Read BIBILLYA Mareiyo Meele a Iruva ISAYA 17 Bible Online

ISAYA 17 - BIBILLYA Mareiyo Meele a Iruva bible

ISAYA 17

¹Nndumi Iruva aamba: “Damasko nkukyivaa lyingyi muri-fo, mmbo kushevaa mbillya ya marama.

²Miri yakwe mmbo ishevaa marama llung'anu, mmbo kushevaa kundo kweyiisa findo na mafisi a ngoroshony, nta kuleefo nndu avaerese.

³Turuve ta Efraim mmbo tishemamikaa na umangyi lwa Demaski lushemanda. Vashuru vashesaa-fo mmbo vashiipalwaa kyimwi sha va mmba ya Israeli. Ni yeny Nndumi Iruva wa matorito shaamba.”

⁴Nndumi Iruva aamba, “Itumbe lya Yakobo mmarama llung'anu lyishetuulwa na umasi lwa vayo lusheva nguya.

⁵Mmbo ashevakaa nrema yooluulwa, ashetannyo sha nndu n-du mwiyuulula fimu imungony lya Refaimu.

⁶Mmbo vashesaariswa-fo vaangu deny, sheelyi nndu ayaya seituni, seituni ivii, isaru ta iramba lya uwe, yiinya isaanu ta maramba a nri yeu uvikye deny.” Ni yeny Nndumi Iruva, Iruva wa Israeli shaamba.

⁷Nkonu yeto mmbo vasheendukya Muumbi waawo na miso awo ashelolaa mweele yeto waawo Israeli.

⁸Mmbakiinndya lyingyi fitara efyo fya irasya fikee fisongosye kwa maako awo-fo. Nta ivika nsia mashora yoo a maako awo meni, a isongosya mafwanu a maruva a Ashera na fitara fya ifwallya ubani.

⁹Nkonu yeto miri yaawo ilya ikee miikare kisha, mmbo irewa marama sha ilya ya Vahifi na Vaamori, ilya veesama kyeeri vekeerisha vana va Israeli. Wo kindo kyikalyamarika.

¹⁰Mashika yewe Israeli mmbo kulerekywa Iruva wafo ulya alekutarama kakukyira. Kwarekkywa turuve ya muu wafo. Kweekyo kwavaaya mafwanu a Baali, neewe kwaivika wakfu kwa maruva a veny,

¹¹na kwakooya kwaidima iivaakya imye na ing'ana nkonu yeto mweni na yuute fivaro nkonu yeto mweni, fimu fyany mmbo fisarummya nkonu yeto wa nsindara na mavavyo alashiaa.

¹²Apaa irunduma lya vandu veengyi! Vakeerunduma sha yeeve. Apaa yoona lya vandu va masanga! Unyanga sha lwa mura mwiingyi.

¹³Masanga akeerunduma sha irunduma lya mura mwiingi, indi Iruva mmbo asheakyeemyaa arishye kwaasha. Mmbo uvivitwa sha muulu ni uraato fika mafumbuu. Sha kiluulyi kikeevivitwa ni uraato lwa kitita-si.

¹⁴Kyeeri kya nkwaany kyikelweenngye weeresi lung'ani, indi kulaore kwankya lwammairumika! Ekyo nkyo kyishevakooya valya vakee lwiivya na ilusoka masaa eru.