Read BIBILLYA Mareiyo Meele a Iruva ISAYA 23 Bible Online

ISAYA 23 - BIBILLYA Mareiyo Meele a Iruva bible

ISAYA 23

¹Yei nnyo mbony yesheya Tiro yuuka kwa Iruva, ishaamba; Kapeny kiiyo yeni varundi va ngalava ta Tarashishi mukee yefo kwaasha, mashika muri wany wa Tiro wallyamarwa, nkukyiifo kundo kweekaa nta mmba-fo. Mbony yeto mmbo mushetimanya kyeeri muwuyaa muuka Kipro.

²Malallyeny-sau eni vandu va mbaa-mbaa ya yeeve, yee malallyeny eni veekapa mbusha va Sidoni.

³Muleruma vandu vany vakeera uwe ya yeeve, yuura neekumba nganu ta Misri, mukeedima ikaba mbusha na vandu va masanga moose.

⁴Yewe Sidoni, Suka muri na turuve mbaa-mbaa ya yeeve. Yeeve sheni mmbo yaamba, “Nshilevavywa ni usu lwa mwana-fo nta shindekooye yoota mwana wa kyen ao wa womi-fo.”

⁵Elyi mbony tindefikaa Misri, sheelyi Tiro yallyamarwa, mmbo vavavywa nnu deny neesiiywa ni finya.

⁶Kapeny kiiyo yeni vandu va Foinike, kwiipony mukarishya Tarshishi.

⁷Ayeu nto muri ulya wa Tiro, muri ukee ntani myaaka ifye indo, muri woota vandu vakandetira marema ngyurukeny ta kwaasha?

⁸A mmbi aletannya Tiro mbony yei, muri ulesaalesa vamangyi, veekaba mbusha vaniini vakainndywa urukeny koose?

⁹Ni Nndumi Iruva wa matorito alevika uramba lwa mbony eyo. Naambo ukaidi na ukushobi lusye amwi neesuta vaniini yewo vawo.

¹⁰Ulaalu eni vandu va Tarshishi, reminy marema kunu urukeny lwany, mashika nkukiifo lyingyi bandari ishiidimaa iwarya meeli shiniini-fo.

¹¹Nndumi Iruva wa matorito mmbwe alemukabannya kwa finya yakwe, kaorwa woko lwakwe uwe ya yeeve, kawunndwa turuve na ushilyi lweifo kulya Kanaani.

¹²Yewe muri wa Sidoni, ifura lyany lyamfika ufishony, vandu vafo mmbo vakeesisywa; naakwa varishya Kipro mmbakyaa-fo.

¹³(Nshi Vakaldayo, nta Vaashuru valeotora mafisi a ngoroshony ishewunndwa muri wa Tiro-fo. Mmbo uleringitya muri kwa minara vakavaafinya marama.)

¹⁴Kapeny kiiyo eni meeli ta Tarshishi, mashika kulya mweevikye nsia kwammbunduwa.

¹⁵Kukeesha kyeeri muri wa Tiro usherekyeka ando a myaaka makumi mfungare, ekyo ni kyeeri kya ushilyi lwa mangyi. Elyi kyeeri ekyo kyishesyaa, Tiro mmbo ishevaa sha kyiimbo kya nka isonga,

¹⁶“Endeepoo kivale kyafo, kurunguke-runguke nakyo yefo muriny, yewe isonga kulenrekyeka, kwiimbe fiimbo fishoomwa vandu, fiimbo fiingyi naambo vaidimi ikukummbwa lyingyi.”

¹⁷Ando a myaaka eyo makumi mfungare, Nndumi Iruva mmbo ashewunndwa muri wa Tiro, nato ushewiiya utuusi lwavyo, vashetuusa na vandu va masanga a ulana loose.

¹⁸Fesa kushewonisaa-fo mmbo ishevikwa wakfu kwa Nndumi Iruva. Muri mmbushelollya mbusha-fo, indi vasheinndyaa Nndumi Iruva, wo mmbo vashuura nayo shoonga na soori ndesa vakunndye.