Read BIBILLYA Mareiyo Meele a Iruva YEREMIA 24 Bible Online

YEREMIA 24 - BIBILLYA Mareiyo Meele a Iruva bible

YEREMIA 24

¹Numa ya Nebukadnesa mangyi ya Babilony ikamara mifungwa Yekonia mwana wa Yehoyakimu mangyi ya Yuda uka Yerusalemu, amwi na vasongoru va Yuda, varango veetana, vafuru na iveende Babilony, Nndumi Iruva kashoora yoorya yelyi: Lola, mikusha ivii ya ndunda ta tiini yevikwa mbee ya mmba ya Nndumi Iruva.

²Nkusha umwi mbwetiri ndunda shisha nnu ta tiini, sha madudura a mbee a tiini, indi lyo nkusha yeto ungyi mmbo weetiri ndunda shikasha nnu ta tiini, shikasha nnu tilavaa ilya.

³Nndumi Iruva kashivia, “Ni kyokyi kulollye Yeremia?” Yeny shaamba, “Ni tiini, tiini shisha, shisha nnu na tiini shikasha, shikasha nnu nta tilavaa ilya.”

⁴Llyoony irero lya Nndumi Iruva lyikashisheya:

⁵“Nndumi Iruva, Iruva wa Israeli aamba ule; shaasa kulollye tiini yeti shisha ni indo shivepoo ni vesha yewo vakee usamiryony valooka Yuda, yewo shilevaumbutya kwaasha wooke yaandi veende urukeny lwa Vakaldayo.

⁶Yeny nshivalolaa na miso akwa kya usha, shishevaviira urukeny yelu. Yeny shivatane nta nshi ivasambwaa-fo; Yeny shivavaaye nta nshi ivakurrwa tushu-fo.

⁷Yeny shivaniinge nrima wa imanya sheelyi yeny ni Nndumi Iruva; nawo vave vandu vakwa neeny shive Iruva waao, mashika mmbashiwuyyaa na nrima wao moose.

⁸“Indi Nndumi Iruva aamba indi; shaasa tiini shikasha tikee shikasha nnu kulare tilavaa ilyiwa, ni indo shishiipoyywaa Sedekia mangyi ya Yuda, vasongoru vakwe, sasari ya Yerusalemu yeyo isaa urukeny yelu na yewo vakaa urukeny lwa Misri.

⁹Yeny nshivaallwaa iting'a kwa ngyumangyi toose ta uruka, vaalukekyiipalwa, irero lya ituka, kyiila na kyidengo wo ando shiwoombutyaa.

¹⁰Na Yeny nshishevarumyaa usu, shaa na ndwari shinyaasi fika vamamitwa deny urukeny shevaniinga wo na vamiku vawo.”