Read BIBILLYA Mareiyo Meele a Iruva YEREMIA 19 Bible Online

YEREMIA 19 - BIBILLYA Mareiyo Meele a Iruva bible

YEREMIA 19

¹Nndumi Iruva aamba indi; “Enda kwandoora nungu ya yuumba, kweepoo vasongoru va vandu maata na vakohani vaniini maata,

²mukasomuka poo fika imungony lya mwana wa Hinomu mwaangony wa ngyiri ya yuumba lya sena kwavavia marero yoo shikuvia.

³Yewe nkushaambaa, ‘Araanyiny marero a Nndumi Iruva yeni vamangyi va Yuda na vekaa va Yerusalemu. Nndumi Iruva wa matorito, Iruva wa Israeli aamba ule, Loleny nshikeyeende makasha a iting'a yaandi, maarwi a wo nndu ashiita naake muro.

⁴Mashika wa mmbaleshikapa mungo vakatefusa yaandi kya ikorya ubani kwa maruva engyi kulaore vaeeshi wo nta vamiku vawo nta vamangyi va Yuda; kya elyi valeishura yaandi samu ya vandu vasaari,

⁵vakatannya Baali ando kwa uwe kweerasya vasero vawo vaaluke firaso fya muro kwa Baali, kulaore shilevavasa ao yaamba,

⁶nta kulaore kyammaanga makusarony akwa; kweekyo lola mikonu ikeesha, ni Nndumi Iruva aamba, yaandi kulakivaangwa Tofeti ao imungony lya mwana wa Hinomu indi kuwaangwa imungo lya ishishya,

⁷Yaandi nshishaallwa myaalle ya Yuda na Yerusalemu ni ruu na mwaala, mmbasheengye vandu vawo vawaawa na usu ni vakyiduva vawo na woko lwa yewo vakeeruuya muu vawo. Yeny nshisheniinga minying'a yaawo yaaluke shoonga ya ndeeye ta nginii-u na mafisi a ngoroshony.

⁸Yeny shaallwe muri yeu weeresi, kyindo kya iipalwa; wo nndu ashiiraa kufii nato neereswa na iwiipala kya ngapo ta vayo toose.

⁹Na Yeny nshiveengyee valye nyama ta vasero vawo na vefu vawo, na wo nndu nnyalyaa nyama ya amrasa wakwe elyi varingitywaa na makyiveny yefyo vakyiduva vawo na yewo vakeeruuya muu vawo vakavalyisa nafyo ukyiva.’

¹⁰“Llyo kushepara nungu ilya mbee ya miso a womi valya kweenda nawo,

¹¹Kuvavie, ‘Nndumi Iruva wa matorito aamba ule: Ni indi shishefisha-fishaa vandu yeva na muri yeu sha nndu aparaa nungu ya yuumba, naambo ulakisongossyo lyingyi llung'anu. Vandu mmbasherikaa Tofeti kya elyi kulakyikooywa-fo kundo kungyi kweerika.

¹²Nndumi Iruva aamba, ni indo shitannyaa yaandi na kwa veekaa, shaallwe muri yeu sha Tofeti.

¹³Mmba ta Yerusalemu na mmba ta mangyi ya Yuda mmba toose kai fya vayo fyekorywa ubani lwa maruva engyi, na firaso fyeena fyeletywa maruva engyi nkutefuswaa sha Tofeti.’”

¹⁴Lyoony Yeremia kawuya ooka Tofeti, kulya Nndumi Iruva enruma naeawuya fisuku, kasalala usirony lwa mmba ya Nndumi Iruva kavia vandu woose:

¹⁵“Nndumi Iruva wa matorito, Iruva wa Israeli aamba ule; Loleny, Yeny nshikeyengye muri yeu na miri ya vayo makasha moose shileamba kya vayo kyimaruma mmbalefumbisa nriya vawo, vakalema iyarannya marero akwa.”