Read BIBILLYA Mareiyo Meele a Iruva Valevi 13 Bible Online

Valevi 13 - BIBILLYA Mareiyo Meele a Iruva bible

Valevi 13

¹Naasa Nndumi Iruva karera na Mose na Aron kavavia,

²“Kwakooya nndu afumbye yuure, ao kishavere ao kiso kya mwiiliny wakwe, llyo asheendwaa kwa nkohani Aron ao kwa vana vakwe, umwi waawo-da;

³nawe nkohani nashelola waarya kindo ekyo kya mwiili wakwe, na kwakooya malulwi yoo ampaluka, na yoo kulwee kulalolywa, naasany elyo ni ivave, naasa nkohani mmbo allolaa naambe yeu ni ntefusu.

⁴Na kishavere ekyo kibalukye, kwakooya kibalukye lyo kulore kidovye si, na malulwi nalabalukye, llyo nkohani ashevikaa nndu yeto alwee mbai ando a mikonu mfungare;

⁵nkohani nallole ando a mikonu mfungare, naasa kalollya kishavere ekyo kyansalala kilakeeng'ana, llyo nkohani ashellolaase ando a mikonu mfungare,

⁶naasa nkonu wa mfungare nkohani nallolese, naasa kwankooya kishavere ekyo kyamaangwa, kilakeeng'ana, llyo nkohani ashaambaa nndu yeu ni nsha, nasangye soori takwe, naasa mmbo ailyiswa.

⁷Kyeendi kwakooya kiswa ekyo kyankwaana efo mwiiliny na yoora nkohani mwiili wakwe neewona yiilyiswa, mmbo ashooraa nkohani lyingi;

⁸Nkuhani nalole, kwakooya kishavere ekyo kyankwaana, llyo nkohani naambe yelyi ni ivave, ni ntefusu.

⁹“Ndwari ya ivave ikantira nndu, neendwa kwa nkohani;

¹⁰nkohani nallole, na kwankooya kwiiyo kindo kyaa kifumbye, na malulwi ammeepaluka akava maa, na kwakooya kwiiyo nyama shaa imie yoo kufumbye,

¹¹yelyo ni ivave lya kasha lyikee yoo kishong'uny lya mwiili wakwe, na nkohani naambe yo ni ntefusu.

¹²Naasa ivave elyo lyikee yoo kishong'uny nalyo lyikakwaana koose, uka nrwe fika marendeny, shaasa nkohani alollya,

¹³llyo nkohani nalole, kallollyaa ivave mmbo lyikwaani mwiili moose, llyo ashambaa yeu ni nsha ra elyi alwee, mmbo lyammalashika lyikaila, mmbo akee nsha.

¹⁴Kyeendi lyo ando koose ikoyoo nyama mbisi, nndu yeto ni ntefusu.

¹⁵Nkuhani mmbo alolaa nyama yeyo na yaamba, yeu ni ntefusu, na nyama yeyo shivisi nnyo ivave.

¹⁶Na kwakoya nyama yeyo shivisi yaalashika lyingi, neeva shaa, llyo ashesoraa nkohani,

¹⁷nawe nkohani nallole, na kwakoya yoo kulwee kwamba kwaa, llyo nkohani ashambaa nndu yeu nisha.

¹⁸“Na kwakooya mwili wa nndu ulwee yuure lyiwovye,

¹⁹na yoo lyeekai kukafwana kwaa kwiifumbye, ao kukava kiswa kimikaa, kyaa kyeendi kikadodoraa kyaangu, noore nkohani ando yoo.

²⁰Neelyi nkohani alolaa kwankooya kudovye, na malulwi akapaluka, llyo nkohani ashaambaa nndu yeu ni ntefusu, yeyonndwari ya ivave lyilesheya yoo yuuren.

²¹Lyo kwakooya nkohani alola, kalollya malulwi nnyaalashikye nta nkudovye, kyeendi mmbo kukeewova, llyo nkohani ashembikaa mbai ando a mikonu mfungare;

²²na kwakonkooya kikwani mwiiliny, llyo nkohani asheamba nndu yeu ni ntefusu, yelyi ni ivave.

²³Kyeendi kwankooya kiswa ekyo kyaa mmbo kimandi yoo kweni, naasa yeyo n ngoru ya yuure, nkohani naambe nndu yeu ni nsha mmweeremutu.

²⁴“Ao kwakooya mwiili wa nndu utiri ando kukeeya muro, ukavekaau kiswa kidodorye kyaangu, ao kyeelwa,

²⁵nkohani naloleu, na kwankooya malulwi a vayo ammalashika akapaluka nang'u kukadovya, yelyo ni ivave, nkohani naambe ni utefusu yei ni ndwari ya ivave.

²⁶Kyeendi elyi nkohani alola-u kakooya malulwi nalaalashikye, na nta ando yoo kuladoovye, kyeendi kukoora idovya, llyo nkohani ashembikaa mbai ando a mikonu mfungare;

²⁷nallole mikonu mfungare, kwakooya kikwaani mwiiliny, llyo nkohani naambe ni ntefusu, yeu ni ndwari ya ivave.

²⁸Na kwakooya kiswa ekyo kimandi yoo kweni kilakwaani, kikavedovya, lyo mmbo kifumbye alya kweni muro ukai, nkohani mmbo ashambaa yeu ni nsha n ngoru ireraa da.

