Read BIBILLYA Mareiyo Meele a Iruva ISAYA 22 Bible Online

ISAYA 22 - BIBILLYA Mareiyo Meele a Iruva bible

ISAYA 22

¹Yei nnyo mbony ya Iruva yesha imungony lya Usukuyo; ishaamba, Mmbo kyava inda vandu va Yerusalemu woose mukasaama mmbee-u wa mmba?

²A mindoro nnyeekyi muri moose vakeefura? Vandu vany woose, mmbo valefwa, mmbalefiiya fireny, nta mmbalefwa veekapana-fo.

³Vaniini vany woose, mmbo verisha kulaore nta vammeera mfe umwi. Vandu vafo woose valekooywa-fo, mmbo vetirwa mifungwa. Lla na kulya vemma irishya kwaasha.

⁴Nkyo kimaruma shikeemuvia, shireny shiiye misoru a mavavywa a vandu vakwa mulakwaatare ishiviiryamuu kyimaruma kya vandu vakwa-fo.

⁵Mashika inu Nndumi Iruva wa matorito mmbo alweengye usau, lukanyanyaka na ivingwa kunu Imungony lya Usukuyo. Masimamba a miri amfishwa-fishwa, fyooronngye fya vandu mmbo fikeitewa fika mafumbuu.

⁶Matorito a Elamu mmbo eerye ngyura na mife wokony, mmbo vesha veesamye frasi na makari a fira; indi nalyo itorito lya Kiri mmbo lyetiri fisha fyawo wokony.

⁷Yewe Yerusalemu mamungo alya afo mesha, mmbo eeshwe makari/mitika a fira na frasi, vesaama frasi veesalelyi mwaangony wa turuve yafo.

⁸Uringyi lwany lulewunnduka. Nkonu ulya mmbo mwenderuuya fisha fyeesurumyi kulya mmba ya Nsiton.

⁹Mukalollya kundo masimamba a mmba ta Yerusalemu akunndye asongosyoo.

¹⁰Mukalola wo ando yefo mmba ta Yerusalemu na tingyi mukawunndwa naambo muute-fo mawe eesongosya masimamba a muri.

¹¹Mukatana irrwa lya mura nnang'ani a muri, naambo lyive irrwa lyeeletya mura ushuuka kulya irrweny lya kasha. Indi mmwesara kya nndu yeto erunda ishora elyo, nta yeto eniingya ikusaro lya mbee-fo.

¹²Nkonu yeto Nndumi Iruva wa matorito, mmbo ekunndye mukape kiiyo, neefira muute fii ta nrrwe neeraa soori ta makunnya.

¹³Indi yeni mmbo mwekeeseka na ikapa nndoro. Mukashisha ng'umbe na moonri, mukalya nyama neena wari. Eni mmbo mulaamba, “Ra! Llulye neena mashika ndesi mmbo lukeefwa.”

¹⁴Nndumi Iruva wa matorito karera neeny kashivia, Ni kya dede mmbasarywa kya ulyamari yelu-fo, mmbo vafwaa kuleefo isarywa. Ni yeny Nndumi Iruva wa matorito shaamba.

¹⁵Nndumi Iruva wa matorito, mmbo eshivia sheende kwa Shebna, mwiisalallya mmba ya kimangyi shindemmbya,

¹⁶“Mmbo kutiri usumanu-ki ikaa kunu kukai? Ao kwiifo nndu kukwaani nawe kunu, kutani kwashesummya kifu kunu mbangeny uwe ifumbuu?

¹⁷Nndumi Iruva mmbo akweryaa kwaasha kwa finya.

¹⁸Yewe nndu kutiri finya mmbo akwiipoo uwe sha mpira nakweerye urukeny lung'ani mmwasi. Kundefiyya-fo na makari afo alya kweavikye nsia. Kuve usutu kwa mmba ya Nndumi wafo.

¹⁹Nndumi Iruva mmbo ashekoolota-si, kuuka uwe yoo ando kukai.”

²⁰Nndumi Iruva kavia Shebna, “Elyi nkonu yeto ushefikaa, mmbo nsherumaa ishinga lyakwa Eliakimu mwana wa Hilkia.

²¹Shishemmbika isara lyafo lya umangyi, shishemfinga nkanda wafo, shisheniinga ushilyi loose llwa kweetiri nave mangyi ya vandu va Yerusalemu, Israeli na Yuda.

²²Shishenniinga wiidimi loose lwa mmba ya Davidi, kamfinga kuleefo nndu ashiidimaa iporomwa, kaporomwa kuleefo nndu ashiidimaa ifinga.

²³Eliakimu mmbo shinniinga finya sha isinde iniini lyikee ifinngye ando asheiindywa vandu woose va mmba ya ufyari lwa vakuu vakwe.

²⁴Vanndu woose va mmba yakwe vadu na vaniini mmbo vashenkusiraa-we kyimwi sha fideeva na saani tikeeshifinngye ando amwi kutiri finya.”

²⁵Indi nkonu umwi fishevanukaa-u alya ando fikeefifinngye. Ni Nndumi Iruva aamba.