Read BIBILLYA Mareiyo Meele a Iruva ISAYA 57 Bible Online

ISAYA 57 - BIBILLYA Mareiyo Meele a Iruva bible

ISAYA 57

¹Atiri usumanu arekaa nta nkwiifo amanyaa nriminy mmbwakwe-fo; vandu veele nawo vakautwa-u, nta nndu umwi amanyaa-fo nndu nsumanu ammauwa kyuuka na ngapo.

²We kaanga urilalyiny, nawo vakemuya fitareny fyawo, wo nndu shaasa akeyeenda na ngaa yakwe.

³Indi yenu oshony yaa, yeni vana va nka nsavi, ufyari lwa nka ntuusi na nka wa shia.

⁴Mmbo mukeilya ulai na vi? Mmbo mwambira kana kyany na isomuta ngyulumi tany? Ndesa yeni mmukee filemi na valembi.

⁵Yeni mukeyaanta lango tany nnang'ani ya mialoni; kwasi ya wo nri utiri mare mavisi; yeni mukevaya vana efo mamungony nnang'ani ya mbanga?

⁶Waavi lwafo mmbo lukee efo songorony ta imungo, efyo mfyo waavi lwafo, mmbo kuleletya kiraso kya kindo kya ina, na kya nswa; ndesa shiirikye na mbony yeto?

⁷Mmbo kwavika kitara kyafo uwe ya ifumbu yaasha lyikee uwe-deny; kweenda efo kundeuta kiraso.

⁸Numa ya myaango na masimamba kwavika-fo findo fya ikukumbura; mashika kwantarambwa nrima wafo kimaruma kya nndu ungyi nshi kimaruma kyakwa-fo, kwaasaama uwe, kweengera kitara kyafo, neewe kwalya mma nawo, kwakunda kitara kyawo kyeeri kulelollya umbereto lwawo.

⁹Mmbo mukeindya mangyi moleki mukamweegye mafura afwaamaa nnu, kwaruma ironda lyafo lyeende kwaasha, ikuruuyya maruva kutani kwafika kwa warumu.

¹⁰Mmbo kwemmaraa kimaruma kya shia shaasha, indi nkulaamba-fo, nkwiifo ivika nsia-fo, kweonisyo finya tafo; kimaruma kya yekyo nkuleuma-fo.

¹¹A lyo mmbi kulemwereya na inreremya kutani kushaamba wongo, nta kuleshikummbwa yeny-fo, nta ivika findo efyo nriminy-fo? A! Yeny nshileora urilalyi lwakwa kwa fyeeri fyaasha, nta nkuleshereya-fo?

¹²Yeny nshaambaa usumanu lwakwa na mashora akwa nnatiri mbusha na yewe-fo.

¹³Kyeeri kufiraa, mafwanu yewo kulewasanyirya nakuvarye lyo uraato lushekukamara kwaasha na mumuyo ukavaipoo. Indi yeto ashivikye nsia asheonisaa uruka, naasheva muya ding'u ya ifumbu lyakwa yeele.

¹⁴Nawe ashaamba: “Songosieny, songosieny, sakkweny shia uteny-fo wo nsindara wiifo efo shia ta vandu wakwa.

¹⁵“Mashika yeto akee uwe akee mwarafumi, mmbo akaa llung'anu; we irina lyakwe lyikee yeele; aamba: Mmbo shikaa ando kukee uwe, kukee kweele, na akee ando amwi na nrima wa ikurya na ikunyiisa, naambo mirima ya yewo wakunyiisye irutwa, na irrwa mirima ya yewo valekurya.

¹⁶Mashika nshivakyanaa na vandu kyeeri kyoose-fo; nta nshitirwaa ni unyafi mikonu myoose yakwa, na mirima yeyo shileiumba yeny.

¹⁷Kimaruma kya ulyamari lwa lango takwe shiletirwa ni unyafi, shankapa, shasuruma kisangu sharosa unyafi; nawe keengera iva nnriiti, kalatya shia ya nrima wakwe muni.

¹⁸Shallolya shia takwe; na yeny shinkiraa, na intetera-da, shimmbiryaa muu wakwe, we na yewo vakeemwiiya.

¹⁹Yeny shikeisongosya ndunda ta kana; urilalyi, urilalyi kwa yeto akee kwaasha, na yeto akee kufii, ni indo Nndumi Iruva aamba na yeny mmbo shinkiraa.

²⁰Indi varavi mmbo vavakye iruva lyifwalangyikye; mashika llyishidimaa imalallya-fo, na mura wa vayo mmbo utiri mabwashi na kirinda kyiingyi.

²¹Nkwiifo ufoo kwa varavi-fo; ni Iruva wakwa aamba.”