Read BIBILLYA Mareiyo Meele a Iruva YEREMIA 20 Bible Online

YEREMIA 20 - BIBILLYA Mareiyo Meele a Iruva bible

YEREMIA 20

¹Ulaalu Pashuri nkohani mwana wa Imeri yeto ekee nniini va mmba ya Nndumi Iruva, keeta Yeremia eshaawuya fisuku yefi.

²Llyoony Pashuri kakapa Yeremia nkisuku kamfingya nguvanuny yeeke uwe ya ngyiri ya Benyaminy ya mmba ya Nndumi Iruva.

³Ndesi ya vayo, elyi Pashuri elekeya Yeremia uka nguvanuny Yeremia kammbia, “Nndumi Iruva nnyakuvaanga-se Pashuri-fo indi ni weeresi taari toose.

⁴Mashika Nndumi Iruva aamba indi: Lola nshishekwaallwaa weeresi kwafo kumuni na vambuya vafo. Mmbawaawaa ni usu lwa vakyiduva vawo kwiilolaa. Na nshisheningyaa Yuda shoose wokony lwa mangyi ya Babilony; nnyavakamaraa mifungwa fika Babilony navawee na usu.

⁵Mmwasi, yeny nshisheningyaa umasi lwa muri, ileri, findo fya vayo fya usuri, na masina moose a vamangyi va Yuda wokony lwa vakyiduva vawo, yewo mmbo vashevasokaa, vaashillye na iyakamara fika Babilony.

⁶Yewe Pashuri na yewo woose vakee yefo mmba kwafo mmbakamarwaa mifungwa; Babilony nkusheenda; na mfo kundo kufiyyaa, na mfo kundo kurikwaa yewe na vambuya vafo woose, yewo kulevaawuya fisuku fya wongo.”

⁷Woi Nndumi Iruva nkuleshilemba shalembika; yewe nkutiri finya ngota yeny, na yewe kwashilyimba, Yeny shammaluka seko nkonu simu; wo nndu nnyakeeshiipala.

⁸Mashika wo kyeeri sharera, nshikeiffwa, na ikapa kyoorongye, “Kyituuru na ulyamaro!” Kya elyi irero lya Nndumi Iruva lyanshivia kyiila na iminwa nkonu simu.

⁹Kwakooya shaamba, “yeny nshinsendaa lyingyi ao irera lyingyi na irina lyakwe,” nriminy mbwakwa kukakaafo sha kindo muro ushaakaa ukemfingye maffony akwa, neeny nshamaaraa isisirya nta nshikeidima-fo.

¹⁰Mashika mmbo shiitye kyiviriviri. Weeresi llukee taari toose! “Llyingyeny! Ndifony llullyingye!” Ni indo vambuya vakwa woose vakeeyaamba, veevereyaa iwa lyakwa. “Kulakooye alembika lullyimbe na intaiyya kyiduva kyeru.”

¹¹Indi lyo Nndumi Iruva akee neeny sha isiingo lya fira; kweekyo vakiduva vakwa mmbashetulwaa, mmbashilyimbaa-fo. Mmbashesukaa kyuumu, mashika mmbashiinukyaa-fo. Mmbatirwaa ni sony ya llung'anu ilakaa irekyiwa.

¹²Woi Nndumi Iruva wa matorito, yewe kweesa nsumanu, yewe kulolyaa ngoo na mirima, sheekya shilollye kwiivataiyya kyiduva, kya elyi shakurambikkya mbony takwa.

¹³Imbya Nndumi Iruva; itikiseny Nndumi Iruva! Kya elyi alekyira muu va vaturi maakony a valyamari.

¹⁴Udengwa nkonu ulya shewonika! Nkonu ulya maaye-akwa eshiira, ulalyimywa mbora-fo!

¹⁵Nadengwa nndu ulya eengye rumi nde akwa sheelyi, “Kwammiirywa mwana nsero,” vakamfurisa nnu.

¹⁶Nndu yeto naaluke sha miri Nndumi Iruva aleikapa kuleifo ilyillya; neete kyiyyio ngama na ngusana nsanyiny nnang'ani,

¹⁷kya elyi kulaore aleshiwoiyya ndeuny; indo-da ma-akwa nyeshaaluka kifu kyakwa na ndeu yakwe ya mwana ing'ane llung'anu.

¹⁸A nkyikyi shooka sangeny wa maye akwa, ishelollya makyiva na ting'wa, na ilyiyya mikonu yakwa usutuny?