Read BIBILLYA Mareiyo Meele a Iruva YEREMIA 25 Bible Online

YEREMIA 25 - BIBILLYA Mareiyo Meele a Iruva bible

YEREMIA 25

¹Irero lyilya lyesheya Yeremia kya vandu woose va Yuda, mwaakeny wa kaana wa Yehoyakimu mwana wa Yosia mangyi ya Yuda (wekee ni mwaaka wa mbee wa Nebukadnesa mangyi ya Babilony),

²llyo Yeremia nkisuku evia vandu woose va Yuda na veekaa woose va Yerusalemu:

³“kwa myaaka makumi avii na iraaru, uka mwaaka wa ikumi na kararu wa Yosia mwana wa Amon mangyi ya Yuda fika inu, irero lya Nndumi Iruva mmbo lyileshisheyaa neeny sharera neeni kuleifo kyiimuyo indi mmulearaannya-fo.

⁴Yeni mmulearannya nta iloota maarwi mwiite ra neelyi Nndumi Iruva alemurikkya varundi vakwe woose vakisuku eeshaambaa,

⁵‘Kurieny ulaalu, wo umwi waany nare shia takwe na mitannyi yakwe mikasha, mukee urukeny yelo Nndumi Iruva alemuniinga yeni na vamiku vaany uka kasha kufike llung'anu;

⁶mulalatye maruva engyi indearundya na iyaindya ao ishirosya ngoo na mashora a maako any-fo. Indo nshiveengye ngapo tara-fo.’

⁷Naakwa ni indo mmuleshaaraannya-fo, ni Ndumi Iruva aamba, naambo mushirosye ngoo na mashora a maako any kya ngatara yaany muveni.

⁸“Kweekyo Nndumi Iruva wa matorito aamba: Kyimaruma kulaore muleindya marero akwa, loleny,

⁹Yeny nshikeeruma masanga moose a taari ya ndoo, ni Nndumi Iruva aamba, na Nebukadnesa mangyi ya Babilony nrundi vakwa, nshiveende vawoye muri yeu na veekaa va vayo, neekapana na masanga moose yaa fitani nato; Yeny shivalyamare deny shuvaallwe ting'wa, irero lya ituka na sama ya llung'anu.

¹⁰Mmwasi, yeny shiveeme unyanga lwa seko na unyanga lwa ifura, unyanga lwa mmi ashaalyikaa na unyanga lwa nka ashaalyikwaa, unyanga lwa mawe eesa na saa ya kyimwii.

¹¹Uruka yelu loose llushaalukaa sama na kyiraa, na masanga yaa moose nnyarundya mangyi ya Babilony myaaka makumi mfungare.

¹²Llyoony numa ya myaaka makumi mfungare, Yeny shishekapaa mangyi ya Babilony na isanga lyilya, uruka lwa Vakaldayo kya uravi lwawo, ni Nndumi Iruva aamba, shaallwe uruka kyirashi llung'anu.

¹³Yeny nshisheengye uruka lulya marero moose shanrera kyilasha kya vayo, wo kyindo kyikekyireiyye kyitabuny yekyi, yekyo Yeremia aawuya fisuku kyilasha kya masanga moose.

¹⁴Mashika masanga meengyi na vamangyi vaniini mmbavaallwa mashinga; shivataiyye mitannyi yaao na mashora a maako awo.”

¹⁵Nndumi Iruva, Iruva wa Israeli kashivia: “Varia wokony lwakwa upata lwa mfinyu va nyashi, kwaniinga masanga moose shikurumaa kwawo.

¹⁶Mmbanaa, vanangwa na isukwa kyimaruma kya usu shikeerika nnang'ani yaao.”

