Read BIBILLYA Mareiyo Meele a Iruva YEREMIA 30 Bible Online

YEREMIA 30 - BIBILLYA Mareiyo Meele a Iruva bible

YEREMIA 30

¹Naasa Nndumi Iruva, Iruva wa Israeli:

²kashivia, “reiya kyitabuny kyafo, findo efi fyoose shikekuvia,

³Mashika kyeeri kishaa elyi nshewouwaa vandu vakwa va Israeli na Yuda. Mmbo nshevaviraa urukeny lwawo llwa shileniinga vakuu-vawo, vashekaa-fo. Ni yeny Nndumi Iruva shaamba indo.”

⁴Nndumi Iruva mmbo avia vandu va Israeli na Yuda indi,

⁵“Mmbo shileeta kiiyo kyeeresye, kiiyo nta nshi ufoo-fo.

⁶Ulaalu irisha kukusare, swaa, ndesa nndumi ashiraa mwana? A nkikiny shilollye womi vevikye woko yoo ndeu sha nka akeeniingwa mwana. A nkiki elyi fisaangu fyawo fitefukye?

⁷Kukeesha nkonu weeresye, wiirye mikonu ingyi myoose. Nkonu wa ngatara niini kwa vandu vakwa, lyo mmbo vashekirwaa.”

⁸Nndumi Iruva muni finya mmbo aamba, Elyi nkonu yeto ushaa, mmbo nshefishaa kifingyo ekyo kikee efo singony tawo, shiwoote mise yeyo ivafingye, nta valakivaa mashinga a veny.

⁹Lyo mmbo vashirundyaa yeny Nndumi Iruva muni finya, Iruva waawo, na mangyi waawo wa ufyari lwa Davidi yeto nshemmbikaa

¹⁰Vandu vakwa nta mulairyaa-fo, vandu vakwa nta mulamatuwa Mmbo nshemwauwaa efo urukeny yelo lwa kwaasha, efo mukee mashinga. Mushewuya kyeny mukaye na unapwe. Mukee kipwa, nta mulakiryaa.

¹¹Mmbo ushemusheyaa shimwaane, Shimamite vandu va masanga efo munyanyatye lyo yeni nshimulyamaraa-fo. Nshiraa shilamukapa lyo fo. Shammukapa lyo mmbo nsheesyaa. Ni yeny Nndumi Iruva shaamba.

¹²Nndumi mmbo avia vandu vakwe indi, “Matiinga any nnyavaa ishiisa-fo nta fishavere fyaany mfivaa ivavara-fo.

¹³Nta nkwiifo nndu ashiidimaa imuvavara-fo, nkwiifo nri wany-fo. nta ivika nsia lya ishia-fo.

¹⁴Vakunde vany woose mmbo vammuurekywa, mmbakimusarye-fo Mmbo shilemukapa sha nkiduva, ngapo yafo ikarovya elyi maravi afo afumbuka, na ulyamari lwafo lukang'ana.

¹⁵Kulakiaa kimaruma kya ivavyo lyafo, nkutiri nri-fo. Mmbo shilekukapa indi, mashika elyi makasha afo akee meengyi na maravi afo akafumbuka.

¹⁶Lyo ulaalu yewo vashekuwonnya nawo mmbo vashewonnywa na vakiduva vafo woose vashekamarwa mfungwa. Na woose vashekuwonnya nawo vashewonnywa neewo vashekulamyaa ikusoka masaa afo, nawo vavesokwa

¹⁷Mmbo shekushisaa, shishiise matiinga afo, na kyikava vakiduva vafo vaamba, ‘Sioni mmbo anrekywa-fo, nkwiifo nndu ansarye-fo: Nnyeny Nndumi Iruva shaamba indo.’

¹⁸Nndumi Iruva aamba indi, Mmbo nsheviraa vandu vakwa urukeny lwawo, shilyillye wo mmba yaawo Yerusalemu mmbo ishewuyaa-se itanwa, na mmba ya mangyi ivauwa.

¹⁹Vandu valelefo mmbo vasherumishaa, vaonise unyanga lwa ifura. Kimmba shivavikyaa mbora mmbo vashefumbukaa, mbora yakwa iveengye nnduma.

²⁰Nsheviirya vandu yeva finya ilya ya kasha, vaviiryo finya deny. Neewo woose vashevalamyaa shivakape,

²¹Vevashillya vasheukaa kwawo veni Na mangyi waawo nave waawo veni

²²Nawe nashisheye elyi nshembiaa A mmbi yeto ashaa nalavaangwa? Mmbo vashevaa vandu vakwa, Neeny shive Iruva waawo. Ni yeny Nndumi Iruva shaamba indo.”

²³Unyafi lwa Nndumi Iruva nsha uraato uniini, uraato lwa finya lusheira efo kutani mirweny ya vandu varavi.

²⁴Nalo llushemandaa-fo kutani lwatana ekyo lwasheyaa. Mikonu yeyo ishaa elyi vandu vakwe vashemanyaa eki nisha.