Read BIBILLYA Mareiyo Meele a Iruva YEREMIA 22 Bible Online

YEREMIA 22 - BIBILLYA Mareiyo Meele a Iruva bible

YEREMIA 22

¹Nndumi Iruva aamba indi; “Oloka fika mmba ya mangyi ya Yuda, kwarerya-u irero elyi kwaamba,

²‘Arannya irero lya Nndumi Iruva yewe mangyi ya Yuda, yewe kukaaye kitima kya Davidi, yewe na varundi vafo na vandu vafo yewo vaanga ngyiriny yeti.’

³Nndumi Iruva aamba indi; ‘Taneny uleti na usumanu, kyireny maakony a mwiilamya yeto alesokwa. Mulatannye ukasha muny-fo, nta mwana wa ngwera, nta nka va ding'u-fo, nta mulairite samu ya nndu nsaari yaandi-fo.

⁴Kwakooya mushiindyaa irero elyi kya dede deny, llyo ngyeeri ya David tisheengeraa ikaya kitima kya Umangyi. Na llyigise, mmbo vashiiraa ngyiriny ta mmba yei ya kimangyi, vo na vandu vavo, veerie mitika, veesaamyi frasi.

⁵Indi lyo kwakooya mulashiindya marero yaa, Yeny nshalya mboo na irina lyakwa shimuni, ni Nndumi Iruva aamba sheelyi mmba yei nnyishaaluka sama.’”

⁶Mashika Nndumi Iruva aamba indi kya mmba ya mangyi ya Yuda: “Yewe nkukee Giliadi kwakwa, nrwe va Lebanoni, naakwa ni indo kya dede mmbo shikwaallwaa kasa koomu, muri ulalalwaa.

⁷Yeny nshikuruuya veelyamara wo umwi na fisha fyakwe; vamannye-si mieresi yafo misha nnu vayaate muro.

⁸“Na masanga meengyi ashiiraa kufii na muri yeu, na wo umwi mmbo avesaa amrasa wakwe, ‘A nkyikyi Nndumi Iruva aleutannya muri yeu nniini indi?’

⁹Nawo mmbarouwaa, ‘Ni mashika elyi valerekkywa mma ya Ndumi Iruva, Iruva waawo vakaindya maruva engyi na iyafurukannya.’”

¹⁰Mulasheiffwa kya nndu afwa nta mulankaye rembo ya ufu-fo; indi lyo kapeny kyiyyo kya nndu asheenda kyaaro mashika nnyakyiwuyaa lyingyi urukeny lwakwe-fo.

¹¹Mashika Nndumi Iruva aamba indi kya Shalumi mwana wa Yosia mangyi ya Yuda, yeto eleshillya ando a Yosia ndeeye, yeto alerisha yaandi; “We nnyakyiwuyaa yaandi lyigyi-fo,

¹²idi nnyafiyya yefo kundo akamarywa mifingwa, nnyalollyaa uruka yelu lyingyi llung'anu-fo.”

¹³Woshiny llwa mwiitana mmba yakwe na ntambo, na ivika fyirya fya uwe na ilamya; aaluye amrasa vakwe ishinga nta alanniinga weesi lwakwe;

¹⁴yeto aamba; “Yeny nshitanaa mmba ya usuri niini, itiri fyirya fya uwe fitiri mwaanya nniini,” na matirisha a mieresi shiaambe fwana idodori.

¹⁵A ndesa mmbo kukusarye nkukee mangyi kyimaruma kya ikweesa na vandu na mieresi? A ndoo elya na ina-se katana uleti lukwaani na usumanu? Lyo kyikava kyippwa kyakwe.

¹⁶Nnyeleta mbony ta vafwafwa na vaturi; indony kyikaaluka kyippwa. A ndesa yelyi nshi lyo ishimanya? Ni Nndumi Iruva avesa.

¹⁷Kya indi miso na nrima wafo mmbutiri kyingyi uta ni ilanga, ipusswa samu ya nndu mwaarya, unyinyi na raa ta myaandu.

¹⁸Kweekyo Nndumi Iruva aamba ule kya Yehoyakimu mangyi ya Yuda; “Mmbashiffwaa kyakwe veeshaambaa, ‘Woo mwana-ma!’ Ao ‘Woo mfwa-ma-fo!’ Mmbashiffwaa kyakwe veshaamba, ‘Woo nndumi vakwa!’ Ao ‘Woo itumbe lyakwe-fo!’

¹⁹Nnyarikwaa sha ngamula erufuwaa na yeerwa poo ya ngyiri ta Yerusalemu.”

²⁰“Saamany Lebanoni, kwandeffwa, ffwa na unyanga waasha yefo Bashany; ffwa kuuka na Abarimu, mashika vakunde vafo woose vallyamarwa.

²¹Nsherera neewe umasiny lwafo, lyo kwaamba, ‘Yeny nshishaaranyaa-fo.’ Yei nnyo shia yafo uka kwikee n-du, kya ira kulaarannya unyanga lwakwa.

²²Uraato llushiisaa veesi woose va findo fyafo fya ivikkya, na vakunde vafo vakamarwa mifungwa; llyo kutirwaa ni sony na isavaa kyeendwa ni uravi lwafo loose.

²³Yewe mwikaa wa Lebanoni kuvikkye kyifuri mieresiny, a nkulyillywaa inda ukyiva elyi fyuure fikuwoyaa, mavavio sha a yiira mwana!”

²⁴“Nndumi Iruva aamba; Shiifo na muu, nakwa Konia mwana wa Yehoyakimu mangyi ya Yuda ekee ni rashi yakwa ya kiring'isyo wokony lwakwa usha, nshekusurwaa-u

²⁵shikuningye wokony lwa yewo vakeeruuya muu vafo, wokony lwa yewo kukeeveereya, naakwa ni wokony lwa Nebukadnesa mangyi ya Babilony na wokony lwa Vakaldayo.

²⁶Yeny nshishekweera yefo na mau mwiikuwona, mweende urukeny llungyi kulaore kulewonikkya-fo kushefiyya-fo.

²⁷Indi lyo uruka lulya valangaa iwuya mmbawuyaa-fo.”

²⁸A ndesa Konia ni nndu mwiipale, nungu iparikkye, kyindo kuleifo nndu akyikunnde? A nkyikyi elyi we na vana vakwe veeisityou na yeerwa urukeny valalwiishi?

²⁹Woo uruka, uruka, uruka, arannya irero lya Nndumi Iruva!

³⁰Nndumi Iruva aamba ule: “Reiyyeny mbony ta nndu yeu sheelyi nnyatiri mwana-fo, nndu nalavessywa mikonuny yakwe myoose; mashika nkwiifo ngyeeri yakwe imwi ivessywaa nakaye kitima kya Davidi na ishillya lyingyi Yuda-fo.”