Read BIBILLYA Mareiyo Meele a Iruva YEREMIA 16 Bible Online

YEREMIA 16 - BIBILLYA Mareiyo Meele a Iruva bible

YEREMIA 16

¹Irero lya Nndumi Iruva lyikashisheya lyishaamba,

²“Nkushooraa nka, ao iwona mwana, ave va womi ao va kyeny wooka urukeny elu-fo.”

³Ni indo Nndumi Iruva aamba, kya vana wa womi na vana wa kyeny ewo vewonikye kunu urukeny elu, na vamaye na vandeye ewo vevawonnya kunu urukeny elu.

⁴Mmbo vashewaawa ni ndwari shikasha. Mmbalollya nndu avayiiyya nta ivarika-fo, mmbo vasheva sha kirashi efo sumbai, mmbo vashemamitwa ni usu na shaa, na minying'a yaawo isheva shoonga ya ndeye ta nginiiu na mafisi a ngoroshony.

⁵Mashika mmbo Nndumi Iruva aamba: “Kulasheyaanga mmba kundo vafiiywa, nta yeenda iiya amwi nawo nta ivayiiya. Mashika mmbo shansoka vandu yeva urilalyi lwakwa, ni Nndumi Iruva aamba ukundi lwakwa na isarya.

⁶Woose vaniini naakwa mmbadu elyi vashefiiya kunu urukeny elu mmbasherikwaa nta nkushelollywa nndu wa ivayiiya ao ifinga na ikumamanya ao yuuta fii kyimaruma kyawo-fo.

⁷Nkwiifo nndu ashevafishya kyenga kya nkate yewo vakeiya kyimaruma kyeevavirya muu yewo vafiiywa nta ivaniinga kyikombe kya mura weena ndeye ao maaye-fo.

⁸Mmushaanga mmba mukee rembo mulye neena kyimwi neewo vafiiywa-fo.

⁹Mashika ni Nndumi Iruva wa matorito, Iruva wa Israeli aamba: Mbee ya usangu lwany na kyeeri ekyi kya mikonu yaany nkushekaa kuitiwa nndu akeefura ao nndu akeeseka-fo, ao unyanga lwa nka ao nndumi wa walyi-fo.

¹⁰Kyeeri kushevia vandu marero yoo moose, nawo vashekuvesa, ‘A kyikyi Nndumi Iruva alurikkya ngapo ing'ani indi uwe yeeru? Ni ukasha-ki lwatana? Ni ulyamari-kyi lwatannya Nndumi Iruva, Iruva weeru?’

¹¹Neewe mmbo kushevavia ‘Ni kyimaruma vandeye vany valeshimina yeny, ni Nndumi Iruva aamba, vakalatya maruva engyi vakaarunndya na iyaiinndya vakashimina yeny nta mmbaletira mavavaso akwa-fo

¹²neelyi mwantana makasha mukailannya vandeye vany, mashika wo umwi mmbo akeelatya ekyo akunda, na ilema ishaarannya yeny.

¹³Kweekyo mmbo shimwaanta kunu urukeny yelu shindemwurwaa urukeny kundo muleeshi nta vandeye vany, mfo kundo munderunndya maruva engyi kio na nsanyiny; mashika nshimulollya usari-fo.’”

¹⁴Kweekyo, aranyiny, mikonu ikeesha, kulakyaambawa lyingyi, Iruva eefo na muu yeto aloota vana va Israeli kulya urukeny kwa Misri.

¹⁵Indi Iruva eefo na muu, yeto aloota vana va Israeli wooka urukeny lwa taari ya ndoo na ngyurukeny tingyi shoose kundo veekai. Mmbo shishevaviira urukeny lwawo veni llwa shenniinga vandeye vawo.

¹⁶Nndumi Iruva mmbo aamba, “Lola shikeekurummya veereiya makunga, nawo vashe itira vandu yewa; numa ya vayo shishemurumya veereiya neeyaasa mafisi a ngoroshony efo mafumbuu na wo kidooro na efo mbageny ta mawe.

¹⁷Mashika miso akwa mmbo alollye wo kindo vakeetana; kuleefo kindo kyikee kisurumi kwakwa, nta kuleefo kindo miso akwa akeemasurumi. Ulyamari lwavo loose mmbo lukee paa mbee yakwa.

¹⁸Neeny mmbo shikeendevataiya kavii kyimaruma kya mitannya yaawo, mashika elyi valetefusa uruka lwakwa na minying'a ikwaani koose efo ding'u ya uruka lwakwa.”

¹⁹Woi Nndumi Iruva, finya yakwe na turuve yakwa, kyirishony kyakwa kya nkonu wa nkyiva, masanga mmbo akusheyaa ooka taari toose ta uruka veeshaamba: “Vamiku veru mmbatiri ding'u ingyi kuuta-fo wongo-fo, findo fya mwaala filatiri mbusha.

²⁰A nndu ashiidimaa isongosya maruva akwe? Yoo nshi maruva-fo.”

²¹“Kweekyo, lola nshivamanyisya lyimwi-nsifinya na wiidimi lwakwa, llyo vashemanyaa irina lyakwa ni Nndumi Iruva.”