Read BIBILLYA Mareiyo Meele a Iruva ISAYA 33 Bible Online

ISAYA 33 - BIBILLYA Mareiyo Meele a Iruva bible

ISAYA 33

¹Woshiny lwafo yewe mwiilyamara, kukeelyamara kulaore kwanlyamarwa yewe! Yewe mwiitana fya ntambo, kuleefo nndu ankutannya ntambo, kyeeri kumaa ilyamara, mmbo kulyamarwa yewe na kyeeri kumaa itana fya ntambo, mmbo kutannywa ntambo yewe.

²Woi Nndumi Iruva lwakutereva kululyillye ni kwafo luvikye nsia, yewe mmbwe kisiiko kyeru wo nkonu ngama, ukyiro lweru kyeeri kya ukyiva.

³Ntiri wa unyanga lwafo lukaitiva vandu mmbo varishaa, elyi kwakwiipo ikapa fira masanga mmbo anyanyakaa.

⁴Vakiduva vawo mmba vasangiryaa mifungwa vakavakapannya sha ngallya.

⁵Nndumi Iruva mbwe aitorye fyoose, kundo kwakwe ni uwe iruveeu. Kakwaanisa usumanu na urilalyi Sioni shoose.

⁶Yeni vandu va Yerusalemu, Nndumi Iruva mmbwe ukiro lwany nringyi waany kamuniinga urango na wiidimi. Umasi lwany uniini ni yiinndya Nndumi Iruva.

⁷Lola, valya vatiri finya mmbo vakeefiira, na varumi va urilalyi mmbo vakekaba kiiyo.

⁸Shia shilangari tammila peru, nkukyiifo nndu akeiira-fo-fo. Mavavaso vambika mmbo akeefishwa mwaala, vakureekyi mmbakee kyiinndwa-fo. Nkukyiifo akeesara kya muu wa vandu-fo.

⁹Uruka mmbo lukeefiira na yuuma, misito ya Lebanoni yammuuma imungo llya isha lya Sharoni lyammba kasa koomu; yefo Bashani na ifumbuu lya Karmeli miri yammaangara mamburu avayo.

¹⁰Nndumi Iruva aamba, “Ulaalu yeny shimuni mmbo shikwiipo shikudeesye, ulaalu yeny mmbo shisheinndywaa.

¹¹Mmbo mushekufingaa muulu; na mafurumyony a vayo musheona mbulula. Mumuyo wany ushemurumata muveni.

¹²Masanga mmbo vavaa sha elyi kwakoora yeela sha miinga yafikafika ikarumatwa ni muro.

¹³Arannyiny yeni mukee kwaasha kya efyoshilefitana, na yeni mukee kufii mwiirikye wiidimi lwakwa.”

¹⁴Valyamari vakee Sioni mmbo vakeyeereya; yewo valakee iinndya Iruva, mmbo vakererema na yaamba, “Ni-vi ashiidimaa iserikya muro yeu nnyasi? Ni-vi ashiidimaa isisirya fipala-pala fya muro ularumikaa llung'anu?”

¹⁵Ni yeto akooya yeenda kwa usumanu na mwirera marero a waarya. Ni yeto aipala mbusha ya findo fya munu; nndu alawaryaa tusu findo fya kisurukumu. Alakundaa yiita mbony ta ipuswa samu nta alakunndye miso akwe alollye mitannyi mikasha.

¹⁶Nndu wa mikaaye yei mmbo akee ando kusha kwa uwe na ngina ni turuve yakwe kutiri uringyi mmbo aniingwaa shoonga yeelya na mura weena.

¹⁷Mmbo mushiidimaa ilollya mangyi ekee itumbeny lyakwe, mmbo mushiidimaa ilollya uruka akeeshillya ndesa lung'ani uniini.

¹⁸Ngoo yafo ishesunundaa kya weeresi elo, “Valya vekeevika uramba lwa isana usanu nkwi akai, a nkwi akai ulya ekeesununda na ivesa-vesa mbony ta uringyi lweru nkwi akai ulya ekeekena minara.

¹⁹Mmukilollya lyingyi vandu valya vanyaasi varera marero moomu kulaore kuamanyaa, vandu vareraa kishomu kya vandu veny.

²⁰Loleny Sioni muri luiinndyaa sukukuu teru. Loleny muri wa Yerusalemu ando kukee kusha kutiri yeema lyitiri finya, mbambo tikeeshivaakye tilakaa tiiluwe, fyoove fya vayo filakaa firumbuke.

²¹Kya indi-fo Nndumi Iruva asheloora wiidimi lwakwe. Kundo kutiri mira miniini na ngyusoka, kundo meeli ta fira shidu na shiniini tilashiira nta yaanga-fo.

²²Mashika Nndumi Iruva mmbwe nleti weeru mwiilushillya, Nndumi Iruva mmbwe mangyi yeeru, we mmbwe mwiikira weeru.

²³Ewe Sioni fyoove fyafo fyanleleka nfishiidimaa yaavika na ireiya uraato-fo. Naakwa ni fitongororo vakaonisa waavi lwawo.

²⁴Nta nkwiifo nndu ashaamba-se alwee-fo mashika vandu woose mmbo vashesarywa ngyulyamari tawo.”