Read BIBILLYA Mareiyo Meele a Iruva YEREMIA 3 Bible Online

YEREMIA 3 - BIBILLYA Mareiyo Meele a Iruva bible

YEREMIA 3

¹“Kwakooya nndu alakana na nka wakwe kandeorwa ni nndumi ungyi, a ndesa akyiidimaa iwuyya nka yeto? A uruka yelo lushiilannyaa-se itefuswa? Lyo yewe Israeli mmbo kulenkapa usonga na womi veengyi; a kushekyiwuyaa kwakwa? Ni Nndumi aamba.

²Ipoo miso afo kwalola yefo mafumbu-u. A ndesa kwuyyo nta ando amwi ewe kulandetuuswa-u? Mmbo kulevavereya yefo mbaambaa ya shia sha Mwaarabu yefo kasa koomu. Mmbo kwanreesa uruka na uravi lwafo lwa usonga.

³Kweekyo marony a mmbwa akawiika, na mmbwa ya mateeri akara ilekapa; kwatira usangu lwa isonga nta kulatirwaa nsony.

⁴A nshi elyi lya ulaalu-da kwashifuuya kwashivia, ‘Ndeye-akwa, yewe nkweshikunda uka udu lwakwa,

⁵a nkushisswa llung'anu, a nkukyaalashika-se fika ufishyony?’ Lola, mmbo kwammayeamba; indi lyo nkuletana wo uravi shaasa kuleidima.”

⁶Nndumi Iruva kashivia mikonuny ya mangyi Yosia, “Kwallollya yekyo aletana, yeto nalatiri kikusirio, Israeli, shaasa aleenda wo kyidoorony, na sindeny ya wo nri mmbisi indekapya-fo usonga?

⁷Neeny shekusara, ‘A nkimmaa itana indo numa kuti nashiwuiyye;’ lyo nnyalewuya-fo, na mfwamaye iraami we Yuda kalollya yefo fyoose.

⁸Mmbo alelollya kyimaruma kya usonga lwa nturi wa kyikusirio, Israeli, nshemwaanta na indelakana nawe; naakwa ni indo mfwama iraami Yuda nnyeereya-fo, nawe keenda kandekapa usonga.

⁹Kyimaruma usonga llwekee kyindo kyaangu deny kwakwe, katefusa uruka, eekapa usonga na mawe na miri.

¹⁰Naakwa akyimaa yefyo fyoose mfwama nravi Yuda nnyaleshiwuyya na nrima moose-fo, indi ni kya ukunang'ari, ni Nndumi Iruva shaamba.”

¹¹Nndumi Iruva kashivia, “Nturi va kyikusirio mmbo alekoora ni mwaana na ngota mfwamaye Yuda nravi.

¹²Enda, senda marero yaa kulella taari ya ndoo kwaamba, ‘Wuya, yewe Israeli nturi va kyikusirio, ni Nndumi Iruva aamba. Nshikyikulolaa na nyashi-fo, mashika shikee mwiisarya, ni Nndumi Iruva aamba. Nshishisswaa llung'anu-fo.

¹³Kureeke ukasha lwafo tapa, sheelyi kulekaba mungo Nndumi Iruva, Iruva wafo. Kwiirikye sheelyi kulefiirya ndi sindeny ya miri kwa marua yoo, kwara iindya mavavaso akwa. Nnyeny Nndumi Iruva shakuvia indo.

¹⁴“Wuyeny, yeni vana vaturi va kyikusirio, ni Nndumi Iruva aamba. Yeny nshikee nndumi waany; ni Nndumi Iruva aamba; shishemwiipoo, umwi uka muriny na vavii uka mmba imwi, na shishemweende Sioni;

¹⁵‘Shimuniinge veesi varuuyaa kya nrima wakwa, yewo vamuniinga ikulosha na umanyo.’

¹⁶Nalyo kyeeri mushefumbukaa na yeengyereka urukeny, mikonu yeyo, Nndumi Iruva aamba, mmbakyirera lyingyi sheelyi, ‘Isanduku lya kyaasa kya Nndumi Iruva.’ Nkyikishaa mirweny, ao ikumbuwa, ao iturika-fo; nkyitanyikaa lyingyi-fo.

¹⁷Elyi kyeeri ekyo kishaa muri wa Yerusalemu mmbo ushevaangwa kitima kya Nndumi Iruva, na masanga moose nashekuumbya-u, usanguny lwa Nndumi Iruva yefo Yerusalemu, mbashekisoraa umbafu lwa mirima yaawo miravi-fo.

¹⁸Mikonuny yeyo mmba ya Yuda mmbo ishekulungaa na mmba ya Israeli, na kyimwi vasheshaa uka uruka lwa taari ya ndoo fika uruka lulya sheniinga vandoo ding'u.”

¹⁹“Nshekusara, a ni inda shikuvika nnang'ani ya vasoro vakwa, na ikuniinga uruka usha, ding'u shisha iilannyi masanga moose. Shakusara nkweshivaanga yeny, Nde wakwa, kulashukaa-se kwakwa.

²⁰Kya dede, shaasa nka nalatiri kyikusirio aree mmi wakwe, ni indo kulelema ishikusirya, yewe mmba ya Israeli, ni Nndumi Iruva aamba.”

²¹Unyanga lwiitiwa yefo mafumbu-u, vasoro va Israeli vakefua na itereva, mashika elyi valereesa shia yaawo, vakarekyo Nndumi Iruva, Iruva waawo.

²²“Wuyeny, yeni vasoro vaturi va kyikusirio, Yeny shishiisa iwwo kyikusirio lyany. Lola, lwakusheya mmbe; mashika kukee Nndumi Iruva, Iruva weeru.

²³Ni kya dede fidooro ni wongo nfilweekya-fo, nta ikutumarisa mafumbuuny-fo. Ni kya dede ni kwa Nndumi Iruva, Iruva weeru ukiro lwa Israeli lukai.”

²⁴“Indi lyo uka ukoo lweru miindye ya maruva a wongo ni kyindo kya usutu, mmbo kyilerumata irunda lya vande veeru, maronda a mburu na a ng'umbe tawo, vasoro vana va womi na va kyika.

²⁵Lulale si kya sony yeeru, na usutu lulusikkye; mashika lulelyamarya Nndumi Iruva, Iruva weeru, yese na vande veeru, uka ukoo lweru fika inu; nta llulelatya unyanga lwa Nndumi Iruva, Iruva weeru-fo.”