Read BIBILLYA Mareiyo Meele a Iruva Valevi 20 Bible Online

Valevi 20 - BIBILLYA Mareiyo Meele a Iruva bible

Valevi 20

¹Naasa Nndumi Iruva karera na Mose, kammbia,

²Lyingyi via vana va Israeli, nndu moose wa Israeli, ao veny vawo, aniingya Moleki mwana wakwe, nkuti nawaawa, vandu vankape na mawe.

³Neeny mmbo shimbikyaa miso, shimuumbutye kwaasha, mashika elyi aniingya Moleki mwana wakwe naambo natefuse ando akwa eele, neetefusa irina lyakwa.

⁴Na kwakooya vandu vasingira miso valalole ekyo, yoo nndu aniingya Moleki mwana, valambwae,

⁵llyo yeny nshembikyaa miso akwa na vandu vakwe shimuumbutye kwaasha, neewo veellatya, naambo vatuuse na Moleki, vavio kwa mbai na vandu vawo.

⁶Na nndu asora veelafya, na vasavi atuuse nawo, mmbo shimbikyaa miso, shinraue na vandu vakwe.

⁷Kyasia kwiilyiseny, muve veele, mashika yeny ni Nndumi Iruva, Iruva waany.

⁸Tireny mavavaso akwa, Yeny ni Nndumi Iruva shikeemwiilyisa.

⁹Mashika nndu yeto ashaara raa maye ao ndeye nkuti nawaawo; mmbo aarara ndeye na maye, samu yakwe inkaye.

¹⁰Na nndu atuusa na nka wa ungi, yee nka wa ungi, nndu yeto na nka yeto kuti nawaawo.

¹¹Na nndu yeto alalaa na nka wa ndeye mmbo asukkwa ndeye, woose mmbo vawaawo; samu yaawo ivakaye.

¹²Kwakooya nndu alala na varasinda wakwe, woose vavii nkuti vawaawo mmbo vatana kindo kiravi, samu yaawo ivakaye.

¹³Kwakooya nndu nndumi alala na nndumi ungi, shaasa alala na nndu nka, woose ve vavii mmbo vatana uravi, woose vawaawo.

¹⁴Kwakooya nndu aalyika nka na mfu wakwe, woose vararu mmbo vakorwaa muro kutani vafwa muu naambo uravi yelo luuke kwany.

¹⁵Kwakooya nndu alala na ifisi kuti nawaawo, na ifisi elyo lyivewaawo.

¹⁶Na kwakooya nndu nka asora ifisi nalyo, ifisi yelyo na nka yeto vawaawo, samu yaawo ivakaye.

¹⁷Lyingyi, kwakooya nndu oora mfwamaye, mwana wa ndeye, ao mwana wa maye, neesukwa, na nka yeto kalollya, nkindo kisha, mmbo vashevikwaa kwaasha na vandu vawo, mashika mmbo asukwa mfwamaye, nkuti nakurike uravi lwakwe.

¹⁸Na kwakooya nndu alala na nka akee mwiiriny, woose nkuti vavikwa kwaasha na vandu vawo.

¹⁹Kulasukwe mfwamau mwana wa mau ao wa ndoo, mashika nndu sheeto mmbo asukwa nndu wakwe, mmbo vakurikaa uravi lwawo.

²⁰Na nndu kalala na nka wa nsero wa kyekuye, mmbo asukwa nsero wa kyekuye; mmbo vakurikaa uravi lwawo, mmbo vafwaa valaira mwana.

²¹Na nndu karwaa nka wa mwanamaye, ni uravi, mmbo asukwa mwanamaye; mbatiraa vanafo.

²²Kyasia, ringeny mavavaso akwa moose, na usumanu lwakwa, naambo uruka elo efo nshemufitaa, lulamuleme.

²³Mulasore mikaaye ya vandu yewo shilevaumbuta mbee yaany, mashika wo mmbo valetana indo neeny shavasua.

²⁴Lyo mmbo shamuvia ni yeni, mushetira uruka lwawo, shimuniinge muishilye yeni, nalo ni uruka lwa malela na uki, yeny ni Nndumi Iruva, Iruva waany, shilemuuta efo vanduny va masanga.

²⁵Kimmba niindo nkuti murauwe ekyo kisha neekyo kikasha, ndeye shisha neeyo shitefusu, ao findo efyo fiishwe urukeny, shamoora yeni sheelyi mfitefusu,

²⁶neeni mmbo mushevaa veele kwakwa yeny, mashika elyi yeny Nndumi Iruva shikee mweele, shamuuta efo vanduny va masanga, naambo muve muye yakwa.

²⁷Kwakooya nndu nndumi ao nndu nka alafya, ao akee nsavi, nkuti nawaawa, vakapwa na mawe, samu yawo ivasheye veni.