Read BIBILLYA Mareiyo Meele a Iruva ISAYA 52 Bible Online

ISAYA 52 - BIBILLYA Mareiyo Meele a Iruva bible

ISAYA 52

¹Kwipoo, kwipoo, raafinya tafo, Yee Sioni kwaambike soori tafo shisha, Ewe Yerusalemu, muri mweele; mashika uka ulaalu nkushangaa nnang'ani yafo nndu nalakee nrini nta nlyamari-fo.

²Kwaangate kiluulyi; kukwipoo, kukee rembo Yee Yerusalemu. Uta findo efyo fikee fifingye singony yafo. Yee mwana wa kyeny Sioni kukeenfinge.

³Mashika Nndumi Iruva aamba indi, “Mmbo mulekumbwa ushingeny ruu purany; neeni mukakirwa kulaifo uuru.

⁴Mashika Iruva, we Nndumi Iruva aamba indi vandu vakwa yoo mapookyony valeoloka Misri, naambo vakee-fo sha veny, na Mwashuri kavaisisya kuleefo kimaruma.

⁵Naasany ulaalu nki nkutana yaa, ni indo Nndumi Iruva aamba, kwakooya vandu vakwa vepowa kya ruu? Yewo wakevashilya wakekapa kyorongye, ni indo Nndumi Iruva aamba, na irina lyakwa lyikeyararwa nkonu piti.

⁶Kwa yekyo vandu wakwa vashemanyaa irina lyakwa; kwa yekyo vashemanyaa nkonu yeto sheelyi yeny, nshikerera; mmbwe yeny.”

⁷Shaasa akee mesha marende yoo akeira mafumbuny akeyeende nrumi ya nsia, Yeto akeyeende urilalyi, akeyeende mbony shisha, yeto akeyaamba mbony ta ukiro. Akeevia Sioni, “Iruva wafo mmbo ashillye!”

⁸Unyanga lwa varingyi vafo, wakeimba ando amwi na unyanga uniini; mashika valollyaa iriso kwi iriso, shaasa Nndumi Iruva akeesha Sioni.

⁹Kapeny mindoro ya ifura, imbeny ando amwi, Yeni va Yerusalemu! Ando kwekee ukiva, kimmba Nndumi Iruva ammbiirya vandu vakwe muu, kakira Yerusalemu.

¹⁰Nndumi Iruva, aora paa woko lwakwe weele misony a vandu va masanga moose; na taari toose ulana tilollyaa ukiro lwa Iruva weeru.

¹¹Endeny kyany, endeny kyany, ukeny efo, mulapaani kindo kiravi, ukeny nnang'ani ya vayo; veny vandu vesha yeni murye fisha fya Nndumi Iruva.

¹²Mashika mmusomukaa mwirishaa-fo, mashika Nndumi Iruva mmbo amusongoyaa naambo namwuringe taari toose.

¹³Lola nndundi wakwa ashevesyoo, asharafumwaa, aroswaa ashekaa uwe-deny.

¹⁴Shaasa vandu valeting'wa (kisangu kyakwe kilelyamarwa nnu ngota vandu woose) ni indo amatwa vandu va masanga meengyi, na vamangyi valemwa irera, mashika valollyaa findo kulaore valemmivyo na mbony kulaore valentiita vatimanyi.

¹⁵Ni indi a-mattwa masanga meengyi; vamangyi mmbarayaa kana kyimaruma kyakwe; mashika kilya kulare vammivywa mmbo valollya na miso na kilya kulare valemmiita mmbo vakimanyaa na nshushwa.