Read BIBILLYA Mareiyo Meele a Iruva ISAYA 8 Bible Online

ISAYA 8 - BIBILLYA Mareiyo Meele a Iruva bible

ISAYA 8

¹Nndumi Iruva kashivia, “saleesa ipoo iniini; kureiye-u indi: Angusya uviny tira kwashillya.

²Kureiye vandu vavii va tokyi, nkohani Uria na Sakaria mwana wa Yeberekia nave nkureekyi wakwa.”

³Numa kyaangu nka wakwa kakufinga; kyeeri mwana yeto ewonika, Nndumi Iruva kashivia shimmbaange, “Angusya uviny tira kwashillya!

⁴Kulaore mwana ang'ana amanya ivaanga, ‘Ndeye’ ao ‘Maaye’ masaa na umasi loose lwa Damesko na mifungwa venkamara yefo Samaria mmbo tishekamarwa kwa mangyi ya Ashuru.”

⁵Mangyi karera neeny lyingyi,

⁶kashivia, “Kimmba vandu yeva vanlema mura yeto nsha wa Shilo usheeka kisha, vakafura kya mangyi Resini na mangyi Peka mwana wa Remalia,

⁷naasany yeny Nndumi mmbo shisheende nsongoru wa Ashuru na finya takwe shoose, sha iwala lya mura wa Efrate usheiwala-wala uwe koose kwa vandu va uruka lwa Yuda.

⁸Mmbo ashaa eerye finya ing'ani, ashekwaana urukeny lwa Yuda koose wiishwe fika meeveny na kundo koose kulyikywa sumbai.”

⁹Ereyeny mukulunge amwi, yeni masanga! Arannyiny yeni munyanyakye yefo urukeny koose, kudeesyeny ikapa fira. Yee kudeesyeny yeni marosho.

¹⁰Kudeesny nnu, iindi lyo mmushiidimaa ivinga-fo. Rereny ngata mushiidimaa lyo mmushiidimaa-fo mashika Nndumi mmbo akee kyaalu kyeru.

¹¹Mashika Nndumi Iruva mmbo alerera neeny kashiikyimba, kashivia shilakani shieny ta vandu yewo.

¹²Kulashekulunga na meengye ya vandu yewo-fo, kulasheyeereya findo yefyo fivaeresye-fo.

¹³Arannya yeny mmbwe Nndumi Iruva muni finya, nshikee mweele, yeny mmbwe kusheereyaa.

¹⁴Yeny mmbwe kirishony kyany mmbo shivakye iwe lya ituula vandu, mmbo shivakye nreiyo ushiidimaa itira vandu va uruka lwa Yuda na Israeli na vandu va Yerusalemu.

¹⁵Iwe yelyi mmbo lyituula veengyi neevafisha-fisha neetirwa ni nreiyo yeto.

¹⁶Inndyeny na ilosha irero lyakwa, yeni va kiloshony vakwa.

¹⁷Nndumi Iruva wa Israeli ankusuruma, indi yeny mmbo shimmbereyaa mashika mmbwe shimmbikye nsia.

¹⁸Yeny na vana Nndumi Iruva ashiiniinngye kunu Israeli ni kiringisyo kyiing'ani kyuuka kwa Nndumi Iruva wa matorito ooka ifumbuu lya Sioni.

¹⁹Kyeeri vashekuvyaa, “enda kwa vasavi na veelafya kwandevesa-fo mbony tawo, nkyeeshyia mmwasi vandu indevesa mbony tawo kwa Iruva waawo?”

²⁰Ni kya dede kya miloshye yei kulayaarannyi-fo, mashika nnyitiri shia-fo mmbo ikeekureta.

²¹Elyi vasherwa-rwa efo urukeny, mmbo vashetirwaa nshaa na yaaraa nnu, na kyeeri vasherovywaa mmwasi mmbo vashefuuya mangyi yaawo na Iruva waawo veipoiyo miso awo na uwe veedengaa.

²²Navo mmbo vashefiikya n-dudu ilola sumbai veesokywa mfyoova mmbo vasheumbutwaa na yeerwa ireeminy iroo lya makyimima.