri wa Moabu. Veerishiswa vanrishya muriny wa Soar na Eklat-shelishiya. Vengyi vakalatya shia ya Luhiti veefiira valelatya shia isheenda Horonaimu veekapa kiiyo kya urumato.

⁶Usoka lwa Nimrimu lwammumya, mare moomu na mavisi moose akooma kulakaa kummye-u kindo.

⁷Vandu mmbo vakeekillya usoka lwa Mierebi veerye milaa yaawo myoose eyo vemmiiluula na kindo veevikye kiraambu kyawo.

⁸Kiiyo kyikakwaana urukeny koose Moabu, fiiyo fyawo fikakwaana Eklaimu na Beer-elimu.

⁹Mura wa Diboni wammiishwa samu nta nkyilleva kyindo-fo. Iruva mmbo akeengera kiiyo Diboni. Ewo vasaaye-fo na muu mmbo akeevarikya miiso tishevakomba kombi.