¹⁷Llyo shavaria upata wokony lwa Nndumi Iruva, shaniinga masanga moose yoo Nndumi Iruva eshiruma kwawo vakana:

¹⁸Yerusalemu na miri ya Yuda, vamangyi na vasongoru vawo iyaallwa sama na kyiraa, irero lya ituka na kyidengo shaasa kyikai nkonu va inu;

¹⁹Farao mangyi ya Misri, varundi vakwe, vasongoru vakwe, vandu vakwe woose,

²⁰Na veny woose vakee nnang'ani yaao; vamangyi woose va uruka lwa Usi na vamangyi woose va Vafilisti (Ashikeloni, Gaza, Ekrony na sasari ta Ashdodi);

²¹Edomu, Moabu, na vana va Amon;

²²Vamangyi woose va Tiro, vamangyi woose va Sidony na vamangyi va ngyuruka ta mbai ya yeeve;

²³Dedany, Tema, Busi na yewo woose woota mirwe yaawo kyenga;

²⁴vamangyi woose va Arabia na vamangyi woose asasangyi yoo akaa kasa koomu;

²⁵vamangyi woose va Simri, vamangyi woose va Elamu, na vamangyi woose va Media;

²⁶vamangyi woose va taari ya ndoo, kwaasha na kufii, umwi kwi umwi, na masanga moose a ulana akee usanguny lwa uruka. Vakammaa ina mangyi ya Babilony nane.

²⁷Llyoony kushevavia, “Nndumi Iruva wa matorito, ‘Iruva wa Israeli aamba: Neny, munango na iraaka, weny-si nta mulakwiipoo lyingyi-fo kyimaruma kya usu shikemurika nnang'ani yaany.’

²⁸Na kwakooya valema iwaria upata wokony llwafo vane, llyo kushevavia, ‘Nndumi Iruva wa matorito aamba indi; Ni kuti mune!

²⁹Mashika loleny, nshikepooka itana makasha muriny usendwaa na irina lyakwa, neeni murewaa mulakapwa? Yeni mmuraamulakapwa-fo, mashika Yeny nshikeevanga usu kyilasha kya vekaa woose va uruka, ni Nndumi Iruva wa matorito aamba.’

³⁰Kweekyo yewe nkushaawuya fisuku kyilasha kyawo marero yaa moose kuvavie; ‘Nndumi Iruva nnyarung'unaa ooka uwe, na kuuka muriny wakwe mweele unyanga lwakwe llushiitiwaa; nnyarung'unaa na finya niini kyilasha kya masanga akwe, nakape weele sha yewo vafindikaa misabibu kyilasha kya woose va ulana.

³¹Ntiri mmbushiitiwa nnyanuny va uruka, mashika Nndumi Iruva atiri ivakyana na masanga; nnyatiri mbony ya ileta vandu woose, na varavi nnyavaningyaa vavaawa na usu, ni Nndumi Iruva aamba.’

³²Nndumi Iruva wa matorito aamba ule; loleny ngatara mmbo livoyaa isanga kwi isanga, na ngova nnyikeetuta yuuka taari ta kwaasha ya uruka!

³³“Na yewo vawaawaa ni Nndumi Iruva nkonu yeto mmbakwaana uka taari imwi ya uruka fika ingyi. Mmbakappywa kyiyyo, nta isangyirywa nta irikwa-fo; mmbashaaluka kyirashi usanguny lwa uruka.

³⁴Fiireny yeni veesi, kapeny kyiyyo, kwaalaleny mafuny yeni masiingo a maronda mashika mikonu ya iwaawa na iraratwa lyany yansha,

³⁵Nkwiifo kyirishyo kyisaari kwa veesi nta iturunya kwa masiingo a maronda-fo.

³⁶Kyiyyo kya veesi, na iffwa lya masiingo a maronda! Mashika Nndumi Iruva nnyakeeporisa mare awo.

³⁷Na miri itiri unapwe nnyikeewunduwa mashika ya unyafi lwa Nndumi Iruva.

³⁸Nnyasomuka sha miiso yasumuka nndesheny, mashika uruka lwawo llwammaaluka kyiraa kyeendwa ni usu lwa mwiilamya na kyimaruma kya unyafi lwakwe.”