Read BIBILLYA Mareiyo Meele a Iruva YEREMIA 21 Bible Online

YEREMIA 21 - BIBILLYA Mareiyo Meele a Iruva bible

YEREMIA 21

¹Elyi llyo irero lyesheya Yeremia lyuuka kwa Nndumi Iruva, elyo mangyi Sedekia enrumya Pashuri mwana wa Malkiya na Sefannya nkohani, mwana wa Maaseya imuvia;

²“Luvessye kwa Nndumi Iruva mashika Nebukadnesa mangyi ya Babilony nnyakeyende fira kweru; kyindevaa Nndumi Iruva alutannyaa kya ngyende takwe toose namweerese naisityou fira.”

³Llyo Yeremia kavavia: “Ni indi mundevia Sedekia,

⁴‘Nndumi Iruva, Iruva wa Israeli aamba ule: Lola nshishiindutaa fisha fya fira yefyo fikee maakony any yefyo mukeekapa nafyo mangyi ya Babilony na Vakaldayo yewo vamuringyitye yefo poo ya masimamba; Yeny nshiweendee nnang'ani ya muri yeu.

⁵Yeny shimuni nshishekapanaa neeni na woko lwakwa woorrwe lwa finya na ngoo na unyafi na nyashi niini.

⁶Yeny nshiwaa veekaa va muri yeu, nndu na ifisi; mmbashefwaa ni ndwari shirwaa sheeresi.

⁷Shammaa shiningye Sedekia mangyi ya Yuda na varundi vakwe na vandu va muri yeu yewo vakyiyyaa ndwari sheeresi na usu na shaa wokony lwa Nebukadnesa mangyi ya Babilony na wokony lwa vakyiduva vawo, wokony lwa yewo vakeeruya muu vawo, We nnyavawaa na nrwe wa usu; nnyavalyillyaa nta ivara-fo.’”

⁸Na kwa vandu yeva nkuvavia: “Nndumi Iruva aamba; Loleny, Yeny shammbika mbee yaany shia ya muu na shia ya ufu.

⁹Yeto asaa kunu muriny yeu nyafwaa na usu, na shaa, na ndwari sheeresi; indi lyo yeto asomukaa na yeengya Vakaldayo yewo vammuringitya nnyakiraa muu; na muu vakwe mmbushaashukaa.

¹⁰Mashika shansumanisa usangu lwakwa kya muri yeu kya makasha nta nshi kya mesha-fo, ni Nndumi Iruva aamba: ‘Mmbuninngywaa wokony lwa mangyi ya Babilony nawaate muro.’”

¹¹“Na kwa mmba ya mangyi ya Yuda amba,

¹²‘Arannyiny irero lya Nndumi Iruva yewe mmba ya Davidi!’ Nndumi Iruva aamba; ‘Leteny kya usumanu ngama, kyira maakony a mwiilammya yeto alesokwa, nyashi yakwa ilamoolokkye sha muro imukore kuleifo vaiirumya, kyeendwa ni mitannyi yaany miravi.’

¹³Loleny, shikee kyilasha kyany yeni veekaa va imungony, Yewe ngyina ya urambalalyiny, ni Nndumi Iruva aamba; yeni mukeeyamba, ‘Ni wovi ashaa nakabane neese, ao ni wovi ashaanga muriny weru?’

¹⁴Yeny nshishemukabaa kyikwaani na ndunda ta mitannyi yaany, ni Nndumi Iruva aamba; Yeny shishaata muro mituru yakwe, ulye wo kyindo kyinringyitye.”