Read BIBILLYA Mareiyo Meele a Iruva YEREMIA 17 Bible Online

YEREMIA 17 - BIBILLYA Mareiyo Meele a Iruva bible

YEREMIA 17

¹“Ulyamari lwa Yuda llukeureiyye na kalamu ya minya; na ivveyywa na nrwe va alumasi miriminy yaawo na mbembeny ta fitara fyeerasya,

²nelyi vana vawo vakummbwaa fitara fyawo fyeerasya fya maashera mbai ya wo nri mmbisi na wo kyidooro kyaasha,

³mafumbuu efo nng'alo. Umasi na masaa afo moose shiniingya namamitwa kya ulyamari lwafo uruka lwa ushilyi lwafo.

⁴Nkushelekeya ding'u yafo ilya shikuniinga, shikwaallwe ishinga lya vakyiduva vafo urukeny lany, kulalwiishi, mashika nyashi yakwa ni yammaaka muro ularumywaa llung'anu.”

⁵Nndumi Iruva mmbo aamba, “Mmbo akeen-denge wo nndu avikkye nndu va vandu nsia, aaluye nndu ni ngarami yakwe, na nrima vakwe ukakapa Nndumi Iruva mungo.

⁶Nnyavakye usaka lwa kasa koomu, nnyalollya kyindo kyimwi kyisha kyansheya-fo. nnyakaa ando kuumu mwasi yefo kasa koomu, urukeny lwa shumbi lulakaoo ni vandu.

⁷‘Ngoma ni nndu avikkye Nndumi Iruva nsia, yeto nsia vakwe ni Nndumi Iruva.

⁸Nnyavakkye nri nronge mbaambaa ya mfongo, mmbo veetaa miraari ya vayo mfongony, ulasheereya mwi mashika maru avayo nalanaa nta isaukwa kyaangeny, mashika ulemwaa ivika ndunda ta kyeeri kya vayo-fo.’

⁹Nrima va nndu mbutiri ulembi, ukailannya findo fyingyi fyoose, mmbutiri ukunang'ari deny a mmbi aumanyaa?

¹⁰‘Yeny Nndumi Iruva nshisunundaa makusaro na yesa mirima iniinga wo nndu usumanu lwa shia takwe, kyiinany na ndunda ta mitanyi yakwe.’”

¹¹Nndu aumbya umasi lwa ntambo nnyakee sha ikukuru lyilyee samu kulaore lyakapa; nnang'ani ya mikonu yakwe llufivikaa lunre sha isembo.

¹²Kyitima kya itumbe kyireiyye uwe uka mapookyony ni ando eni eele.

¹³Woi Nndumi Iruva nnduma wa Israeli, yewo woose vakurekkywa yewe mmbashekooya sony; yewo vakukapaa mungo mmbareiywaa urukeny, elyi valekukapa mungo Nndumi Iruva, usoka lwa mura va muu.

¹⁴Woi Nndumi Iruva shishiisa neeny shishishyaa; shikyira na yeny shikyirwaa; mashika kukee kyiitikiso kyakwa.

¹⁵Lola, mmbo vakeshivesa: “A irero lya Nndumi Iruva nkwi lyikai? Ra lyishe!”

¹⁶Nshilekuniinga kuti ya iruma makasha, nta iruuya nkonu wa ngapo-fo, yewe kwiishi; yekyo kyooka kaniny kyakwa kyesha usanguny lwafo.

¹⁷Kulaaluke weeresi kwakwa-fo; nkukee kyirishony kyakwa nkonu va uvisho.

¹⁸A-nkye vasukkywa yewo vakeeshilyilyisa, sheekya shilawoyaa ni sony; veengye yeereswa, indi kulasheengye yeny yeereswa-fo, veengye nkonu wa ngapo; valyamare na ngapo ivii!

¹⁹Nndumi Iruva kashivia, endesalala alya ngiriny ya alya vamangyi va Yuda vaanga neesomuka nayo na ngiriny toose ta Yerusalemu,

²⁰kwaamba, “arannyiny irero lya Nndumi Iruva, yeni vamangyi va Yuda na Vayuda woose, veekaa woose va Yerusalamu, yeni mwaangaa ngiriny yeti.

²¹Nndumi Iruva aamba: kwiiseny nnu mukyire muu, muleepo maryo Sabato nta iyaata ngyiriny ta Yerusalemu-fo.

²²Na mulakurike maryo musomute muuta mmbeny tany Sabato ao irunda-fo, indi uvikeny mweele, shaasa shevavasa vamiku vany.

²³Naakwa ni indo mmbearannya nta iloota kuri, vakanangisa singo tawo, naambo valakooye vammiita na ivarya vaarya.”

²⁴“Nndumi Iruva aamba: Lyo kwakooya mushaaranyaa, mulaate maryo ngyiriny ta muri yeu Sabato, mukauvika mweele mularunde,

²⁵llyo ngyiriny ta muri yeu vashaanga-fo vamangyi vakee kitiminy kya Davidi, veerye mitika na frasi, wo na vasongoru vawo, vandu va Yuda na veekaa va Yerusalemu; na muri yeu ushelalwaa llung'anu.

²⁶Na vandu mmbashaa wooka miriny ya Yuda na wo ando kurunguka Yerusalemu, uka urukeny lwa Penyamini uka Shefela kyidoorony kya muri, uka Negabu, veende firaso fyaikora na fya muu firaso fya soko na findo fifwaamaa, na firaso fya fyaanu mmba ya Nndumi Iruva.

²⁷Indi kwakooya kulaore mwasharannya, ivika weele nkonuny wa Sabato yakwa, mukeepo maryo na yaanga nang'u ngyiriny ta Yerusalemu Sabato, llyo shishaata muro ngiri ta vayo, urumato mmba ta usuri ta Yerusalemu ulyamarwaa.”