Read BIBILLYA Mareiyo Meele a Iruva Valevi 25 Bible Online

Valevi 25 - BIBILLYA Mareiyo Meele a Iruva bible

Valevi 25

¹Naasa Nndumi Iruva karera na Mose alya ifumbuny lya Sinai, kammbia,

²Rera na vana va Israeli kuvavie, Elyi musheangaa efo urukeny yelo nshemuningaa, llyo uruka yelo lusheindyaa sabato ya Nndumi Iruva.

³Ronga nnda wafo ando a myaaka irindaru, kuremyi nnda wafo wa misabibu, kwiilule ndunda ta vayo;

⁴lyo mwaaka wa mfungare n sabato ya nnda yiimuya deny efo urukeny elo, nsabato ya Nndumi Iruva, kularonge findo fiiya-fo, nta yaambuya nnda wa misabibu-fo.

⁵Yekyo kyamya kyeni nta kulakyiilule-fo, nta sabibu eto tilakeeshiremye kulatiilule-fo, yeto m-mwaaka wa yiimuya deny efo urukeny yelo.

⁶Na sabato yeyo nshoonga kwany, kwafo yewe, na ishinga lyafo, na kishinga kyafo, na kwa ndundi arundaa, na kwa muny yeto akee neewe,

⁷na kwa ndeye tafo, na findo fyeevikya fyafo, efyo fyoose mfyo fivaa shoonga yafo.

⁸Nawe neekyene myaaka mfungare, mashika myaka mfungare ka mfungare; mmbo ivaa mikonu ya myaaka kwany, ive myaaka makumi aana na kyeenda.

⁹Llyo kushekapaa iranda elyo taari toose lyitiri unyanga waasha, nkonu wa ikumi wa mwiiri wa mfungare, nkonu yeto wa usandi mmbo mushekapaa iranda urukeny koose.

¹⁰Na mwaaka wa makumi araanu mmbo mushewaallwaa mweele, mukape weele lweeleka vandu mashinga kwa woose vakee efo urukeny, yeyo ni yubile kwany, llo wombe lukapwaa lyimwi wo myaaka makumi araanu, na wo nndu nandesaiya efo ukuuny lwakwe.

¹¹Mwaaka yeto wa makumi araanu uve ni yubile kwany, mulavaaye mbeu nta yiilula kindo kyamya kyeni, nta iyaya sabibu yeto kulaore nshaambuye-fo.

¹²Kimmba ni yubile mmbo uvaa mwaaka mweele kwany, mmbo mulya fimu fya mareminy filya filemmya feni.

¹³Mwaaka yeto wa yubilee wo nndu mmbo awuyaa na urukeny lwakwe.

¹⁴Na kwakooya kwakumbya nndu kindo, ao kwakooya koora kindo kwa nndu ungyi, mulalembe-fo;

¹⁵na myaaka yeyo yasorya yubile, niindo kushuuraa kwa nndu ungi, na meekena a myaaka ya fimu niindo ashekukumbyaa yewe.

¹⁶Kiinani na yeekyena lya myaaka, niindo kushengeraa wuuru, mashika we mmbo akeekukumbya, na kwakoya myaaka mmyaangu niindo da asheanguraa wuuru.

¹⁷Nta mulakulembe-fo; lyo indya Iruva wafo, mashika yeny ni Nndumi Iruva, Iruva waany.

¹⁸Kimmba niindo latyeny mavavaso akwa na usumanu lwakwa, mwiidimi isinda na ufoo urukeny.

¹⁹Elyi uruka lusheutaa fimu fya vayo, lyeny neewuura, mukukaye-fo na ufoo.

²⁰Lyo kwakooya mwaamba, “A mwaaka wa mfungare nkyoki lushelyaa? Loleny-te, lluvayaa mbeu-fo, nta isanyirya-fo;

²¹llyo nshemoolotyaa mbora yakwa imusheye mwaaka yeto wa karindaru, nato usheendee ndunda ta myaaka iraru.

²²Na mwaaka wa kaana llyo muvaaye mbeu, ndunda tilya, tilya mweesurumye, mukooye mwaaka wa keenda, elyi ndunda ta vayo tishendwaa neefo mmba, mulye efyo mweesurumye.”

²³“Uteeri llutiri muumu weekumbwa-fo, mashika sumbai nnyakwa; neeni mukaa-fo ni va kyaaro na veny vakwa.

²⁴Ni yeni mushewouwaa uruka, efo ushilyiny lwany.

²⁵“Kwankooya mwanamau aanguywa, kakumba kyaawu kyakwe, llyo yeto akwaani nawe mmwasi asheshaa naviire kilya mwanamaye enkumba.

²⁶Na kwakooya nalatiri mwiiviira, nawe kakooya antira kyamaa iviira;

²⁷llyo asheekena myaaka yammirau uka elyo kikumbwa, neekyo kyeelanyau naviirye yeto aleura; nawarye ando akwe.

²⁸Kyeendi nalammiidima iviira we muni, llyo ekyo alekumba kikaa maakony a yeto alekiura ufike mwaaka wa yubile; llyo nashewuiya ando akwe.