²⁹“Na lyingi kwakooya nndu Nndumi ao nka alwee yoo nron, ao yoo kyeeri,

³⁰llyo nkohani naloleu, kwakooya kudovye, na kwakooya tiiyo fii tidodorye shifwafwa, llyo nkohani naambe yeu ni utefusu, mashika yelyi niivave lya nrwen ao lya kyeeriny.

³¹Kyeendi kwakooya nkohani alola yoo kulwee kakooya nkudovye nta nkwiiyo fii shuu, llyo nkohani ashevikaa nndu yeto mbai ando a mikonu mfungare,

³²na nkonu wa mfungare nkohani mmbo alolaa ando yoo, na kwankooya kulakwaani, nta kulaiyoo fii tidodorye, nta kuladovye,

³³llyo nndu yeto nootwa fii, kuvewau yoo kulwee, na nkohani navike nndu yeto mbai ando a mikonu mfungare,

³⁴nkonu wa mfungare nkohani naloleu-se, kwankooya yoo kulwee kulakeengera, nta idovya, llyo nkohani ashaambaa yeu ni nsha, nasangye masara akwe kyekweeremuta.

³⁵Lyo kishavere ekyo kwakooya kikee kwaana mwiiliny elyi emmaa yeeremuka;

³⁶llyo nkohani nallole, na kwakooya kikwaani efo mwiiliny, nta nnyakilolaafo fii tidodorye-fo, yeto mmbo akee ntefusu.

³⁷Lyo kankooya kishavere ekyo kiwovye na fii tiiyo shuu, mmbo kyambova, nave ni nsha, na nkohani naambe ni nsha.

³⁸“Kwakooya nndu Nndumi ao nka atiri fiswa fivaramaa efo mwiiliny, fifwani fyaa,

³⁹nkohani nafilole, kwakooya fiswa efyo fiillye kinywa, efyo mmbuva ilentira, ni nsha.

⁴⁰Kwakooya fii tasia nrwen wa nndu, yelyo niiwoya, ni nsha.

⁴¹Kwakooya fii ta nndu tasia nrwen, kisanguny ni iwoya lya mbee nawe ni nsha.

⁴²Kyeendi yoo nrwen yeto utiri iwoya ao yoo iwoyeny elyo lya kisanguny kukankaau kishavere kyeelwa kikadodora kyaangu, yelyo niivave, lyikeesha yoo iwoyeny ao iwoyeny lya kisangu.

⁴³Llyo nkohani nallole na kwankooya kishavere ekyo kikee kyaa needodora-dodora, yoo iwoyeny lya mbee ao lya numa, shaasa kilollyoo efo mwiiliny;

⁴⁴yeto ni nndu atirwa niivave, ni ntefusu; na nkohani naambe indo, kishavere kyakwe mmbo kikee nrwen.

⁴⁵“Na nndu atirwa ni ivave eree soori tirandukye, na fii ta nrwe tirewa indo, nave asikyaa kiromu kya uwe, naongore eshaambaa, shikee ntefusu, nyira.

⁴⁶Kyeeri kyoose ekyo alwee, mmbo akee ntefusu, mmbo akaa muni, ando akwe ni efo poo ya ulale.

⁴⁷“Na soori yeyo isikyaa kishavere kya ivave, kakooya nsoori ya sufu ao kitaani,

⁴⁸ikaokwa ao ikafumwa ao kwakooya ni ya shony ao ya ngata ya shony,

⁴⁹kwakooya kishavere ekyo kifwani mare ao kidodorye, lyikasikywa ni isara lyafumwa ao lyaokwa ao lya shony ao lya ngata ya shony, elyo ni ivave da, nkuti nkohani naorwa,

⁵⁰na nkohani nalyilole, na ulya alwee nashembika mbai ando a mikonu mfungare,

⁵¹nkonu wa mfungare nalole kishavere ekyo, na kwankooya kikee yoombora elyi kisikywa ni isara elyo lya yooka, ao lyeefumwa ao shony ao ngata ya shony, yelyo ni ivave ikasha,

⁵²isara elyo lyikorwa na muro.

⁵³“Na kwakooya nkohani alola kakooya llyikeeyoombora efo sooriny,

⁵⁴llyo nkohani ashevavasyaa soori yeyo nsikye isangyo nawe nambike mbai ando a mikonu mfungare;

⁵⁵numa nkohani nalole, elyi ammaa isangya kishavere ekyo, na kwankooya kulore kyaalashikye fwana, nta yoombora, ni kitefusu, lyikorwa na muro.

⁵⁶Nkohani kallola neekoya kishavere ekyo kyambooka iwovyo lyo ashekisisaa kyuuke yoo sooriny, ao shonyiny, yeyo ikeeshooke ao shifume.

⁵⁷Kankooya mmbo lyikee indo da efo sooriny, ikeshifumi, ao yookwa, ao ya ngata ya sheni, ni ndwari shikasha, isara yeyo ikorwa.

⁵⁸Na isara elyo lyikeeyooke ao lyifume, ao lya ngata ya shony, kulyisangye,

⁵⁹Na kishavere kya ivave kikee sooriny shooke ao shifume, ao lya mgata ya shony, ivavaso lya vayo ni elyi, niisha, ao yaamba niikasha.”