Read BIBILLYA Mareiyo Meele a Iruva ISAYA 49 Bible Online

ISAYA 49 - BIBILLYA Mareiyo Meele a Iruva bible

ISAYA 49

¹Aranyiny eni maruva, looteny maarwi any eni ngyufyari ta vandu mukee kwaasha, Nndumi Iruva ammiita ukya kulaore shammiirwa; shikee efo nsangeny wa maaye vakwa kashivaanga na irina lyakwa.

²Nawe kaamisa kana kyakwa kakava sha usu lwoovi; kashivika ando afoo ifweereny lya woko lwakwe. Nawe kashaallwa mfe mwaami ukee munwe, kashisuruma efo allyeny ya vayo, eshiviaa,

³“Yewe ni ishinga lyakwa israeli, nnang'ani yafo shisheitikiswaa.

⁴Kya indi shaamba, shankuvinisa ruu, shavina kikee kya ruu parany; kilatiri mbusha.” Kya indi ni kya dede uvingo lwakwa llukee kwa Nndumi Iruva na mbusha shishewonaa mmbwe atiri.

⁵Na ulaalu Nndumi Iruva mmbo aamba indi, we aleshitana ukya efo nsangeny wa maaye akwa shive ishinga lyakwe, naambo sheende Yakobo na Israeli vakusanyirye-se mbee yakwe (kimmba yeny shaindywa mbee ya usangu lwa Nndumi Iruva na Iruva wakwa kaveva nnyo finya yakwa).

⁶Eeda Nndumi Iruva aamba indi, “Ni kindo kyaangu yewe iva ishinga lyakwa naambo kuinwe ngyufyari ta Yakobo, na ivaviira vandu va Israeli, vasurumi; na kya mmwaasi shishekuutaa kuve sa ya va ulana; kuve nkira wakwa fika ufishony lwa ulana.”

⁷Nndumi Iruva na mwikira wa Israeli, mweele wakwe, aamba indi, yeto ainyalwa ni vandu va ufyari elu, we eto akee ishinga lyawo vakee ishillya, vamangyi vashelollyaa, vashesalala na vaniini vawo vashevafirya-ndi kimaruma kya Nndumi Iruva akee wa dede, alatiri ulembi, mweele wa Israeli ankusauwa.

⁸Nndumi Iruva aamba endi, “Kyeeri kisumani shilekurouwo, na nkonu wa ikuauwo shilekweekya na yeny shishekuningaa, shishekuuta yewe kuve ni kyaasa kya vandu eva; kushesaleesa uruka elu na ivaniinga dingu yekee nrabu.

⁹Kuviaa yewo vakee vafinge, naasa somukeny na ewo vakee ireeminy, somukyeny mulollyo. Vashellyaa efo shya naakwa ni fya myaambeny myuumu.

¹⁰Mmbasheityaa shaa nta itirwa nnyura-fo, mmbashekorwaa ni mwi nta iitya nrike nkasha-fo, kimmba yeto alevaauwa ashevasongoyaa; eeda, ashevateteraa efo ngyusokeny ta mira.

¹¹“Na yeny shishesongosya shia shirambalalyi nnang'ani a mafumbu na shia takwa niini tisheitikiswaa shoose.

¹²Eva vasheshaa vauka kwaasha, vengyi vauka taari ya ngama na eva taari ya nkwaany; na eva vauke uruka lwa Sinimu.”

¹³Imbeny eni ngina, fura ewe uruka; kapa kyorongye na iimba eni mafumbu, kimmba Nndumi Iruva ammbirya muu vandu vakwe, nawe ashevalyillyaa ewo vakee iliswa ukiva.

¹⁴Kya indi Sioni nyaleamba “Yaave anshira, Nndumi Iruva anshirekywa,”

¹⁵A ndesa kwiifo nndu nka aidima irekwa vana vakwe vakeeyoonga nta nalalyilye mwana wa nsanga wakwe? Eeda, eva vashidimaa irekywa, kya indi yeny nshikurekywaa-fo.

¹⁶Lola, mmbo shikureiye yaa kidauny kya maako akwa, masimamba afo akee mbee ya usangu lwakwa kyeeri kyoose.

¹⁷Vana vafo mmbo vakee ikutakura na ewo vakulyamarya, na ewo valekura na ewo nrabu vasheukaa kwafo.

¹⁸Inwa miso afo kulole taari toose, ewo woose mmbakee ikuumbya vakusheye. Kyeeri ekyi shiyyo, Nndumi Iruva aamba, ni kya dede nkushevavingaa woose ewo kwakooya ni kimaruma kya usha, mmbo kusheraa ewo sha mwali.

¹⁹Mashika kya mbony tafo, ta efo kwafo kushevaa nrabu ando kulakayoo mmbandu, na uruka lwafo lulyamarwa, ulaalu lushennyaa, nta llushekimaa-se ikaafo vandu vafo-fo, Valya veefo vasherishaa.

²⁰Vana kuleipoo mifungwa vashekuvyaa ando yaa ni kunnywa, nkushelumaafo. Shiniinga mwaanya shiidime ikaau.

²¹Lyo kusheambaa efo nriminy kwafo, “A mmbi aleshiirya vana eva na yeny mmbo shemfiywaa ni vana vakwa? Mmbo yeny shekee shimuni, shasamirwa sharaaraa efo na efo. A mmbi alelela vana eva? Yeny mmbo sherewo shimuni, a ndesa nkwi vekai?”

²²Nndumi Iruva aamba indi, “Lola shisheinwaa woko lwakwa uwe ya vandu va ulana; na ivatira mifungwa vandu vawo na isaalesa ngiri bendera ya umangyi lwakwa; nawo vashendee vana vafo na kipoota, na sambura tafo tishekurikwa meeveny awo.

²³Vamangyi vawo vashelelaa vana vafo na vaka va kimangyi vashelela na ishukura vana. Vashewaa mbee yafo na ifiirya-ndi na ikomba kiluulyi kya marende afo, llyo kushemanyaa yeny ni Nndumi Iruva na yewo vashivereye mmbashesukaafo.”

²⁴A ndesa nndu nrango ashidimaa isokwa mifungwa yakwe? Ao nsemu va vasikari vakee vadeesye nisha vavingwa?

²⁵Kya indi Nndumi Iruva mmbo aamba indi, “Naakwa ni yeto nranngo ashesokwaa mifungwa yakwe na mifungwa ya eto akulollye atiri finya ashekirwaa. Mashika yeny mmbo shishekabanaa na eto akabana neewe; mmbo shisheengyee vana vafo ukiro.

²⁶Na ewo vakeikuwonnya mmbo vashelyaa nyama ta miili yawo veni. Vashenangwa ni samu yawo veni sheelyi vanangwa ni mfinyu; llyo vandu woose vashemanyaa dede sha elyi yeny mmbwe Nndumi Iruva, nkira wafo, mwauwa wafo, mmbwe mwiitorya wa Yakobo.”