Read BIBILLYA Mareiyo Meele a Iruva ISAYA 18 Bible Online

ISAYA 18 - BIBILLYA Mareiyo Meele a Iruva bible

ISAYA 18

¹Woshiny lwa uruka lwiisshwe kivivita kya maaru, uruka lukee kwakulya ya uruka lwa Esopia,

²Yanruma vandu vakeeyiira mureny wa Naili Veesaamye ngalava ta makongye, endeny yeni vandu vaantu kwa isanga elyi lyitiri masiingo a vandu vaasha, vamamiri, vatiri finya. Vandu yewo mmbo vaereiyo wo ando na uruka lwawo mmbo lwaavywa ni mura.

³Arannyiny, yeni vandu woose mukaa kunu urukeny, Aranyiny kyeeri tarumbeta ishekapwaa!

⁴Mashika Nndumi Iruva ashivia indi, “Kuuka uwe kyeny kwakwa, mmbo shilelola yefi fikeeyuutika, shiimalallye sha nndu akeeyarannya nrikye wa mwi sha ifishi lya laura kyeeri kya fimu.

⁵Mashika kulaore fyeeri fya fimu ivaa fyammisya na fivaro fyammaangara na sabibu tammbira, Iruva mmbo avyaa maramba kwa kyaandu na yuuta-fo maramba alya akwaallye.

⁶Moose mmbo areeywa ndeye ta mafumbuu, na mafisi engyi a ngoroshony. Ndeye na mamutony mfo kundo vakaa kyeeri kya mwi na mafisi a ngoroshony asheallwa-fo kundo kwawo kweekaa kyeeri kya kisie.”

⁷Kyeeri ekyo, Nndumi Iruva wa matorito mmbo asheengywa firaso fyuuka kwa vandu vaasha vamamiri, vandu veeresye va kwaasha na kufii ulaniny koose, isanga lyitiri masiingo a vandu uruka lwawo lwaavywa ni mira. Mmbo asheenngyoo firaso efyo kulya ifumbuu lya Sioni yefo akeyiinndywa, we Nndumi Iruva wa matorito.