Read BIBILLYA Mareiyo Meele a Iruva ISAYA 20 Bible Online

ISAYA 20 - BIBILLYA Mareiyo Meele a Iruva bible

ISAYA 20

¹Sargony mangyi ya Ashuru mmbo eruma nsongoru wakwe nniini wa itorito lya Ashuru indekapa muri wa Ashdodi na iutira.

²Myaaka iraru ilemisya ukya kyeeri Nndumi Iruva erera na Isaya mwana wa Amosi kammbya, “Uta-fo soori yeyo ya ikunnya kukufigye kisiny, na fyaaru marendeny nyafo, ‘Nawe keerikya koota-fo soori takwe na fyaaru keenda mbereto.’”

³Kyeeri Ashdodi yetirwa, Nndumi Iruva mmbo aamba, “Ishinga lyakwa Isaya, mmbo akeenda mbereto alaree soori nta fyaaru ando a myaaka iraru ileera. Ekyi nkyo kindo kyishetanyika urukeny lwa Misri na Esopia.

⁴Nsongoru wa itorito wa Ashuru, mmbo ashesongoya mifungwa vakwe mbereto alaree soori wooka efo ngyurukeny tilya ivii. Vamiku na vakoo mmbo vasheendaa valaree fyaaru nta soori na fisaa fyaruu vasheengye vandu va Misri usutu.

⁵Valya woose veevikye Esopia nsia na ikushobya Misri mmbo vashelollya usutu na ikurya.

⁶Elyi kyeeri ekyo kishefikyaa, vandu woose vafiitani na yeeve lya Filistia mmbo vashaambaa, ‘Loleny kindo kileutika kulya kwa vandu valya lweevavikye nsia, sheelyi vashiidimaa ilweekya isika Nsongoru wa Itorito wa Ashuru! Ulaalu mmbo lukkyaa kyikwi?’”