Read BIBILLYA Mareiyo Meele a Iruva ISAYA 51 Bible Online

ISAYA 51 - BIBILLYA Mareiyo Meele a Iruva bible

ISAYA 51

¹Sharannyiny yeni va usumanu; yeni mukelatya Nndumi Iruva; loleny iwe nlya mundeutwa na irina llya mulesumwa-fo.

²Kumbweny ndeye waany Abrahamu na Sara alemwira; mashika llya ekee umwi-nsi mmbo shilemmbaanga shammwallwa kava veengyi.

³Mashika Nndumi Iruva ammbiirya Sayuni muu, ando kwekyee ukiva kukava kusha, kaallwa ando kwa kasa kukawa sha nnda wa Eden na ngorosho ya vayo ikava sha nnda wa Nndumi Iruva, ifura na seko fikalollyo nnang'ani ya vayo na yaana na iimba:

⁴Shaarannyi yeni vandu vakwa; shaarannyi isanga lyakwa, mashika ivavaso lyishuuka kwakwa, na yeny shishaallwa uvingo lwakwa luve ifura na sa ya vandu va masanga.

⁵Dede yakwa ikee kufii, ukiro lwakwa luvaa paa, na maako akwa ashuutyaa uvingo vandu wa masanga a vandu, maruva ashiveraa nang'u mmbo avikaansia woko lwakwa.

⁶Inweny miso any na iruvee-u kurumakaa sha nsu, kunu si, mashika na uruka lukkwaa sha soori, na yewo vakee nnang'ani ya vayo vafwaa-indo; indi ukiro lwakwa mmbo luvaa lwa llung'anu na dede yakwa nnyitiri umando-fo.

⁷Shaarannyi, yeni mwiishi usumanu, yeni vandu mutiri mavavaso akwa miriminy yaany; mulairee fyararo fya vandu, nta mulasavae kimaruma kya fiila fyawo.

⁸Mashika mmbo valyiwaa mmakuru sha soori, na sava tivalye sha sufu, indi usumanu lwakwa ni lwa llung'anu, na ukiro lwakwa ni lwa marika moose.

⁹Kwipoo, kwipoo, voi Nndumi Iruva, kwalweekya, lweekye na finya tafo sha kyeeri kilya kya kasha, sha kyeeri kilya kwevinga ishoka lyilya lya yeeve lyavaangwa Rahabu.

¹⁰Nnyewe kulerummbwa-rummbwa Rahabu fyenga fyenga Kwakora na ishoka lya; Nnyewe kuleumisa yeeve, na mira a ndilyi shiniini, kwaallwa ndilyi tikava shia, naambo veere vandu valekirwaa-ndi?

¹¹Neewo walekirwaa ni Nndumi vashaa, wafike Sayuni veshiimba; ifura lya llunganu lyive uwe ya mirwe yaawo, vakukyele na ifura; ukiva na ilwaa firishe.

¹²“Nnyeny, yee, nnyeny, nnyeny shimuviiryaa muu, yewe nnyewe vi kutani kweryaa nndu afwaa, na mwana wa nndu ashaluuwaa sha mare?”

¹³Kwarekywa Nndumi Iruva, Mwuumbi wafo, yeto alevika mafishi, na ivika uvasha lwa ulana, neewe kwereya nsanyiny moose, kimaruma kya unyafi lwakwe yeto akekusisa kyeeri akee kufii irumata; na nkwi unyafi lwakwe yeto akekusisa lukai?

¹⁴Yeto alesamiswa kandefingwa mmbo aruwa uviny; nta nnyafwaa nooloke irininy-fo, nta shoonga yakwe nnyishaangywaa-fo.

¹⁵Mashika yeny ni Nndumi, Iruva wafo, shaaruva yeeve, uraato lwa vayo lukekwipoo Nndumi Iruva wa matorito nlyo irina lyakwe.

¹⁶Neeny shammbika marero akwa kaniny kyafo, na yeny shakusuruma kirisheny kya woko lwakwa, na shivike mafishi iruvee-u na ivika nsuka wa ulana na ivia Sioni, Yeni ni vandu vakwa.

¹⁷Kwipoo kumuni, kwipoo kumuni, salala, Ewe Yerusalemu, Yewe kuleniiya wokony lwa Nndumi Iruva, kikombe kya unyafi lwakwe, bakuri ya kikombe kinangaa-nangaa kwakiniiya na ikimarisya.

¹⁸Nkwiifo nta umwi wa intetera-fo nnang'ani ya vana woose kuleveera, nta nkwiifo umwi wa intira woko-fo, nnang'ani ya vana woose alevalela.

¹⁹Mbony eti toose tankukooya; mmbi ashidimaa ikutinnywa? Kwitirwa ni uraato, na shaa na usu; shiidimi inda ikuviirya muu?

²⁰Vana vafo vafwa nrima, vanlala shia shilangari, vakava sha kinamburi kyatirwa ni nsoori; vakaishwa unyafi lwa Nndumi Iruva, na ikoomyo ni Iruva wafo.

²¹Naasany, kimaruma kya vayo, kwaarannyi irero elyi, yewe kwalyiswa ukiva na inangwa lyo nshi mfinyu-fo.

²²Nndumi, Nndumi Iruva, na Iruva wafo yeto akee ikureekya vandu vakwe, ni indi aamba, Lola shammuuta wokony lwafo kikombe kinangaanangaa, pakuri yeyo ya kikombe kya unyafi lwakwa; nkukinaa lyingyi-fo;

²³na yeny mmbo shikivikaa maakony a yewo wakekulyilyisa, walevia nrima wafo, kufiikye, wiidimi iira, neewe kwaallwa mungo wafo ukava uteeri na shia, kwa yewo vakeira uwe ya vayo.