Read BIBILLYA Mareiyo Meele a Iruva YEREMIA 26 Bible Online

YEREMIA 26 - BIBILLYA Mareiyo Meele a Iruva bible

YEREMIA 26

¹Mapookyony a ushilyi lwa Yehoyakimu mwana wa Yosia mangyi ya Yuda, irero elyi lyikasha lyuuka kwa Nndumi Iruva,

²“Nndumi Iruva aamba: salala mbateny ya mmba ya Nndumi Iruva kwarera na miri myoose ya Yuda yewo vashiindya Nndumi Iruva kuvavie marero moose yoo shikuvavasa ivavia; kulare nta irero lyimwi-fo

³Washiidimaa iita vaalashike, wo umwi nakurye kya shia takwe shikasha, naambo shire shilaveengye makasha shanndeesya itana kyuuka na mitannyi yaao miravi.

⁴Yewe nkuvaviaa, ‘Nndumi Iruva aamba ule: Kwakooya mulashaarannyaa, ilatya mavavaso akwa shammuniinga,

⁵na itana marero a varundi vakwa vakisuku yewo shikeevaruma uviny, ra neelyi kulare mulevaarannya,

⁶llyo sheallwa mmba yei sha Shilo, na Yeny shishaallwa muri yeu kyidengo kya masanga moose a uruka.’”

⁷Vakohani na vakisuku na vandu woose veeta Yeremia eereraa marero yaa kulya mmba ya Nndumi Iruva.

⁸Na llya Yeremia emaa irera marero moose Nndumi Iruva emmuvavasa ivia vandu woose, llyoony vakohani na vakisuku na vandu woose vakantira vaakamba, “Yewe nkufwaa!

⁹A nkyikyi kwaawuya fisuku na irina lya Nndumi Iruva kwaamba, ‘Mmba yei nnyishevaa sha Shilo na muri yeu waaluke sama, ulalalwaa’?” Na vandu woose vakaringyitya Yeremia yefo mmba ya Nndumi Iruva.

¹⁰Elyi vashilyi va Yuda veeta mbony yeti, vakasomuka kulya mmba ya mangyi vakasaama fika mmba ya Nndumi Iruva, vakakaya firembo fyawo mwaangony wa Ngyiri Shiyya ya mmba ya Nndumi Iruva.

¹¹Llyo vakohani na vakisuku vakavia vashilyi na vandu woose vakaamba, “Nsoro yeu mmbo akwaani uleti lwa ufu, kyimaruma elyi aawuya fisuku kyilasha kya muri yeu, shaasa mweeta na maarwi any muveni.”

¹²Llyo Yeremia karera na vashilyi woose na vandu woose kaamba, “Nndumi Iruva nnyaleshiruma shisheawuya fisuku kyilasha kya mmba yei na muri yeu marero moose yoo mweeta.

¹³Ulaalu kuryeny kya shia tany na mitannyi yaany mukaarannya unyanga lwa Nndumi Iruva, Iruva waany naambo Nndumi Iruva nalamweengye makasha yoo ammaamba.

¹⁴Indi lyo kyakwa, loleny, yeny ni maakony any shikai. Shitannyiny shaasa kyamusennya na kyikee usumanu kwany.

¹⁵Kyindo kyimwi-nsi manyeny nisha, kwakooya mushiwaa, mmukeekurika samu ya nndu nsaari muveni, na muri yeu na veekaa va vayo, mashika ni kya dede ni Nndumi Iruva ashiruma kwany shirere marero yaa moose maarwiny any.”

¹⁶Llyo vashilyi na vandu woose vakavia vakohani na vakisuku, “Nsoro yeu nnyakwaani uleti lwa ufu-fo, mashika nnyalureria kwa irina lya Nndumi Iruva, Iruva weeru.”

¹⁷Umwi wa vamiku-vasongoru va uruka kasalala karera na ikwaanu lya vandu kaamba,

¹⁸“Mikaya Mmorashti nnyeawuya fisuku mikony ya Hesekia mangyi ya Yuda kavia vandu woose va Yuda indi; ‘Nndumi Iruva wa matorito aamba, Sioni mmburemwa sha rema, Yerusalemu mmbushaaluka mbillya ya sama, na ifumbu lya mmba shaasha mbillya.’

¹⁹A ndesa Hesekia mangy ya Yuda na Yuda shoose yemmbwaa? Nnyeereya-se Nndumi Iruva na itereva illyilwa ni Nndumi Iruva, a Nndumi Iruva nnyera-se ngapo ensenda kyilasha kyawo? Indi lyo llukee kufii na ikweengye ngatara niini nnu yese luveni.”

²⁰Kwekaafo nndu ungyi eawuya fisuku kwa irina lya Nndumi Iruva, Uria mwana wa Shemaya va taari ya Kiriati-yearimu. Kaawuya fisuku kyilasha kya muri yeu na uruka yelu na marero sha yaa Yeremia.

²¹Na elyi mangyi Yehoyakimu na masiingo akwe moose na vashilyi woose veeta marero akwe, mangyi karuuya immbwaa, lyo Uria kamanya, keereya karisha kandoovya Misri.

²²Mangyi Yehoyakimu karuma vandu vave Misri, Elnatany mwana wa Akibori na vengyi amwi nawe,

²³vakeende Uria uka Misri vakamweende kwa mangyi Yehiyakimu, kammbwaa na usu keera nrwe wakwe na nnying'a wakwe fifuny fya vandu valatiri ushilyi loose.

²⁴Indi woko lwa Ahikamu mwana wa Shafany llwekee na Yeremia naambo nalaniingywa vandu vammbwee.