²⁹“Na kwakooya nndu akumba mmba yeekaa, ikee muriny uringityo ni isimamba, mmbo atiri usumanu lwa yiivira ando a mwaaka umwi uka llya aleikumba; mmbo atiri kuti ya yiiviira ando a mwaaka umwi.

³⁰Kyeendi ilambirwa ando a mwaaka umwi, llyo mmba yeyo ikee muriny utiri isimamba ivikyoo kiringisyo deny ive ya yeto aleyuura marika akwe moose, nta yoo yubileny nnyaviiryoo-fo.

³¹Lyo mmba ta efo fyuungony, filakee firingitye ni isimamba, nkimwi na nrema ta uruka, to tishidimaa iviirwa, kyeeri kya yubile.

³²Ando amwi neefyo, miri ya Valevi, mmba tikee maakony awo, Valevi vatiri muumu wa itiviira kyeeri kyoose.

³³Na lyingi kwakooya nndu wa Valevi aviira mmba, llyo mmba yeyo na muri yeto ishevirwaa mwaaka wa yubile, mashika mmba yeto ta miri ya Valevi mmbo tikee tawo kulu efo kwa vana va Israeli.

³⁴Lyo kundo kwawo kwa yiisa findo kulakumbwa tara-fo; mashika ni lwawo deny.”

³⁵“Na kwakooya mwanamau ni nturi, kava nkiva yoo nyanuny kwafo mweekye, kwallollya sha muny na nndu wa kyaaro.

³⁶Kulande iwona mbusha kwakwe-fo, mmbo kushiirikyaa ekyo Iruva aamba, mwanamau nakukaye neewe.

³⁷Kulanninge fesa yafo naambo kuwone mbusha kwakwe-fo, nta kulanninge shoonga tafo numa nashekuviirya-fo,

³⁸Yeny ni Nndumi Iruva, Iruva wafo, shilemuuta urukeny lwa Misri, shimuninge uruka lwa Kanaani luve lwany, neeny shive Iruva waany.”

³⁹“Na kwakooya mwanamau ammba nkiva kakunda kumuure, kulankallye sha ishinga-fo;

⁴⁰kwafo nave sha nndu wa mashora-da, ao sha nndu wa kyaaro, nakurundye fika mwaka wa yubilee,

⁴¹llyo nooke kwafo nakweengye, we na vana vakwe, nawuuye vandu vakwe, na vakuu vakwe.

⁴²Kimmba yewo vakee ni vasero vakwa, shileveende shivauta Misri, valasheekumbwa sha mashinga-fo.

⁴³Kulavashillye na finya-fo; mmbo kushaaranyaa Iruva wafo.

⁴⁴Na kya mashinga afo na fishinga fyafo, efo vanduny yewo va masanga vamuritye mfo musheuraa mashinga na fishinga.

⁴⁵Neefo vaneny va veny vany muure-fo, neefo vanduny vawo vakee kwany, valeveerya efo urukeny lwany, wo vakee maakony any.

⁴⁶Nawo vave sha umasi lwa vana vany va numa, vakae maakony awo, mikonu myoose muwonise-fo mashinga, lyo vanamaye vany mulavashillye na finya-fo, mmbo vana yewo va Israeli sho.

⁴⁷“Na lyingi kwakooya nndu muny akee neewe ava isimba, na mwanamau akee kufii neewo kava nkiva tupu, kwakooya akukumba kwa muny yeto, ao kwa nndu yeto ungi akee kwafo, ao kwa ufyari lwa nndu yeto muny,

⁴⁸numa ashidimaa iviirwa nndu wa kwakwe atiri muumu wa imbiira;

⁴⁹ao nsero wa kyekuye, ao mwana wakwe, atiri muumu wa imbiira, ao nndu ungi moose akwaani nawe, atiri muumu wembiira, ao kwakooya we muni ambonisa masaa, atiri muumu wa ikuutafo we muni.

⁵⁰Mmbo ashekapaa meekena ando amwi neeto alemuura, kupookya mwaaka yeto kukooye mwaaka wa yubile na wuuru lwa yuurwa lyakwe mmbo lyishevaa sha myaaka yeyo, nakae nawe sha nndundi wa mashora.

⁵¹Na kwakooya isaayeu myaaka miingi, shaasa yeekyena lyakwe lyikai niindo ataa yeekyena lyeewowowa lyakwe na lya fesa eto eurwa nato.

⁵²“Lyo kwankooya m myaaka myaangu-da isaayeu, kufikye mwaaka wa yubile, nakape yeekyena nawe, shaasa myaaka yakwe ikai, navetaa, indo kya ilekwa.

⁵³Na kwakooya ni nndundi wa mashora, ni indo ashekaa nawe, nalanshillye na finyafo.

⁵⁴Na kwa kooya ni nndu nalandelekwa indo shaasa kyaambawa, mwaaka yeto wa yubile nalekwa, we ando amwi na vana vakwe.

⁵⁵Kimmba vana va Israeli ni varundi vakwa shilevaende vauke kulya urukeny lwa Misri; yeny ni Nndumi Iruva, waany.”