Read BIBILLYA Mareiyo Meele a Iruva Valevi 23 Bible Online

Valevi 23 - BIBILLYA Mareiyo Meele a Iruva bible

Valevi 23

¹Naasa Nndumi Iruva karera na Mose, kammbia,

²“Rera na vana va Israeli kuvavie, mikonu ya Nndumi Iruva musheivambisaa ive ni miindye myeele, ni sukukuu takwa.

³Rundeny mashora mikonu irindaru nsi, kyeendi nkonu wa mfungare ni nkonu wa yiimuya deny ni nkonu wa yiindya Iruva, mulasheerunda nta ishora lyimwi-fo, n sabato ya Nndumi Iruva fyeeri fyany fyoose”

⁴Sukukuu ta Nndumi Iruva nto eti, ni miindye myeele, yeyo musheivambisaa fyeeri fyoose.

⁵Mwiiri wa mbee, nkonu wa ikumi na kaana kyeeri kya nkwaany, ni pasaka ya Nndumi Iruva.

⁶Na nkonu wa ikumi na karaanu ya mwiiri yeto mweni ni sukukuu ya Nndumi Iruva ya nkate ulatiri ntarang'u; neeni mulye nkate yeto ando a mikonu mfungare.

⁷Nkonu wa mbee ni wa miindye myeele, mularundaa nta ishora lyimwi.

⁸Lyo mmbo musheserisyaa Nndumi Iruva kiraso muro ando a mikonu mfungare, nkonu wa mfungare m miindye yeele mularunda nta ishora lyimwi-fo.

⁹Naasa Nndumi Iruva karera na Mose kammbia,

¹⁰“Rera na vana va Israeli, kuvavie, kyeeri ekyo mushaangaa urukeny yelo nshemuniingaa, na yuulula fimu fya vayo, llyo musheengye nkohani waavi lwa fimu fyany fya mbee;

¹¹nawe narinyise kiraso ekyo mbee ya Nndumi Iruva naambo kiwaryo mmbwe, nkonu wa kavii numa ya sabato llyo ashevikaa-u kiraso ekyo.

¹²Na kyeeri mushendee firaso fya fimu, musheseserisya-u na ngurana ya suva shisha ya mwaaka umwi ive kiraso kwa Nndumi Iruva kyeekora na muro.

¹³Na kiraso kyakwe kya nswa n fyenga fivii fya ikumi fya kibaba kya nswa nsiise, ukeensande na mafura ni kiraso kyakwe kyeena ni mfinyo lita imwi (shupa ivii).

¹⁴Neeni mulalye nkate, nta piisi-fo, nta fyaa fikoo, kufike nkonu yeto mweni, elyi musheendee kiraso kya Iruva waany; elyi ni ivavasyo lya llung'anu fyeeri fyany fyoose.”

¹⁵“Neeni uka nkonu wa kavii elyi sabato yamiira, uka nkonu yeto muleende kiraso ekyo kya fimu kwa Nndumi Iruva, kutani takooya sabato mfungare;

¹⁶elyi nkonu wa kavii wa sabato yeyo ya mfungare mweekene mikonu makumi araanu; llyo musheserisya Nndumi Iruva kiraso kya nswa mwiiya.

¹⁷Muveuta mikate ivii ive fyenga fya ikumi fivii fya kibaba ive ya nswa nsiise, usongosyo utiri ntarang'o kive kiraso kya mbee kwa Nndumi Iruva.

¹⁸Neeni lyo, ando amwi na mikate yeyo, muserisye-u ngurana mfungare ta suva, shisha ta mwaaka umwi, na shau imwi, na suva ivii, five kiraso kwa Nndumi Iruva kyeekora na muro, ando amwi na kiraso kyawo kya nswa, kyeena, nkiraso kya nrungo nsha kwa Nndumi Iruva kyeekora na muro.

¹⁹Neeni muserisye-u mburu imwi ive kiraso kya ulyamari, na ngurana ta suva ivii ta mwaaka umwi, shisha nkirasso kya ufoo.

²⁰Naasa nkohani narambikye-u mikate yeyo ya kiraso kya mbee kwa Nndumi Iruva, ando amwi na ngurana tilya ivii ta suva fivikwa fyeele kwa Nndumi Iruva, five fya nkohani yeto.

