Read BIBILLYA Mareiyo Meele a Iruva ISAYA 19 Bible Online

ISAYA 19 - BIBILLYA Mareiyo Meele a Iruva bible

ISAYA 19

¹Yei nnyo nrumi yesheya Misri: Lola! Nndumi Iruva akeesha Misri eesammye ifishi lyisheenda nnu. Mafwanu a maruva a Vamisri arerema mbee yakwe. Na vandu va Misri mmbo vashevaa nsele-sele.

²Nndumi Iruva mmbo aamba indi: “Nshivasuyaa fira, vaniini vakapani veni kwa veni, nndu na mwana-maaye, nndu na amurasa wakwe. Muri na muri ungyi. Mangyi akapani na mangyi ungyi.

³Mmbo shisokaa Vamisri wiidimi na finya vatiri shinyanyate makusaro awo mesha. Vanderuuya makusaro kwa mafwanu na kwa varumu, vasavi veelafya na mimuyo mikasha.

⁴Mmbo shirambikya Vamisri maakony a vandu mbafu, mangyi nnyaasi ashevashillya, ni yeny Nndumi Iruva wa matorito shaamba.”

⁵Mura wa Naili mmbo ushuumiswaa nato wuumi kara.

⁶Mifongo yawo mmbo isheende kiraa ngata isheengeraa yuumya. Mare moomu na makongye a vayo mmbo amamika.

⁷Shoonga tikeshivaaye yefo mbai ya Naili shoose mmbo tishuumaa nato tiveevivywa kwaasha ni uraato.

⁸Veereiya makunga mmbo vaiyaa na ifiira na ewo veereiya na ndoanu mmbo vaffwa na veereiya va wo ngata woose mmbo vafwaa nrima.

⁹Vefuma soori ta kitani woose mmbo vashuuta-pa; woose mmbo vaffwa nrima.

¹⁰Veefuma soori mmbo veepalwaa na veekyi vawo mmbo vating'wa.

¹¹Vasongoru va muri wa Soani mmbarung'ani neewo vakee ngyama ta Farao mmasembo! Nkishiidimika inda wo nndu ivia Farao, yeny mmbo shekee mwana wa nndu nndango; wa ufyari lwa mangyi elyo mbee?

¹²Nkwi ulaalu vandu vafo varango vakai? Vavaangeny na ikumanyisya kindo Nndumi Iruva akusarye kya matorito a Misri?

¹³Indi vandu va Soani mmbarung'ani, vasongoru va Memfis vallembwa, yewo veni uruka, vareta vandu va Misri.

¹⁴Nndumi Iruva ammbanyanyata vakareta shia Vamisri woose. Vakava sha nndu ananngwa mmbwari akeesinga-singa efo eraakaa.

¹⁵Nkwiifo nndu wa tokyi moose urukeny lwa Misri, ave nsongoru ao nndu wa mwiina ashiidimaa itana kindo kyoose-fo.

¹⁶Nkonu yeto vandu va Misri mmbo vashekaa varereme sha vaka. Mmbo vashererema na yeereya nnu kyeeri vashelollya Nndumi Iruva eevaipoyo woko lwa ngapo.

¹⁷Vandu va Misri mmbo vasheereya nnu vandu va Yuda kyeeri vashiita ekyo Nndumi Iruva wa Matorito akunndye ivatannya.

¹⁸Elyi nkonu yeto ushefikaa kishomu kya Vaebrania mmbo kisherewaa miriny iraanu ya Misri na vandu nkonu yeto mmbo vashevikaa kyaasa kwa irina lya Nndumi Iruva munifinya. Na umwi ya miri eyo ishevaangwa Muri wa Mwi.

¹⁹Nkonu yeto kushevaa-fo kitara kya irasya efo urukeny lwa Misri, kushesaleesa ngo ikeeshivike wakfu kwa Iruva efo minyanuny ya Vamisri.

²⁰Isheva kiringisyo na ukireekyi kwa Nndumi Iruva wa matorito efo urukeny lwa Misri naambo kyeeri vafuuya Nndumi Iruva kya vakiduva vawo avatarami na ivarikya mweekyi.

²¹Nndumi Iruva llyo ashekoora kwa Vamisri nawo vashemwiirikya, neemwiinndya veshuuta firaso fyeekora na muro, numa vasheutya Nndumi kyaasa kilashaalashika.

²²Nndumi Iruva mmbo avarikya ngapo, neevakira nawo ni kuti vafuuye Iruva nawe ashevaarannya neevafwaaya.

²³Kyeeri ekyo kushevaa-fo shia isheendaa Ashuru yuuka Misri na yuuka Misri indefika Ashuru. Nawo Vamisri na Vashuru mmbo vashekaa mmba imwi ya Iruva ya iterevya.

²⁴Kyeeri ekyo, Vaisraeli, Vamisri na Vashuru mmbo vashekaa vaekyennywa ando amwi, nawo masanga yaa araru vamwi mmbo ashevaa mbora ya urukeny.

²⁵Nndumi Iruva wa matorito mmbo alevavikya mbora ashaamba, “Vikkyweny mbora Misri vandu vakwa na Vaashuru mashora a maako akwa neewe Israeli mwiyading'u yakwa.”