Read BIBILLYA Mareiyo Meele a Iruva ISAYA 34 Bible Online

ISAYA 34 - BIBILLYA Mareiyo Meele a Iruva bible

ISAYA 34

¹Oshony, eni vandu va masanga mukooye iitya, aranyiny eni ngyufyari ta vandu, ulana lwiitye na fyoose fiifo na fyuukyefo.

²Mashika Nndumi Iruva atiri unyafi kya vandu va masanga woose, na unyafi uniini kya nsemu wawo moose, ammbamamita deny, kavauta vakandeshishwa.

³Vandu vawo valewaawa mbasherwaa efo na efo, kyuuna kya minying'a yaawo kisaama na uwe na mafumbuu asheserembukaa kyeendo ni samu yaawo.

⁴Na nsemu moose va iruveeu ushenyanyatwaa na ngina tishekushwa na findo fyoose fishewaa sheelyi ire lya nsabibu na ntini lyinaa na iwa.

⁵Mashika usu lwa Nndumi Iruva lwanna na iishwa iruveeu; lola lusholokyaa Edomu; na uwe ya vandu shilevadenga naambo shivautye uvingo.

⁶Usu lwa Nndumi Iruva lwammbura samu ya mburu na ya ngurana ta moonri, na mafura a syo ta ngurana ta suva, mashika Nndumi Iruva atiri kiraso efo Basra, ni ishishwa kyuumu efo urukeny lwa Edomu.

⁷Ng'umbe tishesangaa na shau ta ngoroshony, na uruka lwao lushenangwa ni samu na kiluulyi kisheeremutwa ni mafura

⁸Mashika ni nkonu wa Nndumi Iruva wa itaiya kiduva, ni mwaaka wa iniingwa weesi kya iwaanya Sioni.

⁹Mira ya vayo ishealuwaa laami, na kyiluulyi kive kibiriti, na uteri lushevaa laami ishakaa muro.

¹⁰Mmbusherumatwaa nsanyiny nta kio-fo nsu wa vayo usheroo na uwe llung'anu. Kive ukiva nta kuleefo nndu asheiraa nnang'ani ya vayo llung'anu.

¹¹Uviri na sasa, vashekaafo mafururu na makukuru vashekaafo, nawe asheoraa wende lwa ukiva na ngwera.

¹²Vashevangaa vamangyi vawo lyo mmbashelollyoo-fo. Vasongoru woose vashevaa nshi kindo-fo.

¹³Miinga na rafi tishemyaa efo kyeny kwawo, kusheva ni kundo nyaa na maparwe ashekaa.

¹⁴Na mafisi a ngoroshony vashekwaananya na maparwe, varumu na mafisi engyi, ashekukayaa-fo na ifura.

¹⁵Na ifururu lyishekaa kyifuriny, lyivikye na ilaaya na ipara fivana na ifisanyirya maaruny, makukuru ashekwaanannya-fo.

¹⁶Ruuyeny efo mareiyony a Nndumi Iruva mundelola fyoose atannyi na mulole mmbo aambaye-kyi, nkwiifo umwi wa ewo ashewikaafo-fo, nta umwi ashekaafo muni-fo. Kimmba ni Nndumi Iruva arera na mumuyo wakwe ukavasanyirya.

¹⁷Ambasauwa kavaavya na woko lwakwe, vasheshillya llung'anu, vakeefo marika moose llung'anu.