Read BIBILLYA Mareiyo Meele a Iruva ISAYA 21 Bible Online

ISAYA 21 - BIBILLYA Mareiyo Meele a Iruva bible

ISAYA 21

¹Yei nnyo nrumi yesheya Babilony: Sha kitita-si uraato lutiri finya mmbo lukeesha luuka uruka lutiri weeresi taari ya kasa koomu, mmbo lurye urumato lweeresye urukeny.

²Mmbo shammoorwa shalollya findo fyeeresye, shalollya vandu vawai, vandu veemamita, saaminy efo uwe yeni Vaelemi, kapeny yeni Vaamedi! Iruva mmbo ashemukapannyaa na ngabo muleenngywa ni Vababiloni toose mmbo tishesyaa.

³Filya shelollya na yiita kulya mooreny alya mmbo kyansheenngye weresi na ivavywa iniini, sha usu lwa nka awonaa mwana, mavavywa akeengyifwa kutani shalemwa yiita, shasavaa kutani shalemwa ilola.

⁴Ngoo mmbo ikeefuluka-fuluka na weerei lukeengereka, mmbo shekeetereva nkonu wiile, kufike nkwaany indi wiikifika makusaro akashirovya mmwasi.

⁵Shoonga temmaa ideesywa miseny, vandu mmbo vakeelya neena. Pari-parii! Unyanga lukasha lushaamba, Kwiipony yeni vasongoru va uruka! Kamareny fisha fyany!

⁶Mashika Nndumi mmbo eshivia, “Enda kwavika mwiilala shoovi ekyo alollyaa nakabe weele.

⁷Kyeeri ashelollyaa veesama frasi mapaleny, veesama ngamula na mishungu nakabe weele na lyimwi.”

⁸Naasa mwiiringa koonisa unyanga kaamba, “Nndumi wakwa, mmbo shesinda nkonu piti na kyio tara-raa shiiringaa.”

⁹Alyo itorito va fira vakeesha veesaamye frasi mapaleny, veshaamba, “Babilony, kwantuulwa, mafwanu moose a maruva a wongo antuulwa-si neefishwa-fishwa.”

¹⁰Yewe Israeli vandu vakwa, eni mwansewa sha nndu ashuulula nganu. Mmbo shikeemuvya mbony shileeta tuuka kwa Nndumi Iruva wa matorito, Iruva wa Israeli.

¹¹Yei nnyo nrumi yesheya Edomu. Mbony yei mmbo yesheya Edomu, shiitye nndu avaanga ooka Seiri kaamba, “Yewe, mmbony-kyi ta kio ekyi? Mmbony-ki tiifo kio ekyi?”

¹²Neeny shanndouwa shammbya, “Ngama ikeesha kio nakyo kyikesha, indi kwankunda ivesa enda kwasha lyingi.”

¹³Yei nnyo mbony yesheya Arabia ishaamba: Eni matorito a Dedani, reiyeny ulale kio ekyi kunu kasa koomu ka Arabia.

¹⁴Eni vandu va uruka lwa Tema, niingeny vandu mura weena yeva vatirwa ni kyaakuka, varrwaaye shoonga veerishiswa yewo.

¹⁵Mashika mmbo vakeerisha ngyusu na mife tammaa isomuwa shombony na ngyura ta mife ikee minnwe yeekapana.

¹⁶Mashika Nndumi Iruva mmbo aleshivia indi, “Ando a mwaaka umwi kuleefo ikillya itumbe lya Kedari mmbo lyifikaa ufishony.

¹⁷Veekapa mife vaangu nnang'ani ya masiingo a vandu va Kedari mmbu vasaa-fo. Ni yeny Nndumi Iruva, Iruva wa Israeli shaamba.”