²¹Neeni mmbo mushekapaa weele nkonu yeto mweni, vandu vasheyiindya, mularundaa nta ishora lyimwi; elyi ni ivavaso lya llung'anu lyikee lya marika any moose.

²²Na elyi musheilulaa fimu fyany, kulailule kumae-fo piny-fo nta filya fiwaa si mularorwe-fo, mmbo kuraa-fo kimaruma kya nndu yeto nkiva, na muny, yeny ni Nndumi Iruva, Iruva waany.”

²³Naasa Nndumi Iruva karera na Mose, kammbia,

²⁴“Rera na vana va Israeli, kuvavie, nkonu wa mbee a mwiiri wa mfungare, mmbo musheemuyaa deny, ni nkonu weekapa maranda m miindye myeele.

²⁵Mularunde nta ishora lyimwi-fo, mmbo musheserisyaa Nndumi Iruva firaso fyeekora na muro.”

²⁶Numa Nndumi Iruva karera na Mose, kammbia,

²⁷“Lyo nkonu usandi; uve nkonu mweele kwany, mukuvinise, muserisye Nndumi Iruva firaso fyeekora na muro.

²⁸Mularunde nta ishora, lyimwi nkonu yeto-fo, mashika ni nkonu wa usandi, mukooye mbee ya Nndumi Iruva, Iruva waany.

²⁹Mashika kwakooya nndu nalakotoya nkonu yeto, mmbo ashuumbutyoo kwaasha na vandu vakwe.

³⁰Na nndu moose yeto asherundaa ishora nkonu yeto, nndu yeto mmbo nshenrumataa nooke efo vanduny vakwe.

³¹Mulasheerunda nta ishora lyimwi-fo; ni ivavasyo lya llung'anu efo marikeny any moose.

³²Ni sabato yaany ya yiimuya deny, mukootoye, nkonu wa keenda wa mwiiri, nkwaany, pookya nkwaany fika nkwaany, muringe sabato yaany.”

³³Nndumi Iruva kawuya irera na Mose, kammbia,

³⁴“Rera na vana va Israeli, uvavie, ‘Nkonu wa ikumi na karaanu wa mwiiri yeto wa mfungare, n sukukuu ya matengo muvikye Nndumi Iruva ando a mikonu mfungare.

³⁵Nkonu wa mbee ni miindye; mularunde nta ishora lyimwi-fo.

³⁶Mmbo musheserisyaa Nndumi Iruva kiraso na muro ando a mikonu mfungare mfiraso fyany, na firaso fya kyaasa, na firaso fya pya, efyo mukundye yuutya Nndumi Iruva.’

³⁷“Sukukuu ta Nndumi Iruva nto yeti, nato mushetivambisya vandu vashe miindyeny, musheserisa Nndumi Iruva firaso na muro, firaso fyeekora na muro, firaso fya nswa, firaso fya fyeena, wo kiraso na nkonu wa vayo;

³⁸mmwasi ya sabato eto ta Nndumi Iruva, na firaso fyany, na firaso fya pya efyo musheniingyaa Nndumi Iruva.

³⁹“Lyo nkonu wa ikumi na karaanu ya mwiiri wa mfungare kyeeri mwammaa yiilula fimu, llyo muvikye Nndumi Iruva sukukuu ando a mikonu mfungare; nkonu wa mbee ni wa yiimuya deny, na nkonu wa nyanya ni wa yiimuya deny.

⁴⁰Iboony ndunda ta miri misha, nkonu yeto wa mbee na marava a myaangashi, mufurye Nndumi Iruva, Iruva vaany, ando a mikonu mfungare.

⁴¹Mmbo mutira sukukuu ya Nndumi Iruva mikonu mfungare mwaakeny ni ivavaso lya llung'anu ngyeeri tany toose; nyiishaaluka mwiiriny mbwa mfungare.

⁴²Kaeny efo matangilony ando a mikonu mfungare, vandu woose va Israeli;

⁴³naambo marika moose a Israeli amanye mmbo shilemuvika matangilony, llya shilemuuta Misri, yeny ni Nndumi Iruva, Iruva waany.”

⁴⁴Nawe Mose kavia vana va Israeli kya sukukuu yeto ta Nndumi Iruva.