Read BIBILLYA Mareiyo Meele a Iruva Valevi 10 Bible Online

Valevi 10 - BIBILLYA Mareiyo Meele a Iruva bible

Valevi 10

¹Nawo Nadabu na Abihu, vasero wa Aron, vakeepoo wo nndu kiiya kyakwe vakavika-fo muro, vakavika-fo nrungo nsha, vakaumbutau muro ulya ungyi kulore Nndumi Iruva embavavasya.

²Naasa muro ukauka yoo mbee ya Nndumi Iruva, ukavakomba nawo vakafiiya yoo mbee ya Nndumi Iruva.

³Llyo Mose alevia Aron, “Ekyi nkyo kindo Nndumi Iruva alekirera, eshaamba, Yewo veeshisheya nkuti vashirumishe, neeny shing'aniswa efo kwa vandu woose.” Aron kamalallya sau.

⁴Mose kavaanga nang'u Mishaeli na Elisafani, vana va Uzieli we mwana wa mfwamayae wa Aron, kavavia, “Sembeyeny yaa, uteny ng'u vanavamaye yeva vany ya mbee ya ulale, muvarwaa kulya poo.”

⁵Naasa vakasembeya, vakavepoo, veeree soori tawo, vakavasomuta poo ya ulale, shaasa Mose alevavasya.

⁶Naasa Mose kavia Aron na vana valya vakwe “Elieseri na Itamari, Mularefo mirwe yaany indo, nta mularandwe masara any, naambo mulasheefwa, nawe nalasheesukyo ni ironda elyi lyoose, kyeendi vanavamaye vana va, Israeli woose, vavekapa kiiyo kimaruma kya muro yeto Nndumi Iruva awaata.”

⁷Nta mmusomukaa poo ya yeema-fo, naambo mulasheefwa, shamashika mafura yoo a yaamba a Nndumi Iruva mmbo amukaye. Nawo vakatana shaasa Mose avavia.

⁸Naasa Nndumi Iruva karera na Aron kammbia,

⁹“Lola kulasheena mfinyo nta kindo kinangaa, yewe nta vasero vafo-fo, kyeeri ekyo mukeanga yeemeny lyekwananya, naambo mulasheefwa; ivavaso elyi ni lya llung'anu efo marikeny any moose;

¹⁰naasa, naambo mwiidimi irauwa ekyo kyeele neefyo fyan fya mikonu myoose neefyo fikee fitefusu neefyo fiilyise,

¹¹na lyingi mwiidimi ifunda vana va Israeli mavavaso yaa moose, Nndumi Iruva alemurikkya na kana kya Mose.”

¹²Naasa Mose karera na Aron na Elieseri, na Itamari, mmbo vasero ewo vakwe valesaau, Ipoon kiraso ekyo kya nswa kilesaau yoo firasony fya Nndumi Iruva fileniingyo fya muro, mufilye filatiri ntarang'u, yoo kufii na kitara kyeerasya mashika mmbo fikee fyeele deny;

¹³neeni mmbo mushelyiisyaa yoo ando eele, mashika ni usumanu lwafo, na lwa vasero vafo, yoo firasony efyo fiserisyoo Nndumi Iruva na muro, kimmba niindo avavasye.

¹⁴Na kifoya ekyo kyeeringiswa, na kisouwa, mmbo mushefilyaa ando koose alakee kutefuse, Yewe na vasero vafo, na vefu vafo, Mashika mmbo fileniingyo ni usumanu lwafo, na vana vafo, uka kirasony ekyo kya ufoo, fya vana va Israeli.

¹⁵Kisouwa na kifoya, mmbo vafivikaa ando amwi na firaso efyo fyeeserisya na muro, na firaso fya mafura fyerumatwa na muro, naambo five kiraso kyeesisika yoo mbee ya Nndumi Iruva, naasa mmbo fivaa fyafo yewe, na vasero vafo ando amwi neewe, ni usumanu lwany llung'anu, shaasa Nndumi Iruva alevavasya.

¹⁶Naasa Mose karuuya mburu yeyo ya kiraso kya ulyamari deny, nayo, yeemaa ikorwa na muro, nawe kafulukyo kya Elieseri na Itamari, mmbo vana yewo va Aron valesaau kavavia.

¹⁷A nkiki elyi kulore mwalyiiya kiraso ekyo kya ulyamari yoo ando eele, elyi kikee kyeele deny, nawe mmbo alemuniinga elyi mwaipoo uravi lwa ironda elyi, neelyivikya usandi efo kwa Nndumi Iruva?

¹⁸Loleny samu ya vayo nyileendwa ando yoo eele-fo, mmbo kyeemukooye muilyiiye ando yoo eele shaasa shilemuvavasya.

¹⁹Naasa Aron kavia Mose, “Lolate, inu mmbo vaserisyoony kiraso kyawo kya ulyamari, na kiraso kyawo kyeekora kwa Nndumi Iruva; na kindo ekyi mmbo kileshikooya, na kukooye shilelya kiraso ekyo kya ulyamari inu, andesa kyevaa kindo kisenyi kwa Nndumi Iruva?”

²⁰Mose ekiita indo, kairikya.