Read BIBILLYA Mareiyo Meele a Iruva YEREMIA 27 Bible Online

YEREMIA 27 - BIBILLYA Mareiyo Meele a Iruva bible

YEREMIA 27

¹Mapookyony a ushilyi lwa Sedekia mwana wa Yosia mangyi ya Yuda, irero elyi llyesheya Yeremia lyuuka kwa Nndumi Iruva.

²Nndumi Iruva kashivia, “Songosya fyaaru fya fyoove na mitaato ya yookyi kwa kwaavika singony.

³Kwarummya mangyi ya Edomu, mangyi ya Moabu, mangyi ya vana va Amon, mangyi ya Tiro kwa maako a varumi yewo valesha Yerusalemu kwa Sedekia mangyi ya Yuda.

⁴Vaniinge ivavaso elyi kwa vamangyi vawo:

⁵‘Ni Yeny kwa wiidimi lwakwa uniini na woko lwakwa woorrwe shiletana uruka na vandu na mafisi akee yefo urukeny, neeny nshiniinga kwa nndu moose shilollyaa kyikwaani.

⁶Ulaalu Yeny sanniingya ngyuruka yeti toose wokony lwa Nebukadnesa mangyi ya Yuda, nrundi wakwa, neeny nshaniinga na mafisi a ngoroshony na nrundye.

⁷Masanga moose nnyanrundyaa we na nsero vakwe na nshuku wakwe fika kyeeri kya uruka lwakwe muni lushaa; llyoony masanga na vamangyi vaniini vashemwaallwaa ishinga.’

⁸“Indi lyo kwakooya isanga lyoose ao umangyi kulaore lurunndyaa Nebukadresa yeu mangyi ya Babilony, na yaata singo ya vayo yookyiny ya mangyi ya Babilony, Yeny nshikapaa isanga yelyo na usu, shaa na ndwari shinyaasi, fika shalyimamita na woko lwakwe, ni Nndumi Iruva aamba.

⁹Kweekyo muarannyi vakisuku vany nta veekapa ulwaa, nta veyorya nta veefissha mbaka nta vasavi vany-fo, yewo vakemuvia, ‘Yeni mmurundyaa mangyi ya Babilony-fo.’

¹⁰Mashika yelo ni wongo vakemwaawuya fisuku naambo muumbutywa kwaasha na uruka lwany na Yeny shimurishisaa, na yeni mmumamikaa.

¹¹Indi lyo wo isanga lyikwaavika yookyi ya mangyi ya Babilony na inrundya, nshilyiraa urukeny lwa vayo yeni, valuremyi na ikaa-fo, ni Nndumi Iruva aamba.”

¹²Ni kyiwo kwa Sedekia mangyi ya Yuda sheelyi; “Avika singo yafo yookyiny ya mangyi ya Babilony na inrudya we na vandu vakwe kusee na muu.

¹³A nkyikyi yewe na vandu vafo mufwe ni usu, shaa na ndwari shinyaasi shaasa Nndumi Iruva anrera kya wo isanga kulaore lyirundyaa mangyi ya Babilony?

¹⁴Mulaarannye marero a vakisuku yewo vakeemuvia, ‘Yeni mmurundyaa mangyi ya Babilony-fo,’ mashika ni wongo vakemwaawuya.

¹⁵Nndumi Iruva aamba, nshiilevaruma-fo, indi lyo mmbakeeyaawuya wongo na irina lyakwa, naambo shimuumbute na mufwe, yeni na vakisuku yewo vakeemwaawuya fisuku.”

¹⁶Llyoony sharera na vakohani na vandu yeva woose shaamba; “Nndumi Iruva aamba ule; Mulaarannye marero a vakisuku vany yewo vakeemwaawuya fisuku veeshaambaa, ‘Loleny fiyya fya mmba ya Nndumi Iruva nkufii deny fiviirwa fyuuka Babilony,’ mashika ni wongo vakeemwaawuya.

¹⁷Mulavaarannye-fo; rundyeny mangyi ya Babilony mukkye muu. A nkyikyi muri yeu waaluke sama?

¹⁸Kwakooya vakee vakisuku na kwakooya vatiri irero lya Nndumi Iruva lyikee kwao vatereve Nndumi Iruva wa matorito sheelyi fiyya fisaari kulya mmba ya Nndumi Iruva na mmbeny ya mangyi ya Yuda na Yerusalemu fileende Babilony.

¹⁹Mashika Nndumi Iruva wa matorito aamba ule kya ngo, yeeve, ngara na fiyya fisaari muriny yeu,

²⁰yefyo Nebukadnesa mangyi ya Babilony kulaore alefiipoo, llya ekamara Yekonia mwana wa Yehoyakimu mangyi ya Yuda ushingeny uka Yerusalemu, na vasongoru va Yuda na Yerusalemu,

²¹Nndumi Iruva wa matorito, Iruva wa Israeli aamba ule kya fiyya fyerewa mmba ya Nndumi Iruva, mmba kwa mangyi ya Yuda na Yerusalemu:

²²Yefyo nfishiipowoo fika Babilony, fikee-fo fika nkonu shifisheyaa, ni Nndumi Iruva aamba. Llyo Yeny shishefiviira na ifisuruma ando andi.”