Read BIBILLYA Mareiyo Meele a Iruva ISAYA 3 Bible Online

ISAYA 3 - BIBILLYA Mareiyo Meele a Iruva bible

ISAYA 3

¹Ulaalu! Nndumi muni finya, Nndumi Iruva wa matorito, mmbo akeesheya Yerusalemu na Yuda ashekamara-fo wo kindo ekyo nndu eevikye nsia. Mmbo akeendevasoka shoonga tawo na mura wawo.

²Vandu masiingo na veekapa-fira vawo, valeti vawo na veawuya fisuku vawo, veelafya vawo neewo veevavikye nsia.

³Neewo vavavikye nsia vandu veekapa fira vasongoru, veesalallya uruka, na valya vengyi woose vakusarye mbony ta usavi.

⁴Nndumi Iruva mmbo asheniinngya muumu wa ishinllywa ni vana vadu,

⁵wo nndu mmbo ashetirya ungyi kyiila, valya vadu mmbo vashesela valya vavasongoye, vandu va tangalu vashesela na yiipala vasongoru vawo.

⁶Kusheshaa kyeeri vandu va ufyari, vashekwiipo vasauwe umwi waawo, vashemmbya, “Yewe ni kyeni kutiri soori ya iraa, kweekyo mmbo lwakusauwa yewe kusheva nsongoru weeru kyeeri ekyi kya ngusana.”

⁷Nawe llyo asherouwa naambe, “Oode! Nshi yeny-fo nshitiri wiidimi lwaimweekya-fo. Nshitiri soori nta shoonga-fo, kweekyo mulashaallwe nsongoru waany-fo.”

⁸Mashika Yerusalemu yankapa urende na Yuda yammbwa, mashika mirerye na mitannyi yaawo mmbo ikee kilasha kya Nndumi Iruva, mashika kuleefo weerei mmbo vakeetatala Iruva.

⁹Ulyamari lwawo mmbo lulollywa na paa. Mitannyi yaawo mmbo ivakye ilya ya vandu va Sodoma; nta kuleefo ikusuruma. Oshiny llwa vandu yewo, mmbo vakweenngyemisindara wo veni.

¹⁰“Yewo vasumanu mmbo vashevaa na nsia, neefyo fyoose mmbo fishevaa fisha, nawo vasheiiluula neelya ndunda ta mashora awo.”

¹¹Indi washi ni lwawo, “vandu vakasha, filya valetannya vengyi, mmbo vashefitannywa-wo.”

¹²Valya veeyakuya fesa, mmbo vakeesya vandu vakwa, neewo vatiri sie tawo mmbo vakeevalemba. Yeni vandu vakwa, yewo vakeemusongoya mmbo vakeemureta shia, naambo mulamanyi kundo kwaiindukya nafo.

¹³Nndumi Iruva mmbo ammesalala naambo arere mwaandu wa vandu vakwe.

¹⁴Nndumi Iruva amuvaanga mwaanduny na vasongoru amwi na vashilyi valya veeketetera vandu vakwe naambo akooye ivarumbuya mwaandu, “Ni yeni mulelyamara irema lya misabibu na masaa a vandu vaturi ni yefo mmba kwany akee masangirye.

¹⁵A mmbo kyaamba-kyi, elyi mwalamya vandu vakwa neevasoka masaa awo, vandu vafwafwa valatiri kindo! Ni yeny Nndumi Iruva wa matorito shamuvesa.”

¹⁶Nndumi Iruva aamba, ankyelola vaka yewo va Yerusalemu ndesa veefo vekushopaa! Vesheenda veipoiyo singo tawo uwe veereveta miso awo a lango sheesi taari na taari vasheenyellye veere fishingele yefo marendeny awo.

¹⁷Yeny mmbo shivarikya ngapo, shiwoote fii nrwe vaka yewo va Yerusalemu shivare fipalala.

¹⁸Kukeesha nkonu Nndumi Iruva ashesoka vaka yewo findo fyoose vakekwiishika nafyo ni fishengele, mangeeto na mise.

¹⁹Naakwa ni ngomita yeto vakufingye mmbo vashesokwaa.

²⁰Neefyo vakufingye fisiny, varee nrrweny, maakony neefyo fyoose vafivikye nsia, mmbo vashesokwaa;

²¹na rashi yeto varee efo mininy ya maako neefo mmbweny,

²²masara awo mesha eto varee, saa ta wokony na mboloko varye.

²³Findo fingyi fyoose fyeeraa efo mwiiliny fitambaa fya mbolokony, fya yoososya singony neefyo fyeefinngya nrrweny.

²⁴Ando afwaamaa, mmbo varraa kiraa, ando efinga kimaakova kisiny, mmbo vafingaa makanda a miri, ando eeva na fii shimamiri nrweny mmbashevaa kipalala nrrweny, ando eeraa soori mmbo vasheraa marattwe. Usha lwawo mmbo lushevaa usutu!

²⁵Vandu va muri woose, naakwa ni valya vatiri finya nnu, mmbo vashewaiywa fireny.

²⁶Ngiri ta muri mmbo tishesokywa na kiiyo na muri ushevaka nka akee mwammbwe soori mbereto mbee ya vandu