Read BIBILLYA Mareiyo Meele a Iruva ISAYA 39 Bible Online

ISAYA 39 - BIBILLYA Mareiyo Meele a Iruva bible

ISAYA 39

¹Fyeeri filya, mangyi ya Babilony we Merodaki-baladani, mwana wa Baladani karikya Esekia barrwa na findo fya pya, kimmba emiita sheelyi elwee na ulaalu ammeshya.

²Esekia kafura, kaora vandu valya mmba yakwe na findo fyakwe fyoose; nafyo fyeekee ni findo fya uuru uniini sha mafura, saabu, manemane na fesa. Kavevaora na mmba titiraa fisha fya fira na fyoose eetiri. Nkwiifo kindo kyimwi yefo mmba yakwe na urukeny lwakwe kulaore aleora veny valya-fo.

³Naasa nkisuku Isaya kaengya mangyi Esekia kammbesa, “Andesa vandu eva mmbo vaamba inda? A nkwi valeuka vakasha kwafo?” Esekia kaamba, “Vandu mmbaleuka kwaasha; valeuka Babilony.”

⁴Isaya kavesa, “A ndesa nkyokyi valelollya kunu mmba yafo?” Esekia kaamba, “Mmbo valelollya findo fyoose fya kunu kwakwa; nkwiifo kindo kulaore shilevaorafo.”

⁵Naasa Isaya kavia Esekia, “Arannya kirero kya Nndumi Iruva muni matorito.

⁶Lola mikonu isheshaa, fyindo fyoose fya mmba yafo, naakwa ni yefyo vamiku vafo veesurumyi kutani kwafika inu, fisheipowaa firawo Babilony; nkwiifo kindo kishesaau-fo. Ni Nndumi Iruva arera.

⁷Naakwa ni vana vafo kumuni na yewo vasheonikyaa kwafo vasheipowaa vandeva mashinga efo mmba ya mangyi ya Babilony.”

⁸Naasa Esekia kavia Isaya, “Kirero kya nndumi Iruva kwarera ni kisha, mashika nnyalekusara nkushekaafo ufoo fyeeri fyakwa yeny.”