Read BIBILLYA Mareiyo Meele a Iruva YEREMIA 14 Bible Online

YEREMIA 14 - BIBILLYA Mareiyo Meele a Iruva bible

YEREMIA 14

¹Irero lya Nndumi Iruva lyesheya Yeremia kya iwwo mmbwa:

²“Yuda nnyakeiffwa na ngyiri takwe ntikeideeka; vandu vakwe mbakeeikwalala yefo si, na kyiyyo kya Yerusalemu kyanrwa na uwe.

³Vasongoru vakwe mbarumaa mashinga awo mura; akasha fika firoriny, akauwa mura, akaviira matete aruu, eesukkywa na isaukwa, akasikkya mirwe yaao.

⁴Elyi mmbwa ileefo, na sumbai ikakaluka, veerema vakafwa nrima deny, vakasikya mirwe yaawo.

⁵Naakwa nngoroshony sarya yamfeiya-fo, ikara-fo ngurana elyi mare naleefo.

⁶Na itiko nalyo lyikasalala uwe ya kidooro, lyikafura mmbwa sha iparwe nta miso avayo nnyalollye-fo, mashika elyi mare naleefo.

⁷‘Lla neelyi uravi lweru alollyo paa, Lweekye-dwa woi Nndumi Iruva, kyeendwa ni irina lyafo; mashika ni keengyi lwankukapa mungo, lukakulyamarya.’

⁸Ni yewe kukee ngarami ya Israeli, nkyira waawo kyeeri kya ikyiva, A nkiki elyi kukee sha muny urukeny lweru, sha nndu wa kyaaro wa nkonu umwinsi?

⁹Nkyikyi elyi kwavaka nndu mweerei ashiraa, ao sha nsikari nalakitiri finya yekabana? Lyo dede Nndumi Iruva kukee neese na llukesendwa na irina lyafo; kulalure-fo mmbe.”

¹⁰Nndumi Iruva mmbo arera indi kya vandu yeva, “Mmbo valangye iraraa na shia, nta mbafiisa ngayo-fo; kweekyo Nndumi Iruva nnyavakunndye-fo, ulaalu nnyakummbwa uravi lwawo navakape kya ulyamari valetana.”

¹¹Nndumi Iruva kashivia: “Kulashitereve sheekye vandu yeva-fo.

¹²Naakwa vakootoya, nshishearanyaa kyiyyo kyawo-fo. Naakwa vashirasya na iningya fimu fya soko, nshivaarannya-fo; indi mmbo nshevarumataa na usu, na shaa na ndwari sheeresi.”

¹³Naasa shaamba, “Woi Nndumi Iruva Mwishillya, lola, vakisuku mmbo vakeevia vandu, ‘Mmulollya fira nta shaa-fo, mashika mmbo kuwaniingye kyaasa sheelyi mmbo mushewonisaa urilalyi urukeny lwany.’”

¹⁴Lyo Nndumi Iruva kashirouwa kaamba, “Vakisuku mmbo vakeyaawuya fisuku fya wongo na irina lyakwa; nta nshilevaruma-fo, nta nshilevavasa kindo nta irera nawo-fo. Mmbakee yaawuya moorya a wongo, ilollya lyilatiri udede, makusaro a mirwe yaawo veni.

¹⁵Kweekyo Nndumi Iruva aamba indi kya vakisuku vakeeyaawuya fisuku na irina lyakwa kulare shilevaruma, na yewo vakeeyamba, ‘Usu na shaa nfisheyaa uruka yelu-fo;’ Vakisuku yewo mmbawawaa ni usu na shaa.

¹⁶Na vandu yewo vakeevaawuya mmbashewoyywa shieny ta Yerusalemu nshaa na usu, valatiri mwiivarika wo, vaka vawo, vana vawo va womi na va kyika. Mashika nshikevaletya uraravi lwawo.”

¹⁷Mmbo kushevaviaa marero yaa, “Reny miso akwa neerite misoru kyio na nsanyiny, nalamandaa, kya mwana wa kyeny va vandu vakwa ankapwa kyuumu na kyishavere kyiniini.

¹⁸Elyi shalola efo mareminy, mmbo shilollye-fo minying'a ya yewo valewaawa na usu! Na kwakooya shaanga muriny lola, ndwari ta shaa tiifo! Mashika nkisuku amwi na nkohani mmbakeekapa mbusha tawo efo urukeny, nta valaishi kindo vakeetana.”

¹⁹A Nndumi Iruva mmbo kwammiisitya Yuda deny? A nrima wafo mmbwammiswa Sioni? A nkyikyi mbee elyi kulevavisa indo kuleefo nri wa ilushiisa? Mmbo lweevika nsia wa iwona unapwe, lulawoni nta usha lumwi; lukavera ishia-dwa, indi lukawoywa ni isaukwa.

²⁰Lwammanya makasha eru na uravi lwa vamiku veru woi Nndumi Iruva, mashika lulekulyamarya.

²¹Kyeendwa ni irina lyafo kulalulemi deny-fo; nta kulaipale kitima kyafo kya itumbe; kummbwa, nta kulafishe mma yafo neese-fo.

²²A mmbo kwiifo nta iruva lyimwi lya wongo nnang'ani ya maruva yoo a masanga lyishiidimaa yeende mmbwa? Ao ngyina ishidimaa yeende mmbwa? A nshi yewe woi Nndumi Iruva weeru? Lukuvikkye nsia, mashika nnyewe kutanaa findo yefyo fyoose.