Read BIBILLYA Mareiyo Meele a Iruva YEREMIA 15 Bible Online

YEREMIA 15 - BIBILLYA Mareiyo Meele a Iruva bible

YEREMIA 15

¹Nalyo Nndumi Iruva kashivia, “Naakwa Mose na Samweli vesalalaa vashitereve, nta nrima vakwa mmbukyiindukyaa isanga elyi-fo. Woombute wooke usanguny lwakwa, vare veende!

²Neelyi vakuvesaa, ‘Nkwi lusheenda?’ Mmbo kuvaviaa sheelyi, ‘Nndumi Iruva aamba indi: Yewo va ndwari, mmbo wawaawaa ndwari, va usu, wawaawa ni usu; yevo va shaa, wawaawa nshaa, na mifungwa mmbo washiipowaa mifungwa.’”

³Nndumi Iruva aamba mmbo shivarumyaa ngata yiinya ta veelyamara: usu lwa ishisha, fite fyeerattwa na ndeye ta nginii-u na mafisi a ngoroshony eerattwa na ilyamara.

⁴Nsivaallwa yauta lya ngumangyi ta uruka kya yekyo Manase mwana wa Esekia, mangyi ya Yuda aletannya Yerusalemu.

⁵“A mmbi akulyilyaa yewe Yerusalemu ao akukayaa rembo kyiyyony? A mmbi yeto ashella numa nashekulyillyaa?

⁶Mmuleshilema na yeengyera ishikapa mungo, ni Nndumi Iruva aamba; kweekyo shammoorrwa woko lwakwa shimumamite; nshammaaraa imulyillya.

⁷Nshambafifina neesisika na rato yoo ngyiriny ta uruka; nshilevakapa, shamamita vandu vakwa, mbekurya-fo,

⁸vaka va ding'u vamfumbuka ngota yeekyena lya nsanga va mbai ya yeeve; sheengye vamaaye va vasoro mwiilyamara nsanyiny kyere, shavatuullya usu na isavaa pari-pari.

⁹Nka airye vana mfungare keetwa usu, kauma, kyeende sa kyakwe kyamooloka nsanyiny kyere, kasukkywa na yiipalwa. Na yewo vesaa nshiveerya usu lwa valeyiduva vawo, ni Nndumi Iruva aamba.”

¹⁰Woshiny llwakwa, maaye wakwa eshiira nndu wa kyirumo na uruka loose! Nshilemmaakuya nndu shiwone-fo kyindo, nta nshileakuywa ni nndu-fo, indi woose mmbakeeshidenga.

¹¹Woi Nndumi Iruva, ra kyive indo, kwakooya kulaore shilekufuuya kyisha kyawo, na kwakooya kulareshilekooshora ando a vakyiduva vakwa kyeeri vekee ukyiveny na sa ya yaatarika lyawo.

¹²A nndu nnyafishaa minya, minya ya taari ya ndoo na arera?

¹³“Umasi lwafo na masaa afo nshi ararataa ruu, kya ulyamari lwafo ushilyiny llwafo loose.

¹⁴Shikwaallwe ishinga lya vakyiduva vafo urukeny lweny, kulalwiishi, mashika nyashi yakwa yammaaka muro ularumywa llung'anu.”

¹⁵Woi Nndumi Iruva yewe kwiishi fyoose; shikummbwa na kwashisheya, kwashitaiyya kyiduva veeshilyilyisa. Kulakunnye kwaasha kya ilyilya lyafo-fo; manya ni kyimaruma kyafo shikeiipalwa.

¹⁶Marero afo elollwa na yeny shaalya, akaaluka ifura na ikunda lya nrima wakwa; mashika nshikee va irina lyafo woi Nndumi Iruva wa matorito.

¹⁷Nshekaa ikwaanuny lya veetiri ifura-fo, nta ifura-fo nshekaa shimuni, kyeendwa ni woko lwafo lweshirovye mashika ya ivavyo nnyashi.

¹⁸A nkyikyi mavavywa alashaanngwaa, nta fishavere filawoni nri, fyallema ishya? A nkushiviyaa usoka lwa ikunang'ara na mura ulakaa?

¹⁹Nndumi Iruva aamba; “Kwakooya kwakurya shikuviraa kushesalala mbee yakwa. Kwakooya mmbony shaantu tilakee ta mwaala, nkushevaa kana kyakwa. Wo mmbashekwiindukyaa nshi yewe kuvaindukyaa-fo.

²⁰Na yeny mmbo shishekwaallwa ulale lwa arera; vashekabana neewe indi valakwiidimi, kya elyi shikee neewe shikutauwe na ikukyira, ni Nndumi Iruva aamba.

²¹Yeny nshikukiraa wokony lwa iraamii na ikukyira nreiyony wa veeresi.”